သျှမ်းပြည်အရှေ့ပိုင်း တာချီလိတ်မြို့နယ် RCSS/SSA လှုပ်ရှားနယ်မြေ အတွင်း သစ်ခိုးထုတ်ရန် ကြိုးစားသည့် ချစ်ထူ ရွာသား ၂ဦးကို RCSS/SSA အဖွဲ့ဝင်က သေနတ်ပစ်ခတ်ခဲ့ကြောင်း စုံးစမ်းသိရှိရသည်။
ဧပြီ ၂၇ ရက် တွင် RCSS/SSA လှုပ်ရှားသည့် နယ်မြေ လွိုင်ပန်ကော် တောင်ပေါ် တွင် ချစ်ထူ ကျေးရွာ မှ ရွာသား ၂ဦး သစ်လာရောက်ခိုးထုတ်မှုကြောင့် RCSS/SSAတပ်သားများမှ ခေါ်ယူစစ်ဆေးနေချိန် တဦးက ထွက်ပြေးရန် ကြိုးစာနေသဖြင့် သေနတ်ဖြင့် ပစ်လိုက်ကြောင်း RCSS/SSA ပြောရေးဆိုခွင့်ရှိသူ ဒုဗိုလ်မှူး စဝ်အုမ်ခေး က သျှမ်းသံတော်ဆင့် ကို ပြောသည်။
အဆိုပါ ရွာသား ၂ဦးသည် RCSS/SSA လှုပ်ရှားသည့် နယ်မြေ အတွင်းရှိ သစ်များခိုးထုတ်ရန် ကြိုးစားနေကြပြီး၊ ၎င်း နှင့် အတူ သစ်ဖြတ်စက် ၃လုံး နှင့် ဖြစ်ထားသည့် သစ်များ တွေ့ရှိကြောင်း ဒုဗိုလ်မှူးကြီး စဝ်အုမ်ခေး က ပြောသည်။
“ရွာသားတွေ သစ်ခိုးထုတ်နေတာတွေ့ရတယ်။ သစ်ခိုးထုတ်တဲ့နေရာမှာ ဖြတ်ထားပြီးသား သစ်တွေရယ် သစ်ဖြတ်စက် ၃ လုံးတွေ့ရှိတာ တပ်ဖွဲ့ကနေပြီး ရွာသားတွေကို ခေါ်စစ်တယ်။ တယောက်က ရဲဘော်ရဲ့ သေနတ်ကို ဝင်လုတယ်။ ဒါကြောင့် ပစ်ခတ်မှုတွေ ဖြစ်သွားတယ်။ ဝင်လုတဲ့တယောက်က သေသွားတယ်” ဟု ဒုဗိုလ်မှူးကြီး စဝ်အုမ်ခေး ကဆိုသည်။
သစ်ခိုးထုတ်သည့် ရွာသား ၂ဦးသည် RCSS/SSA ခေါ်ယူစစ်ဆေးချိန် ၎င်း ၂ဦးထဲမှ တယောက်သည်တပ်သား၏ လက်နက်ကို ဝင်လုရာမှ ပစ်ခတ်မှုဖြစ်ပြီး တဦးသေဆုံးခဲ့ကြောင်း သိရသည်။
ထို ရွာသား ၂ဦးကို RCSS/SSA သေနတ်ပစ်ခတ်မှု ဖြစ်ပွားသည့် ကိစ္စနှင့် ပတ်သက်ပြီး ကျေးရွာ ရှိ ရွာသားများ၊ ရွာသူကြိးများကို တွေ့ဆုံပြီး ဖြေရှင်းခဲ့ပြီး၊ ပြေလည်မှု ရရှိခဲ့ကြောင်းလည်း ဒုဗိုလ်မှူးကြီး စဝ်အုမ်ခေး က ရှင်းပြသည်။
ချစ်ထူရွာ က ရွာသား သေဆုံးမှု သည် RCSS/SSA တပ်ဖွဲ့ဝင် ပစ်ခတ်ခြင်း နှင့် ပတ်သက်ပြီး ကျေးရွာရှိ ရွာသား နှင့် ရွာသူကြီးတို့ အားလုံး ပြေလည်သွားပြီ ဖြစ်ကြောင်း သိရသည်။
လက်ရှိ လူမှုကွန်ရက် စာမျက်နှာပေါ်တွင် RCSS/SSA တပ်သားဝတ်စုံဝတ်ဆင်ကာ ရွာသားများကို ငွေတောင်းခြင်း၊ အခွန်ကောက်ခြင်း ဆိုသည့် ကိစ္စရပ်မှာ လုံးဝ မဟုတ်မှန်ကြောင်း လည်း RCSS/SSA က ပြောဆိုလိုက်သည်။
“ ငွေမပေးနိုင်လို့ ပစ်သတ်လိုက်တယ်ဆိုတာ အဲ့ဒါ မဟုတ်ဘူးပေါ့နော်” ဟု ဒုဗိုလ်မှူးကြီး စဝ်အုမ်ခေး ကပြောသည်။
သေဆုံးသွားသူသည် ချစ်ထူကျေးရွာသား တဦးဖြစ်ပြီး ညာဘက် နောက်ကျော မှ ဘယ်ဘက် ရင်ဘတ်ဖောက်ဝင်သည့် ကျည်ဒဏ်ရာရရှိကြောင်း၊ လက်ရှိမှာ အလောင်းကို တာချီလိတ်ခရိုင်ပြည်သူ့ဆေးရုံ သို့ပို့ထားပြီး၊ အသတ်ခံရမှုနှင့် ပတ်သက်ပြီး တာချီလိတ်မြို့မ ရဲစခန်းက (ပ) ၂၁၄/၂၀၂၀၊ရာဇာသတ်ကြီး ပုဒ်မ ၃၀၂/၁၁၄ ဖြင့် ဧပြီ (၂၈)ရက် တွင် အမှုဖွင့် စစ်ဆေးနေကြောင်း သိရသည်။
RCSS/SSA သည် တနိုင်ငံလုံး ပစ်ခတ် တိုက်ခတ်ရေး သဘောတူစာချုပ် (NCA)လက်မှတ်ရေးထိုးထားသည့် တိုင်းရင်းသားလက်နက်ကိုင် တပ်ဖွဲ့တခုဖြစ်သည်။
