လက်ရှိဖြစ်ပေါ်နေသည့် COVID-19 ကာကွယ် ထိန်းချုပ်ရန် သျှမ်းပြည် ခရီးသည် ပို့ဆောင်ရေး လုပ်ငန်းများ ယာယီရပ်ဆိုင်းဆိုသည့် သတင်း လူမှုကွန်ရက်တွင် ပျံ့နှံ့ခဲ့သည်။

အဆိုပါသတင်းမှာ ဧပြီလ ရ ရက်မှ ၂၁ ရက်နေ့အထိ ခရီးသွားလာမှုကိုယာယီရပ်ဆိုင်းထားမည်ဖြစ်ကြောင်း
သျှမ်းပြည် COVID-19 ကာကွယ်၊ထိန်းချုပ် ကုသရေး ပြည်နယ် အဆင့် ကော်မတီ က ထုတ်ပြန်သည့် ကြေငြာချက်ဖြစ်ကြောင်း သိရ သည်။

သျှမ်းပြည် အတွင်းရှိ ပြည်သူများအနေဖြင့် အခြား ပြည်နယ်နှင့်တိုင်း ဒေသကြီးများသိုဆေးကုသရန် နှင့် နာရေးကိစ္စမှ လွှဲပြီး ခရီးသွားလာ မည်ဆိုပါက သျှမ်းပြည် COVID-19 ကာကွယ်၊ထိန်းချုပ် ကုသရေး မြို့နယ် အဆင့်လုပ်ငန်း ကော်မတီ ၏ထောက်ခံချက် ရယူပြီးမှ သွားလာကြရန်လည်း ထုတ်ပြန်ချက်တွင် ရေးသားထားသည်။

သို့သော် ထုတ်ပြန်ချက် သည် တရားဝင် ထုတ်ပြန်ချက် မဟုတ်သေးသော်လည်း သျှမ်းပြည် အစိုးရ အဖွဲ့ က အမျိုးသားအဆင့် ဗဟို ကော်မတီ ထံစာတင်ထားဆဲဖြစ်သည် ဟု သျှမ်းပြည် အစိုးရ က သျှမ်းသံတော််ဆင့် ကို ပြောသည်။

“တရားဝင် မထုတ်ပြန်သေးဘူး ပြည်နယ်အစိုးရအနေနဲ့ အဲ့ဒါတွေ လုပ်ဖို့ ရည်ရွယ်ထားပြီးတော့ အမျိုးသားအဆင့် ဗဟိုကော်မတီမှာတင်ထားဆဲပဲ ရှိသေးတယ်။ ဗဟိုကော်မတီကနေ ခွင့်ပြုလာရင်တော့ သျှမ်းပြည် တပြည်လုံးကို အကြောင်းကြားလိုက်ရင်တော့ အကြုံးဝင်တာပေါ့” ဟု သျှမ်းပြည်နယ်အစိုးရအဖွဲ့ လူမှုရေးဝန်ကြီး ဒေါက်တာမျိုးထွန်း က သျှမ်းသံတော်ဆင့် ကိုပြောသည်။

လွန်ခဲ့သည့် ရက်ပိုင်းက ပဲခူးတိုင်း ဒေသကြီး ပေါက်ခေါင်းမြို့တွင် မိသားစု ၄ဦး COVID-19 ကူးစက်ခံရခြင်းသည် ပြည်တွင်း ကူးစက်မှု အနေအထားဖြစ်သည် ဟု ဒေါက်တာ မျိုးထွန်း က ပြောသည်။

ထို့ကြောင့် ခရီးသွားလာမှု ယာယီရပ်ဆိုင်းခြင်းသည် COVID-19 ပြည်တွင်း ကူးစက်မှု ကို ကြိုတင်ကာကွယ်နိုင်ရန် ရည်ရွယ်ခြင်း ဖြစ်ကြောင်း ဒေါက်တာ မျိုးထွန်း က ထပ်လောင်း ပြောသည်။

ခရီးသွားလာမှု ကို ကန့်သတ်လိုက်ပါက COVID-19 သိသိသာသာ ကျဆင်းသွားမည် ဟု ပြည်နယ် အထူးရောဂါ နိမ်နင်းရေး ဌာန လက်ထောက် ညွှန်ကြားရေးမှူး ဒေါက်တာ နှင်းအိဖြူ က သျှမ်းသံတော်ဆင့် သို့ပြောသည်။

“ ခရီးသွားလာတာကို ကန့်သတ်လိုက်မယ်။ အိမ်မှာပဲနေမယ်ဆိုရင်တော့ ကူးစက်မှုနှုန်းကိုတော့ ကာကွယ်ပြီးသားဖြစ်တာပေါ့။ လျှော့ချနိုင်ဖို့ ပိုကောင်းတယ် လူတိုင်းသာ အိမ်မှာနေမယ်ဆို့ရင် ဒီရောဂါ ဖြစ်ပွားမှုက သိသိသာသာ ကျသွားမှာပေါ့’’ ဟု ဒေါက်တာနှင်းအိဖြူ က သျှမ်းသံတော်ဆင့် ကိုပြောသည်။

ပြည်သူများအနေဖြင့် “ Stay at Home” အိမ်မှာပဲနေစေချင်ကြောင်း ဒေါက်တာ နှင်းအိဖြူ က ပြောဆိုလိုက်သည်။

ဆက်လက်ပြီး ယာယီပိတ်ဆိုင်းမည့်ရက်များ၌ ဟိုတယ်များ၊ တည်းခိုခန်းများ၊ အများပြည်သူများ ရေတံခွန်များ ယာယီပိတ်ထားရန်လည်း ထုတ်ပြန်ချက်တွင် ဖော်ပြထားသည်။

မကြာမီ သင်္ကြန် ရက်ရှည် ရုံးပိတ်ရက် များရောက်ရှိပါက အများပြည်သူ အပန်းဖြေခရီးထွက်ခြင်း၊ ဘုရားဖူးခြင်း များကို သွားလာလည်ပတ်ခြင်းမပြုလုပ်ရန်လည်း သျှမ်းပြည် အစိုးရ က ပြောဆိုလိုက်သည်။

ပြည်သူများအနေဖြင့် မိမိနေအိမ်တွင် နေထိုင်ကြပြီး၊ မလိုအပ်ပါက အပြင်လုံးဝ မထွက်ရန် နှင့် မဖြစ်မနေ ထွက်ရပါက နှာခေါင်းစည်း (Mask) တပ်ဆင်ပြီး မှသာ ထွက်ကြရန် လည်း သိရသည်။