တရုတ်နိုင်ငံတွင်စတင်သည့် ကိုရိုနာကူးစက်မြန်ရောဂါကြောင့် သျှမ်း-တရုတ်နယ်စပ်ဂိတ်များတွင် သျှမ်းပြည်ထွက် သစ်သီးဝရံ များ ရောင်းအားကျကာ ခေတ္တပိတ်သိမ်းထားရာမှ ယခု အပတ်အတွင်း ရောင်းဝယ်အားပြန်ကောင်းလာကြောင်း သိရှိရသည်။

ဖေဖေါ်ဝါရီလ နှောင်းပိုင်းမှ စ၍ ယနေ့အထိ တရုတ်နယ်စပ် သျှမ်းပြည်မြောက်ပိုင်း မူဆယ်မြို့ ၁၀၅ မိုင် သစ်သီးဒိုင်၊ သစ်သီးဝရံစျေး တွင် တရုတ်နိုင်ငံမှ သစ်သီးများ ပြန်လည်ဝယ်ယူသောကြောင့် ပျက်နေသည့် သစ်သီးစျေး ရောင်းအားပြန်ကောင်းလာသည်ဟု ဆိုသော်လည်း ယခင်ကဲ့သို့ စျေးမကောင်းသေးကြောင်း တာဝန်ခံများကပြောသည်။

၁၀၅ မိုင် သစ်သီးစျေး ဥက္ကဌ စိုင်းခင်မောင်က – “ကျနော်တို့ ၁၀၅ မိုင် သစ်သီိးစျေးမှာ တရုတ်ပြည်ဘက်ကလူတွေ တော်တော်များများပြန်ဝယ်နေပါပြိီ။ ဒါပေမယ့် စျေးကတော့ နည်းနေတုန်းပါပဲ။ အရင်လို စျေးကောင်းပြန်မရသေးပါဘူး။” – ဟုပြောသည်။

ကိုရိုနာဗိုင်းရပ်စ် ကိုဝစ် ၁၉ ကူးစက်ပျံ့ပွားမှု ကြောင့် စျေးပျက်သွားသော သစ်သီးဝရံများ ယခု ရောင်းအားပြန်မြင့်လာမှုကြောင့် ဖေဖေါ်လလယ်ပိုင်းမှ စ၍ ဖရဲသီး တင်ကား ၁၅၀ စီးအထက် ၊သခွားမွှေး တင်ကား ၁၀၀ စီးအထက် ရှိသည်ဟု သိရသည်။

ဖော်ဖေဝါရီ ၇ မှ ဖော်ဖေဝါရီ ၂၀ အတွင်းမှာ ကိုရိုနာဗိုင်းရပ်စ်ရောဂါပျံ့ပွားမှုကြောင့် သစ်သီးခြံပိုင်ရှင် သစ်သီးပွဲရုံ ပွဲစားများ အရှုံးပေါ်ကြောင်း ကပ်ရောဂါ စတင်ချိန်မှ ယနေ့အထိ ဒေါ်လာ သန်း ၅၀ ထက်မနည်းဆုံးရှုံးကြောင်း စိုင်းခင်မောင်က ပြောသည်။

ကျောက်ပွဲစား နန်းအေးပိန်းက – “မြန်မာနိုင်ငံကလူတွေ တရုတ်ပြည် ပြန်ဝင်ပြီး အလုပ်လုပ်တာ သောင်းချီပြီးတော့မရှိသေးပါဘူး။တရုတ်ပြည်ဘက်ကလူတွေ ရောဂါကိုကြောက်နေတုန်းပါပဲ။ အဝတ်အစားရောင်းဝယ်ရေးကိုတော့ ပိတ်ထားတာ ကြာပါပြီ ခုထိ ပြန်မဖွင့်သေးပါဘူး” – ဟုပြောသည်။

တရုတ်မြန်မာ နယ်စပ် သျှမ်းပြည်မြောက်ပိုင်း မူစယ်မြို့ ကုန်သွယ်ရေးဂိတ်ဖြစ်သည့် ဆင်ဖြူဂိတ်၊ မန်ဝိန်းဂိတ်နှင့် နန်းတော်ဂိတ် တို့တွင် ပုံမှန်ကာလကဲ့သို့ နယ်ခြားဂိတ်တခါး ဖွင့်ထားသော်လည်း တရုတ်အာဏာပိုင်များဘက်မှ ကြပ်မတ်စစ်ဆေးမှု အထူးပြုလုပ်နေကြောင်း၊ တရုတ်နိုင်ငံ အတွင်း စက်ရုံများလည်း ပြန်မဖွင့်နိုင််သေးသည့် အတွက် မြန်မာရွှေ့ပြောင်းအလုပ်သများ အခက်အခဲ ကြုံတွေ့နေရဆဲဖြစ်ကြောင်း သိရသည်။

၀ူဟန် အမည်ရ ကပ်ရောဂါ ကိုရိုနာဗိုင်းရပ်စ် မြန်မြန်ဆန်ဆန် ကူးစက်မှုကြောင့် ရောဂါပိုး ကူးစက်ခံရသူ ၈၅၁၇၆ ဦး၊ သေဆုံးသူ ၂၉၁၉ ဦး၊ ပြန်လည်ကောင်းမွန်လာသူ ၃၉၄၃၁ ဦးရှိသည်ဟု South China Morning Post ထုတ်ပြန်ထားသော သတင်းအရ သိရသည်။

(ယိင်းယိင်း ရေးသားပေးပို့သည်)