တောင်ကြီးမြို့ COVID-19 လူနာအမှတ် ၁၂၁ နှင့် အနီးကပ် ထိတွေ့သူ ၁၂ ဦးရှိကြောင်း သျှမ်းပြည်နယ် အစိုးရအဖွဲ့လူမှုရေးဝန်ကြီး ဒေါက်တာမျိုးထွန်း က သျှမ်းသံတော်ဆင့် ကိုပြောသည်။

ဧပြီ ၂၁ ရက်နေ့ည က အားကစား နှင့် ကျန်းမာရေးဝန်ကြီးဌာန မှ ထုတ်ပြန်သည့် အတည်ပြုလူနာ ၂ ဦးမှာ တောင်ကြီးမြို့က လူနာ တစ်ဦးပါဝင်နေကြောင်း သိရသည်။

“မိသားစုဝင် ၅ ယောက် သူငယ်ချင်း ၃ ယောက် တူတူသွားလာတာ ရှိတယ်။ နောက် သွားဆေးခန်း သွားတာလည်း ရှိတယ်။ အဲ့ဒါတွေ အားလုံးက အနီးကပ်ထိတွေ့သူ တွေရဲ့ ဓါတ်ခွဲနမူနာ အားလုံးကို ရန်ကုန်ကို ပို့မှာပေါ့နော်။” လူမှုရေးဝန်ကြီး ဒေါက်တာမျိုးထွန်း ကသျှမ်းသံတော်ဆင့် ကိုပြောသည်။

အဆိုပါ လူနာအမှတ် ၁၂၁ သည် အင်္ဂလန်နိုင်ငံမှ ပြန်လာသူဖြစ်ပြီး ဧပြီ ၅ ရက်နေ့က ရန်ကုန် မှ ဟဲဟိုး သို့ Golden Myanmar Airline လေကြောင်းလိုင်းဖြင့် ခရီးသည် ၂၈ ဦး နှင့်အတူ စီးနှင်းလာကြောင်း သိရသည်။

“ လေယာဉ် နဲ့ အတူစီးလာတဲ့ ၂၈ ယောက်လည်း နှာခေါင်းတို့ပတ် ပို့နိုင်အောင် စီစဉ်နေတာပေါ့နော်။” ဟု ဝန်ကြီး ဒေါက်တာမျိုးထွန်း ကပြောသည်။

လူနာ အမှတ် ၁၂၁ သည် မတ်လ ၂၂ ရက်နေ့ က အင်္ဂလန် နိုင်ငံမှ ပြန်လာသူဖြစ်ပြီး ရန်ကုန် Airport Hotel တွင် Quarantine ဝင်ခဲ့သည်။ ထိုကာလ အတွင်း အနံ့အရသာ ပျောက်နေသည့် အကြောင်းကိုကျန်းမာရေးဝန်ထမ်းများကို ပြောပြခဲ့သည်။

သို့သော် ထိုအချိန်တွင် အံသွားပေါက်နေသည့်အတွက် ကြောင့် COVID-19 ဖြစ်မှန်းမထင်ဘဲ quarantine ရက်ပြည့်သည့် ဧပြီ ၅ရက်တွင် ပြန်လာခဲ့သည်။

ထို့ပြင် ဧပြီ ၁၉ ရက်ထိ လူနာအမှတ် ၁၂၁သည် အနံ့အရသာမရသဖြင့် တောင်ကြီး ဆေးရုံကို သွားပြခဲ့ပြီးသံသယ လူနာ အဖြစ်သတ်မှတ်ခဲ့ရာ ဧပြီ ၂၁ရက် ညတွင် ဆေးစစ်ချက် အဖြေ positive အဖြေထွက်ခဲ့သည်။

ထို့ကြောင့် လူနာအမှတ် ၁၂၁ နှင့်ထိတွေ့ဆက်စပ်ခဲ့သည့် ပြည်သူများအားလုံး တောင်ကြီး ဆေးရုံတွင် ဆေးစစ်ရန် လည်း သက်ဆိုင်ရာက ပန်ကြားထားသည်ကို တွေ့ရသည်။

မြန်မာနိုင်ငံတွင် Covid-19 စောင့်ကြည့်လူနာ ၁၂၁ ဦးရှိပြီး သျှမ်းပြည်နယ်တွင် ရောဂါပိုးတွေ့ရှိသူ ၆ ဦး ရှိပြီး ၆ ဦးစလုံး ကျန်းမာရေးကောင်းမွန်လျှက် ရှိကြောင်း သိရသည်။