မြန်မာ-တရုတ်နယ်စပ် မူဆယ်မြို့ ရှိ မင်္ဂလာ မူဆယ် အနီးတွင် ယနေ့မနက်ပိုင်းက အမျိုးသား တဦး သေန တ်ပစ်သတ်ခံရကြောင်း သတင်းရရှိသည်။
မတ်လ ၂၆ ရက် မနက် ၉ နာရီခွဲအချိန်ခန့်က မင်္ဂလာ မူဆယ် အနီး မြေဖို့ (မြေညှိ)နေသည့်ဘက်ဟိုးကားမောင်းသူများ၏ မန်နေဂျာ အသက် ၅၂ အရွယ် ဦးစိုးမောင် ကို အမည်မသိ လက်နက်ကိုင် ၃ ဦးက သေနတ်ဖြင့် ပစ်ခတ်သွားကြောင်း မူဆယ် ဂရုဏာ လူမှုကူညီရေး အသင်း မှ ဦးသောင်းထွန်း က သျှမ်းသံတော်ဆင့် သို့ပြောသည်။
“ မနက် ၉ နာရီခွဲ မှာ ပစ်ခံရတာ။ ပွဲချင်းပြီး တော့ သေတာမဟုတ်ဘူး။ ဆေးရုံ ရောက်ပြီး ၁ နာရီလောက်ကြာတော့ သေသွားတာ။ ဘယ်သူလာပစ်တယ်ဆိုတာ မသိသေးဘူး” ဟု ဦးသောင်းထွန်း ကပြောသည်။
အဆိုပါ ကိစ္စနှင့် ပတ်သက်ပြီး မူဆယ်မြို့မ ရဲစခန်းကို သျှမ်းသံတော်ဆင့် က ဆက်သွယ်မေးမြန်းသည့် အခါ တာဝန်ကျ ရဲတဦးက “ မနက်က မင်္ဂလာ မူဆယ်မှာ အမျိုးသားတယောက် သေနတ်ပစ်ခံရတာ ဟုတ်ပါတယ်။ သေသွားပြီ။ တရားခံကတော့ ခုထိ မမိသေးဘူး” ဟု သျှမ်းသံတော်ဆင့် သို့ ပြောသည်။
လက်ရှိ ဖြစ်ပွားသည့်နေရာသည် တရုတ်ပြည် နယ်စပ်ဖြစ်သည့် အလျောက် တရားခံများ တရုတ်ပြည်ဘက် ထွက်ပြေးသွားနိုင်ကြောင်းလည်း အဆိုပါ ရဲက ပြောသည်။
သေနတ်ပစ်ခံရ သူသည် ကျောက်မဲမြို့တွင် နေထိုင် သူတဦးဖြစ်ပြီး ယခင်က ကျောက်မဲမြို့ မိုင်းတင်းကျေးရွာ အုပ်ချုပ်ရေးမှူးဟောင်း ဖြစ်ခဲ့ဖူးသည်ဟု ကျောက်မဲ ဒေသခံ များပြောပြချက် အရသိရသည်။
Leave a Comments