သျှမ်းပြည်တောင်ပိုင်း လွိုင်လင်မြို့နယ်တွင် တရုတ်ပြည်တော်ပြန် ၉၇ ဦးရှိပြီး အစားအသောက်ပိုင်းကို ကိုယ်တိုင်စီမံရကြောင်း သတင်းရရှိသည်။
အဆိုပါ တရုတ်ပြည်တော်ပြန်များသည် မူဆယ် – တရုတ်နယ်စပ် ဂိတ်မှ ဧပြီ ၂၄ ရက်နေ့က ထွက်လာကြသူများဖြစ်ပြီး ထိုသူများကို Quarantine ၂၁ ရက် ထားရှိမည်ဖြစ်ကြောင်း လွိုင်လင်မြို့နယ် မဲဆန္ဒနယ် အမှတ် (၂) လွှတ်တော်အမတ် နန်းမြထွေးက သျှမ်းသံတော်ဆင့်ကိုပြောသည်။
“ခု ပြည်တော်ပြန်တွေကို အစိုးရကတော့ နေဖို့ နေရာတွေပဲ စီစဉ်ထားပေးတယ်။ စားသောက်ရေးပိုင်းကိုတော့ သူတို့ တတ်နိုင်သလောက် နည်းများမဆို ပြန်ကူညီနေပါတယ်။ ဒီက သက်ဆိုင်ရာ တာဝန်ရှိသူတွေ ဘက်ကလည်း အလှူရှင်တွေ စု ပြီး တတ်နိုင်သလောက် ကူညီသွားမှာပါ” ဟု နန်းမြထွေး ကပြောသည်။
ထို တရုတ်ပြည်တော်ပြန်များသည် မိမိသဘောဆန္ဒဖြင့် ပြန်လာကြသူများဖြစ်ပြီး၊ ထိုပြည်တော်ပြန်များသည် ပင်လုံမြို့ ပတ်ဝန်းကျင်ရှိ ဟဲနန်းကျေးရွာအုပ်စု၊ ဆဟောင်းကျေးရွာအုပ်စု၊ တန့်အယ် ကျေးရွာအုပ်စု နှင့် ပန်မုန့် ကျေးရွာအုပ်စု တို့ ဒေသခံ များ ဖြစ်ကြသည်။
လက်ရှိမှာ ပြည်တော်ပြန် ၉၇ ဦး ကို လွိုင်လင်မြို့နယ်ရှိ အစိုးရ နည်းပညာ အထက်တန်းကျောင်း နှင့် ပင်လုံမြို့ရှိ နတလ ကျောင်း တွေမှာ ထားခြင်း ဖြစ်သည်။
ဧပြီ ၂၆ ရက်နေ့က အရှေ့အလယ်ပိုင်း တိုင်းမှူးမှလည်း လွိုင်လင်မြို့နယ်ရှိ တရုတ်ပြည်တော်ပြန်များကို ဆန်၊ ဆီ နှင့် ပဲ တို့လည်းလာရောက်လှူဒါန်းသွားကြောင်း သိရသည်။
Leave a Comments