တိုင်းရင်းသားအရေးမျက်ကွယ်ပြုသော် ရွှေပြည်တော်မျှော်တိုင်းဝေးနေဦးမယ်

0

မြန်မာ့ဆိုရိုးစကားတခုဖြစ်တဲ့ “အရေးကြီး၊ သွေးနီး” ဆိုတာ တိုင်းပြည်အရေး အမျိုးသား အရေးမှာ အရေးအကြောင်း ကြုံလာရင် လက်တွဲဖြေရှင်းရမယ်၊ အဲ့ဒီ့ဘုံရန်သူကို လက်တွဲ တိုက်ခိုက်ရမယ် လို့ သဘောပေါက်ပါတယ်။

လက်ရှိတိုင်းပြည်မှာ ကိုဗစ် ၁၉ ကူးစက်ပျံ့ပွားနေတာဟာ တိုင်းပြည်အရေးအကြောင်း ဖြစ်ဒါကြောင့် အဲဒီ့ ကပ်ရောဂါကို လက်တွဲ ကာကွယ်တိုက်ဖျက်ရမယ့် အချိန်ဖြစ်ပါတယ်။ သို့ပေမယ့် လူထု တင်မြှောက်ထားတဲ့ နိုင်ငံခေါင်းဆောင် နိုင်ငံတော် အတိုင်အပင်ခံရဲ့ ပြောစကားတခွန်းက ဒို့တာ၀န် အရေးသုံးပါး ထဲက တပါး ဖြစ်တဲ့ တိုင်းရင်းသား စည်းလုံးညီညွှတ်ရေးကို ထိခိုက်စေပါတယ်။

ဧပြီ ၂၂ ရက်နေ့ အစိုးရပိုင် သတင်းစာ ခေါင်းကြီးပိုင်းမှာ – Coronavirus Disease 2019 (COVID-19) ရောဂါကာကွယ်၊ ထိန်းချုပ်၊ ကုသနိုင်ရေးအတွက် နိုင်ငံတစ်ဝှမ်းလုံးရှိ အစိုးရ၊ ပြည်သူ၊ စေတနာ့ဝန် ထမ်း များက အလေးထားကြိုးပမ်းဆောင်ရွက်နေချိန်တွင် ULA/AA အကြမ်းဖက်အုပ်စုက ရခိုင်ပြည် နယ် နှင့် ချင်းပြည်နယ်အတွင်း အဖျက်၊ အမှောင့်လုပ်ရပ်များ လုပ်ဆောင်နေသဖြင့် ပြည်သူလူထု၏ အသက်၊ အိုးအိမ်၊ စည်းစိမ်ကိုထိန်းသိမ်းကာကွယ်စောင့်ရှောက်နိုင်ရန်အတွက် အသက်စွန့်ကာရွပ်ရွပ် ချွံချွံတာ၀န်ထမ်းဆောင် လျက်ရှိသော တပ်မတော်သားအရာရှိ၊ စစ်သည်များအားလုံးကို အသိအမှတ် ပြု ချီးကျူးဂုဏ်ပြုပါတယ် – လို့ နိုင်ငံတော်၏ အတိုင်အပင်ခံပုဂ္ဂိုလ် ဒေါ်အောင်ဆန်းစုကြည် မှ ရေးသား ထုတ်ပြန်ထားပါတယ်။

ဒီထုတ်ပြန်ချက်ဟာ တဘက်ကို နှိမ့်ချပြီး၊ တဘက်ကို ဂုဏ်ပြုထားတာဟာ လက်ရှိ တိုင်းပြည် အနေ အ ထားအရ တိုင်းပြည်မှာ ဖြစ်ပွားနေတဲ့ပြသနာများကြား ကြား၀င်ဖြေရှင်းနိုင်မယ့် လူထုအစိုးရ တရပ်ဖြစ်ဖို့ မျှော်လင့် ချက်ကင်းဝေးသွားစေခဲ့ပါတယ်။ တိုင်းရင်းသားအရေးဟာ ပြည်ထောင်စု အရေးပါ။ တိုင်းရင်းသား ပြဿနာ မဖြေရှင်းနိုင်ရင် တိုင်းပြည်လည်း အေးချမ်းနိုင် မှာမဟုတ်ဘူး။ တိုင်းပြည်မငြိမ်းချမ်းရင် ပြည်ထောင်စုကြီးလဲ ဖွံ့ဖြိုးတိုးတက်မှာမဟုတ်ပါဘူး။ လူနေမှုအဆင့် အတန်းနိမ့်ကျပြီး ကမ္ဘာ့အလည်မှာ မြန်မာဆိုတာကလဲ မျက်နှာ ငယ်နေအုန်းမှာပါဘဲ။

