သျှမ်းပြည် မြောက်ပိုင်း ကျောက်မဲမြို့နယ် အတွင်း ယမန်နေ့ မွန်းလွှဲပိုင်းတွင် တိုက်ပွဲဖြစ်ပွားမှုကြောင့် အမျိုးသမီး ၂ဦး ကျည်ထိမှန်သေဆုံးခဲ့ကြောင်း သတင်းရရှိသည်။

ဖြစ်စဉ်မှာ ယမန်နေ့ (ဇန်နဝါရီ ၂၈) တွင် မြန်မာ့တပ်မတော်နှင့် တအာင်း(ပလောင်) အမျိုးသားလွတ်မြောက်ရေး တပ်မတော်( TNLA)တို့ ကျောက်မဲမြို့နယ် ညောင်မောင်းကျေးရွာ အနီးတွင် တိုက်ပွဲဖြစ်ပွားကာ သားအမိ ၂ဦး ကျည်ထိမှန် ကာ ပွဲချင်းပြီးသေဆုံးခဲ့ကြောင်း ကျောက်မဲမြို့နယ် ဒေသခံများ ပြောပြချက် အရ သိရသည်။

“ မနေ့က သားအမိ ၂ဦး သေဆုံးတာ ဟုတ်ပါတယ်။ မနေ့က သားအမိ ၂ယောက်က လက်ဖက်ခြံသွားပြီး အပြန်မှာ တိုက်ပွဲဖြစ်တာနဲ့ ကြုံတာ။ အဲ့မှာကျည်ထိပြီး ပွဲချင်းပြီးပါပဲ” ဟု ကျောက်မဲမြို့ သျှမ်းမြောက်လူငယ်ကွန်ရက် မှ မိုင်းစောထွန်းထွန်းက သျှမ်းသံတော်ဆင့် သို့ ပြောသည်။

ယမန်နေ့ ညနေ ပိုင်းတွင် သားအမိ ၂ဦးဖြစ်သည့် ဒေါ်နန်းရွှေကျင်သည် အသက် ၄၂နှစ်ကျော် နှင့် သူမ၏ သမီး နန်းခမ်းအိမ်သည် အသက် ၁၂အရွယ်သာ ရှိသေးသည်။

ထိုသားအမိ ၂ဦးသည် လက်ဖက်ခြံမှ အပြန် တိုက်ပွဲကြားပိတ်မိကာ ကျည်ထိမှန်သေဆုံးခဲ့ကြောင်း၊ ထိုသေဆုံးသည့် သားအမိ ၂ဦးကို ညောင်မောင်းကျေးရွာတွင် ယနေ့ (ဇန်နဝါရီ ၂၉ ) ရက်တွင် သဂြိုဟ် မည် ဟု လည်း မိုင်းစောထွန်းထွန်း က ပြောသည်။

ဆက်လက်ပြီး ညောင်မောင်း ဒေသခံ တဦး ပြောပြချက် အရ “ မနေ့ က TNLA တပ်က ကျနော်တို့ ရွာမှာ လာနေတာ။ မြန်မာတပ်က တောင်ကုန်းပေါ်ကနေ လှမ်းပစ်တာ။ အဲ့ဒါနဲ့ ရွာက အိမ်တွေ ကျည်ထိတယ်။ နောက် သားအမိ ၂ယောက် ကျည်ထိ ပြီး ပွဲချင်းပြီ သေဆုံးသွားတယ်” ဟု သျှမ်းသံတော်ဆင့် သို့ ပြောပြသည်။

မြန်မာ့တပ်မတော်သည် ရွာပြင်မှ နေပြီး ညောင်မောင်းကျေးရွာ အတွင်းသို့လက်နက်ကြီးဖြင့် ပစ်ခဲ့သဖြင့် သားအမိ ၂ဦး နှင့် နေအိမ်များကျည်ထိမှန် ရခြင်းဖြစ်သည် ဟု ရှင်းပြသည်။

“ တိုက်ပွဲဖြစ်ရင် အဓိက အမျိုးသမီးတွေနဲ့ ကလေးငယ်တွေပဲခံရတာ။ မနေ့ က ကျည်ထိသေဆုံးတာလဲသားအမိ ၂ယောက်ပဲ။ အမျိုးသားတွေဆိုရင် ကိုယ်လွှတ်ရုံပြေးလို့ရပေမယ့် အမျိုးသမီးဆိုရင် အသက်ကြီးတဲ့သူတွေ ကလေးငယ်တွေကို ငဲ့ရတယ်” ဟု ကျောက်မဲမြို့ နန်းမွေဆိုင် က သျှမ်းသံတော်ဆင့် သို့ပြောသည်။

တိုက်ပွဲဖြစ်ပွားခဲ့သည့် ကျောက်မဲမြို့နယ် ညောင်မောင်းကျေးရွာ အနီး နေထိုင်သည့် သူများသည် ဗုံးခိုကျင်းများဆောက်လုပ်ထားခြင်းမရှိကြောင်း၊ လက်နက်ကိုင် တပ်ဖွဲ့ များအနေဖြင့် ပြည်သူများနေထိုင်သည့် ကျေးရွာ အနီးပတ်ဝန်းကျင်တွင် တိုက်ပွဲမဖြစ်စေချင်ကြောင်း လည်း နန်းမွေဆိုင် က ပြောဆိုလိုက်သည်။

ယမန်နေ့ဖြစ်ပွားသည့် တိုက်ပွဲကြောင့် ညောင်မောင်းကျေးရွာ နေအိမ်တချို့ ပျက်စီးမှု ရှိခဲ့ကြောင်းလည်း ဒေသခံများ ပြောပြချက် အရသိရသည်။

TNLA နှင့် မြန်မာ့တပ်မတော်တို့သည် ကျောက်မဲမြို့နယ် ညောင်မောင်းကျေးရွာအနီး ယမန်နေ့ ညနေ ၃နာရီ ၁၅မိနစ်တွင် တိုက်ပွဲဖြစ်ပွားခဲ့ကြောင်း TNLA ထုတ်ပြန်ချက်တွင် ရေးသားထားသည်။

ထိုတိုက်ပွဲကြောင့် ဒေါ်နန်းရွှေကျင် တို့ သားအမိ ၂ဦး ကျည်ထိမှန်သေဆုံးသည့် ကိစ္စနှင့် ပတ်သက်ပြီး သျှမ်းသံတော်ဆင့် မှ TNLA ပြောခွင့်ရပုဂ္ဂိုလ်နှင့် မြန်မာ့တပ်မတော်မှ သတင်းမှန် ပြန်ကြားရေး ကို ဆက်သွယ်ခဲ့ရာ ပြန်လည်ဖြေကြားခြင်းမရှိခဲ့ပေ။