သျှမ်းပြည် မြောက်ပိုင်း သီပေါမြို့ ပြည်သူ့ဆေးရုံတွင် Covid-19 စောင့်ကြည့် လူနာ အမျိုးသား တဦး ရောက်ရှိနေကြောင်း သတင်းရရှိသည်။
အဆိုပါ လူနာသည် ယမန်နေ့ (မတ် ၁၆ )ရက်တွင် တရုတ်နိုင်ငံ ကွမ်းတုံပြည်နယ် ဟွေကျိုးမြို့၌ အလုပ်လုပ်ပြီး ပြန်လာသည့်သူတဦးဖြစ်ကြောင်း ရောက်လာစဉ်တွင် ကိုယ်အပူချိန်မြင့်မားပြီး ဖျားနေသည်ကို ပတ်ဝန်းကျင် မှ ကျန်းမာရေး ဝန်ထမ်းများကို အကြောင်းကြားလာသဖြင့် သွားရောက်ခေါ်လာကြောင်း သီပေါမြို့ ပြည်သူ့ဆေးရုံအုပ် ဒေါက်တာ နန္ဒဝင်းက သျှမ်းသံတော်ဆင့် သို့ ပြောသည်။
“ မနေ့က မှ ပြန်ရောက်လာတာပါ။ သူက လာပြလို့သိရတာမဟုတ်ပါဘူး။ မနေ့က သူ့ကို သယ်တဲ့ ဆိုင်ကယ်သမားက အကြောင်းကြားလာတဲ့အတွက် ကျနော်တို့ သွားခေါ်လာတာပါ။ ဆေးစစ်ချက်တွေပြုလုပ်နေပါပြီ။ အခု သီးသန့်ခန်းမှာ ထားပါတယ်” ဟု ဒေါက်တာ နန္ဒဝင်း ကဆိုသည်။
ယမန်(မတ် ၁၆) ရက် ည ၇နာရီ တွင် Express ကားတစီးဖြင့် သီပေါမြို့သို့ ပြန်လာသည့် သူဖြစ်ကြောင်း သိရသည်။
ထို့ပြင် စောင့်ကြည့်ခံရ လူနာ နှင့် ထိတွေ့ခဲ့သည့် ဆိုင်ကယ် တက္ကစီ သမား နှင့် မိသားစုဝင်များကို လူနာဆေးစစ်အဖြေ မထွက်မချင်း (Home quarantine) အိမ်ထဲတွင် ခေတ္တ ထိန်းသိမ်းထားကြောင်း ဒေါက်တာ နန္ဒဝင်း က ပြောသည်။
လက်ရှိ VOCID-19 လူနာသည် ကျန်းမာရေး ဌာနမှ သွားရောက်စစ်ဆေးပြီး တွေ့ရှိလာသည့် လူနာမဟုတ်ကြောင်း၊ ပြည်သူလူထုထဲမှ သတင်းပေးသည့် စနစ်မှ တွေ့ရှိလာသည့် စောင့်ကြည့်လူနာဖြစ်ကြောင်း၊ ပြည်သူများအနေဖြင့် သံသယရှိ လူနာများတွေ့ရှိပါက သက်ဆိုင်ရာ ကျန်းမာရေး ဌာန သို့သတင်းပေးရန် လိုအပ်ကြောင်းလည်း ဒေါက်တာနန္ဒဝင်း က ပြောသည်။
Vocid-19 သည် တရုတ်နိုင်ငံ ဝူဟန်ပြည်နယ် မှ စတင်လာသည့် အဆုတ်ရောင် ကူးစက်မြန်ရောဂါဖြစ်ပြီး လက်တလောမှာ နိုင်ငံပေါင်း ၁၅၆နိုင်ငံ ကူးစက်ခံနေရပြီး၊ ကူးစက်ခံရသူဦးရေမှာ (၁၈၃၀၅၅)ဦးရှိပြီး၊ သေဆုံးသူဦး (၇၄၁၅) ဦး ရှိကြောင်း South China Morning Post ၏ သတင်းရေးသားချက်အရ သိရသည်။
မြန်မာနိုင်ငံတွင် လက်ရှိ အချိန်ထိ Vocid-19 ကူးစက်ခံရသူ ဦးရေ မရှိသေးသော်လည်း Vocid-19 သည် ကူးစက်မြန်သည့် ရောဂါဖြစ်သဖြင့် လူစုလူဝေးများသည်နေရာ၊ ပွဲလမ်းသဘင်များ မပြုလုပ်ရန်လည်း သက်ဆိုင်ရာ အသီးသီးက ထုတ်ပြန်ချက် ထုတ်ထားသည်။