ရခိုင်တွေ ဘာကြောင့်လက်နက်ကိုင်ရတာလဲ၊ ကချင်၊ ကရင်၊ မွန်၊ သျှမ်း အပါ အ၀င် တခြား တိုင်းရင်းသားတွေ ဘာ့ကြောင့် လက်နက်ကိုင် နေတာလဲ ဆိုတာ မြန်မာ့ ခေါင်းဆောင်တွေ အနေနဲ့ စတင်ဖြစ်ပေါ်လာတဲ့ အရင်းဇစ်မြစ်ကို သွားပြီး အဖြေရှာရမှာပါ။ ပြည်ထောင်စုမပြိုကွဲရေး၊ တိုင်းရင်းသားစည်းလုံးညီညွှတ်မှု မပြိုကွဲရး၊ အချုပ်အခြာအာဏာတည်တံ့ခိုင်မြဲရေး ထုတ်ပြန်နေဖို့ အော်နေဖို့ မလိုဘဲ လက်တွေ့ကျတဲ့ အပြောအဆို အလုပ်အကိုင် တွေလုပ်ပြရမှာဖြစ်ပါတယ်။

ကျင်းပလာခဲ့တဲ့ ၂၁ ရာစု ပင်လုံညီလာခံ အမည်ရ ပြည်ထောင်စုငြိမ်းချမ်းရေးညီလာခံက ဘာကြောင့်တစ်ဆို့နေတာလဲ။ အားလုံးပါ၀င်တဲ့ ညီလာခံကြီး ဖြစ်ဖို့ ဘာလို့မလုပ်နိုင်တာလဲ။ ရခိုင် AA ၊ ပလောင်(တအာင်း) TNLA ၊ ကိုးကန့် MNDAA ကို ဘာကြောင့်ချန်ထားခဲ့သလဲ။ ချန်ထားခဲ့တဲ့အတွက် ဘယ်လို အကျိုး သက် ရောက်မှုတွေဖြစ်လာသလဲ။ ကျင်းပလာခဲ့တဲ့ ညီလာခံကြီးကလဲ တဘက်က တဘက်ကို လက်နက်ဖြုတ် သိမ်းဖို့၊ နိုင်ငံရေးအမြတ်ထုတ်ဖို့ အပေါ်စီးကနေ ဖိအားပေးလို့ တစ်ဆို့လာခဲ့တယ်လို့ ပြောရင်လဲမှားမယ်မ ထင်ပါဘူး။

လက်ရှိအနေအထားအရ တိုင်းရင်းသားလက်နက်ကိုင်တပ်ဖွဲ့တွေကို အကြမ်းဖက်အဖွဲ့ ၊ တိုင်းပြည်ကို လက်ဝါးကြီးအုပ်ချယ်လှယ်လာတဲ့တပ်မတော်ကို ရွပ်ရွပ်ချွံချွံ တာဝန်ထမ်းဆောင်တဲ့ တပ်မတော် သားတွေပါ ဆိုပြီးဂုဏ်ပြု ချီးမွှမ်းတဲ့စကားဟာ အာဏာဂတ် အိပ်မက်လှလှ လေးအတိုင်း ဖြစ်လာမဲ့တိုင်းပြည်အတွက် အခြေအနေမကောင်းပါဘူး။

