သျှမ်းပြည်မြောက်ပိုင်း လားရှိုးမြို့ ပြည်သူ့ဆေးရုံတွင် Novel Corona Virus (နိုဗယ်လ် ခိုရိုနာ ဗိုင်းရပ်စ်) ကူးစက်မြန် အဆုတ်ရောင် ရောဂါ သံသယ ရှိသူ တဦး ဆေးကုသခံနေကြောင်း သတင်းရရှိသည်။

ဖြစ်စဉ်မှာ လောက်ကိုင်မြို့ နယ်တွင် နေထိုင်သည့် အသက် (၁၇)အရွယ် အမျိုးသမီးသည် တရုတ်နိုင်ငံသို့ ဆေးကုသပြီး ပြန်ရောက်လာကာ ဖေဖော်ဝါရီ ၉ ရက်နေ့တွင် ကိုယ်အပူချိန်မြင့်တက်ခြင်း၊ ခွဲစိတ်ထားသည့် ချုပ်ရိုးမှ ပြည်များစိမ့်ထွက်ခြင်း ဖြစ်ခဲ့သည်။

ထိုခွဲစိတ်မှု နောက်တွဲ ပြဿနာကြောင့် ဖေဖော်ဝါရီ ၁၃ရက်နေ့တွင် လားရှိုးမြို့ပြည်သူ့ဆေးရုံကြီးသို့ ကုသမှု ခံယူရာ လူနာသည် တရုတ်နိုင်ငံ မှ ပြန်လာသည့်အတွက် ခိုရိုနာ ဗိုင်းရပ်စ် ရှိ၊ မရှိ သေချာအောင် သီးခြားထားပြီး ဆေးကုသပေးနေကြောင်း အားကစားနှင့် ကျန်းမာရေး ဝန်ကြီးဌာန ထုတ်ပြန်ချက်တွင်ရေးထားသည်။

ထို့ကြောင့် တရုတ်နိုင်ငံမှ ပြန်လာသည့် လူနာ ထံ ခိုရိုနာ ဗိုင်းရပ်စ် ရှိ၊ မရှိ ဓာတ်ခွဲ စစ်ဆေးရန်စီစဉ် ဆောင်ရွက်နေကြောင်း လည်း ထုတ်ပြန်ချက်တွင်ဖော်ပြထားသည်။

သျှမ်ပြည် တောင်ပိုင်း စဝ်စံထွန်း ဆေးရုံတွင် ခိုရိုနာ သံသယ ရှိသူ ၁ဦး၊ မောက်မယ် မြို့နယ် ပြည်သူ့ဆေးရုံတွင် ခိုရိုနာ သံသယရှိသူ ၄ဦးရှိသည်။

ဖေဖော်ဝါရီ ၁၃ရက် ည ၈နာရီ အချိန်ထိ မြန်မာနိုင်ငံတွင် ခိုရိုနာ သံသယ ရှိ လူနာ (၁၈) ဦးရှိပြီး သက်ဆိုင်ရာ ဆေးရုံများတွင် စောင့်ကြပ် ကြည့်ရှု့ ကုသမှုပေးနေကြောင်း သိရသည်။

တရုတ်နိုင်ငံ ဝူဟန်မြို့ မှ စတင်ဖြစ်ပွားသည် ခိုရိုနာ ဗိုင်းရပ်စ် ကူးစက်မြန် အဆုတ်ရောဂါသည် ကမ္ဘာ့ နိုင်ငံပေါင်း ၂၈ နိုင်ငံ ပြီး ကူးစက်ခံရသူ ၆၄၀၀၀ ကျော်ရှိပြီး၊ ဖေဖော်ဝါရီ လ ၁၄ရက် မနက်ပိုင်းထိ သေဆုံးသူ ၁၄၈၃ဦး ရှိလာကြောင်း သိရသည်။