“ဝ”ကိုယ်ပိုင် အုပ်ချုပ်ခွင့်ရ ဒေသအတွင်း ရှိ ရွှေဆိုင် ဓားပြတိုက်ပြီး လူသတ်မှု ကျူးလွန်ခဲ့သည့် တရုတ်နိုင်ငံသား ၃ဦး ကို သေဒဏ်စီရင်ခဲ့ကြောင်း သတင်း ရရှိသည်။
သေဒဏ်စီရင်ခံရသည့် တရုတ်နိုင်ငံသား ၃ဦးသည် မေ ၃ရက် တွင် “ ဝ” ကိုယ်ပိုင် အုပ်ချုပ်ခွင့်ရ ဒေသ နမ့်တစ်မြို့နယ် ၌ ဖွင့်လှစ်ထားသည် ရွှေဆိုင် ကို ဝင်ရောက်လုယက်ခဲ့ပြီး ဆိုင်ရှင်ကို သတ်ခဲ့သူများ ဖြစ်ကြသည်။
ထို့ပြင် မေ ၃ရက် တွင် တရားခံ ၃ဦး မှ ၂ဦးကို စတင်ဖမ်းဆီးရမိပြီး၊ မေ ၅ရက်တွင် ကျန် တဦးကို ထပ်မံ ဖမ်းဆီးရမိကြောင်း UWSA “ ဝ”ပြင်ပ ဆက်ဆံရေး တာဝန်ရှိသူ ဦးညီရမ်း ၏ လူမှု ကွန်ရက် စာမျက်နှာတွင် ရေးသားထားသည်။
ထို့နောက် မေ ၁၄ရက်နေ့ တွင် ၎င်း ၃ဦးကို စိစစ်မှု ပြုလုပ်ပြီး “ဝ” ဥပဒေ အတိုင်း သေဒဏ်စီရင်ခဲ့ကြောင်း သိရသည်။
အဆိုပါ ကျူးလွန်သူများသည် “ဝ” ပြည်နယ် တွင် လာရောက် အလုပ်လုပ်ကိုင်သည့် တရုတ်နိုင်ငံသားများဖြစ်ကြောင်း၊ “ဝ” ဥပဒေ အရ ပြစ်မှု ကျူးလွန်သူသည့် မည်သည့်နိုင်ငံသားမဆို ဥပဒေ အတိုင်းသာ တရားစီရင်ကြောင်း သိရသည်။
ပြစ်မှု ကျူးလွန်သည့် သူများကို ပြစ်ဒဏ်မပေးခင် မြို့တပတ် ပတ်ပြခဲ့ပြီး၊ လူသတ်ကုန်း တွင ်သေနတ်ဖြင့် ပစ်သတ်စီရင်ခဲ့ကြောင်း “ဝ” ဒေသတွင် နေထိုင်သည့် သျှမ်း အမျိုးသမီး တဦးက ပြောပြသည်။
“ ဒီမှာက ပြစ်မှု ကျူးလွန်တဲ့သူဆိုရင် တရားမစီရင်ခင် မြို့ ပတ်တယ်။ တရားခံ ကိုပြတယ်။ နောက် ပြစ်ဒဏ်စီရင်တယ်။ အခုလည်း ဒီလိုပဲ မြို့ ပတ်ပြီးနောက် သေနတ်ပစ်သတ်လိုက်တာပါ” ဟု ၎င်းအမျိုးသမီးက ပြောပြသည်။
Leave a Comments