လွတ်လပ်ရေးရယူပြီးချိန် ပြည်ထောင်စုမြန်မာနိုင်ငံတော်ဟာ အရှေ့တောင်အာရှ မှာ စံပြတိုင်းပြည်၊ တခြားတိုင်းပြည်ကနေ မြန်မာပြည်ဆီကို ပညာလာသင်ချင်တဲ့ တိုင်းပြည်ကြီးပါ။ နှစ်ပေါင်း ၇၀ အကြာမှာတော့ မြန်မာနိုင်ငံသားတွေ ဘယ်ဘဝ ရောက်နေလဲ ဆိုတာ ဆင်ခြင်သတိထား သင့်ပါပြီ။

WHO ကားပစ်ခံရလို့ ကုလ ဝန်ထမ်းတစ်ဉီးသေဆုံးသွားတဲ့ အမှုမှာ ရခိုင်လက်နက်ကိုင်တပ် AA ကို အကြမ်းဖက်အဖွဲ့၊ တပ်မတော် ကို ဂုဏ်ပြုတိုက်ပွဲ၀င်တဲ့ တပ်မတော်လို့ချီးမြင့်ရုံနဲ့ တိုင်းပြည်အရေး ဖြေရှင်းနိုင်မှာ မဟုတ်ပါဘူး။ ပိုမိုရှုပ်ထွေးလာစေတာ ဘဲဖြစ်ပါတယ်။

လက်ရှိတိုင်းပြည်မတည်မငြိမ်ဖြစ်မှု ဆင်းရဲမွဲသေမှု ကမ္ဘာ့အလည်မှာ မြန်မာမျက်နှာငယ်မှု ဖြစ်နေတာဟာ ပင်လုံ ကတိကို သွေဖယ်လို့ ဖြစ်လာခဲ့တာပါ။

ဗိုလ်ချုပ်အောင်ဆန်းက တိုင်းရင်းသားခေါင်းဆောင်တွေ ကျင်းပနေတဲ့ ပင်လုံညီလာခံကို အခွင့်ကောင်းယူပြီး ပြည်ထောင်စုကြီးကို ရအောင်တည်ဆောက် လာခဲ့တယ်။ ဗိုလ်ချုပ်ထက် ပညာအရည်အချင်းမြင့်တဲ့ ဘိလပ်ဘွဲ့ရ ငြိမ်းချမ်းရေးဆုရှင် ဒေါ်အောင်ဆန်းစုကြည် ဗိုလ်ချုပ် အောင်ဆန်းသမီးက လက်တွေ့ကျတဲ့ တိုင်းပြည်အရေးကို ဖြေရှင်းပေးလိမ့်မယ်လို့ တိုင်းရင်းသားခေါင်းဆောင်တွေက အထူးမျှော်လင့် ခဲ့ပါတယ်။

မျှော်လင့်ချက် အိပ်သွန် ဖါမှောက် သဲထဲရေရောက် ဘဝ လုံးလုံးမဖြစ်ခင်၊ ကိုဗစ် ၁၉ တိုက်ဖျက်ရေးကို အခွင့်အလှမ်းအဖြစ်မှတ်ယူပြီး နိုင်ငံတဝှမ်းလုံးဆင်နွဲနေတဲ့တိုက်ပွဲအားလုံးရပ်တန့်ကြောင်း အစိုးရ နဲ့ တပ်မတော်က အမြန်ဆုံး ပူးတွဲ ထုတ်ပြန်ပြီး ကိုဗစ်ကို လက်တွဲတိုက်ဖျက်ဖို့ လိုအပ်နေပါပြီ။ ကိုဗစ် ပြီးသွားရင်လဲ ရွေးကောက်ပွဲမှာ အနိုင်ရဖို့ပဲ ကြိုးစားနေတာ ထက် အားလုံးပါဝင်တဲ့ နိုင်ငံရေးတွေ့ဆုံ ဆွေးနွေးပွဲ ပြုလုပ်ဖို့ ပြင်ဆင်ချမှတ်ထားသင့်ပါပြီ။

လူထုအသံ

သျှမ်းသံတော်ဆင့်အသံ

Leave a Comments