သျှမ်းပြည် မြောက်ပိုင်း သီပေါမြို့နယ် ဆောင်ကြဲကျေးရွာတွင် အမျိုးသား (၄) ဦး မိလ္လာကျင်းတူးရင်း ပြုတ်ကျ သေဆုံးကြောင်း သိရသည်။
ဖြစ်စဉ်မှာ ဧပြီ ၂၃ ရက်နေ့ ည ၆ နာရီအချိန်ခန့်တွင် ဦးအိုက်လှ ၏ နေအိမ်ဝန်းတွင် မိလ္လာကျင်းအသစ်တူးရာမှ မိလ္လာကျင်း အဟောင်းမှ မစင်များထွက်ပြီး အောက်စီဂျင်ပျက်ကာ တစ်ဦးကို တစ်ဦး ဆင်းကယ်ကြရာမှ မိလ္လာကျင်းထဲ သေဆုံးခဲ့ရခြင်း ဖြစ်ကြောင်း သွားရောက်ကူညီသည့် သီပေါမြို့ဒေသခံ လူငယ်တစ်ဦး ကရှင်းပြသည်။
“ဖြစ်ပျက်သွားတာက နာရီဝက်လောက်ပဲ ကြာသွားတယ်။ ၄ ယောက်စလုံး သေဆုံးသွားကြတယ်”ဟု ၎င်း လူငယ် တစ်ဦးကပြောသည်။
မိလ္လာကျင်းထဲ သေဆုံးသွားသူများမှာ ဦးစိုင်းလှ အသက် (၄၈) နှစ် ၊သားဖြစ်သူ ဦးစိုင်းသီဟ အသက်( ၂၅) နှစ် ၊ သားဖြစ်သူ စိုင်းဇော်ဦးသာ အသက်( ၂၁ ) နှစ် နှင့် ဦးစိုင်းလှ နှင့်ဆွေးမျိုးတော်စပ်သူ မောင်မိုးအောင် အသက်( ၂၇ ) နှစ် ဖြစ်ကြောင်း သိရသည်။
သီပေါမြို့နယ် SNLD ပါတီဝင် စိုင်းလောဝ်ဆိုင်က ” ဒီလို မိလ္လာကျင်း တူးမယ်ဆိုရင် ကျနော်တို့ အားလုံး သတိထားဖို့ လိုတယ်။ တူးမယ်ဆိုရင်လည်း ကျင်း ဟောင်း နဲ့ ဝေးတဲ့နေရာမှာ တူးရမယ်။ မဟုတ်ရင် အသက်အန္တရာယ် ထိ ရှိနိုင်တာပေါ့နော်။ ခုဖြစ်သွားတာ ကျနော်တို့ အားလုံးအတွက် သင်ခန်းစာ ယူသင့်တယ်။” ဟု ပြောသည်။
အခင်းဖြစ်ပွားရာနေရာသို့ သီပေါမြို့နယ် မီးသတ်ဦးစီးဌာနမှ တာဝန်ရှိသူများ နယ်စည်းမခြားလူမှုရေးအသင်းအဖွဲ့မှ လူနာတင်ယာဉ် ၁ စီးဖြင့် သီပေါမြို့နယ် ပြည်သူ့ဆေးရုံသို့ ပို့ဆောင်ပေးခဲ့ကြောင်း သိရသည်။
