သျှမ်းပြည်တောင်ပိုင်း လွိုင်လင်မြို့နယ် အတွင်းရှိ ဈေးသုံးရန် အတွက် တအိမ်လျှင် ဈေးဝယ်ယူခွင့်ကဒ် (၁) ကဒ် ထုတ်ပေးကာထားကြောင်း သတင်းရရှိသည်။

ထိုကဲ့သို့ပြုလုပ်ခြင်းသည် COVID-19 ကို ကာကွယ်သည့်အနေဖြင့် ပြုလုပ်ခြင်းဖြစ်ပြီး လွိုင်လင်ခရိုင် အတွင်းရှိ လွိုင်လင်မြို့ နှင့် ပင်လုံမြို့ မှ မြို့ မဈေးများနှင့် ပျံကျဈေးများတွင် ဧပြီ ၁၈ ရက်မှ စတင်ကာ ဈေးဝယ်ထွက်ပါက ဈေးဝယ်ခွင့်ကဒ် ယူဆောင်သွားရမည် ဟု လွိုင်လင်မြို့နယ် အုပ်ချုပ်ရေးမှူး က သျှမ်းသံတော်ဆင့်သို့ ပြောသည်။

လူစုလူဝေး မဖြစ်စေရန် အတွက် မြို့ မဈေးနှင့် ပျံကျဈေး ၂နေရာ ခွဲထားကာ မနက် ၅နာရီ မှ နေ့လည် ၁၂နာရီထိသာ ဈေးရောင်းချသွားမည် ဖြစ်ပြီး၊ ဈေးဝယ်သည့်အခါ ကဒ်ပါမှသာ ဈေးဝယ်ခွင့် ပေးသွားမည် ဖြစ်ကြောင်း မြို့နယ် အုပ်ချုပ်ရေးမှူး ဦးသန်းလွင် က သျှမ်းသံတော်ဆင့် ကိုပြောသည်။

“ကဒ်ထုတ်ပေးရတဲ့ ရည်ရွယ်ချက်က ဈေးကိုသွားပြီးတော့ လူစုလူဝေး ဖြစ်တာကို လျှော့ချဖို့ အဓိကပဲ” ဟု လွိုင်လင်မြို့နယ် အုပ်ချုပ်ရေးမှူး ဦးသန်းလွင် ကပြောသည်။

ဈေးရောင်းချသူ နှင့် ဈေးဝယ်သူများသည်လည်း Mask (နှာခေါင်းစည်း) တပ်ဆင်ခြင်း နှင့် လက်အိတ်များ အသုံးပြုခြင်း ဖြင့် ဈေးရောင်း ဈေးဝယ်ပြုလုပ်ကြရမည်ဖြစ်ကြောင်း သိရသည်။

ဈေးသွားသည့် အခါ စနစ်တကျဖြစ်ရန် နှင့် ကိုဗစ်-၁၉ ကို ကာကွယ်ရန်အတွက် လူစုလူဝေး မဖြစ်အောင်၊ ကာကွယ်သည့်အနေဖြင့် ပြလုပ်ခြင်းဖြစ်ကြောင်း လွိုင်လင်မဲဆန္ဒနယ်အမှတ် (၂) လွှတ်တော်ကိုယ်စားလှယ် နန်းမြထွေး က သျှမ်းသံတော်ဆင့် ကိုပြောသည်။

“ ဈေးအဝင်တွင် သက်ဆိုင်ရာက ဈေးဝယ်ခွင့်ကဒ်ကို စစ်ဆေးပြီးမှ ပေးဝင်မှာပါ။ မပါရင်တော့ ဈေးဝယ်လို့ မရဘူး” ဟု နန်းမြထွေး က ဆိုသည်။

ဆက်လက်ပြီး ဈေးအဝင် ဂိတ်များတွင် တာဝန်ရှိသူများမှ Mask(နှာခေါင်းစည်း) တပ်ဆင်ခြင်း၊ လက်အိတ်စွပ် ခြင်း၊ လက်ဆေးခြင်း နှင့် အဖျားတိုင်းခြင်းတိုပြုလုပ်သွားမည် ဟု သိရသည်။

တစ်အိမ်လျင် ဈေးဝယ်ခွင့် ကဒ် (၁) ကဒ် ဖြင်သာ ဈေးသွားခြင်းဖြင့် မလိုအပ်ပဲ လူစုလူဝေး ဖြစ်ပေါ်မှုကိုရှောင်ရှားနိုင်မည်ဖြစ်ရာ ၎င်းကာကွယ်ရေးမှာ ထိရောက်မှု များစွာ ရှိမည်ဖြစ်ကြောင်း COVID-19 ကာကွယ်ရေး တက်ကြွလှုပ်ရှားသူ ပင်လုံဒေသခံ စိုင်းဆု ကပြောသည်။

သက်ဆိုင်ရာ က ထုတ်ပေးသည့် ဈေးဝယ်ခွင့်ကဒ်မပါဘဲ နေအိမ်မှ အကြောင်းမဲ့ထွက်သည်ကိုတွေ့ရှိ ပါက လိုအပ်သလို အရေးယူသွားမည်ဖြစ်ကြောင်း သိရသည်။

မြန်မာနိုင်ငံတွင် ကိုဗစ်-၁၉ ကာကွယ် ထိန်းချုပ်သည့် အနေဖြင့် လူ ၅ဦးထက် ပိုမစုဝေးရဟု ကျန်းမာရေးနှင့် အားကစားဝန်ကြီးဌာနက လည်း ယမန်နေ့ည ၈နာရီတွင် ထုတ်ပြန်ခဲ့သည်။