တရုတ်- မြန်မာ နယ်စပ် မူဆယ်မြို့ သို့ လာရောက်လည်ပတ်မည့် တရုတ်နိုင်ငံသား ထောင်ချီ သည် ခရီးစဉ်ဖျက်သိမ်းလိုက်ကြောင်း သတင်းရရှိသည်။

ယခုနှစ် တရုတ်နှစ်သစ်ကူးကာလ အတွင်း တရုတ်နိုင်ငံတွင် ဖြစ်ပွားနေသည့် ဝူဟန် ဗိုင်းရပ်(စ်) ရောဂါကြောင့် တရုတ် မြန်မာ နယ်စပ် မူဆယ်သို့ လာရောက်လည်ပတ်မည့် တရုတ်နိုင်ငံသာများ ခရီးစဉ် ဖျက်သိမ်းမှု ရှိသည် ဟု မူဆယ်မြို့ခရီးသွားလုပ်ငန်းလုပ်ဆောင်နေသည့်သူများထံ သိရသည်။

“ ဒီလို အချိန်မှာ မူဆယ်၊ နမ့်ခမ်း ကို လည်ပတ်မယ့် တရုတ်နိုင်ငံသားတွေ ၇ထောင်၊ ၈ထောင်လောက်ရှိတယ်။ ဒီနှစ် အတွက်လည်း ၄ထောင် လာဖို့ ပြောထားတယ်။ ဒါပေမယ့် ခရီးစဉ်က ဖျက်သိမ်းလိုက်ရတယ်” ဟု ခရီးသွားလုပ်ငန်းလုပ်နေသူ စိုင်းလှ က ပြန်ပြောပြသည်။

ယခင်နှစ် တရုတ်နှစ်သစ်ကူးကာလတွင် မူဆယ်မြို့နယ် အတွင်းလာရောက်လည်ပတ်သည့် တရုတ်လူမျိုး တရက်လျှင် တသောင်းနီးပါး ရှိသည် ဟု သိရသည်။

အသက်ရှူလမ်းကြောင်း ကြပ်မှု နှင့် အဆုပ်ရောင် (ဝူဟန် ဗိုင်းရပ်စ်) ထိန်းချုပ်ရန် အတွက် ဇန်နဝါရီ ၂၆ရက်နေ့မှ စတင်ကာ တရုတ်နိုင်ငံ ယူနန်ပြည်နယ် ရွှေလီမြို့ တွင် ပန်းခြံ၊ ဟိုတယ် နှင့် ခန်းထိုက် ကစားဝိုင်းများအားလုံးကို ယာယီ ပိတ်ထားကြောင်းလည်း တရုတ် အစိုးရ က ကြေညာချက်ထုတ်ခဲ့သည်။

“ တရုတ်ဘက်က လည်စရာတွေ၊ အားလုံးမနေ့က စပိတ်တယ်။ နှစ်ပြည် တရွာ လည်တဲ့နေရာလည်း ပိတ်လိုက်ပြီ။ မနှစ်က ဒီလိုအချိန်ဆို တရက်တည်း တသောင်းကျော်ထိ လာလည်ကြတယ်” ဟု စိုင်းလှ က ထပ်လောင်းပြောပြသည်။

တရုတ်- မြန်မာ မူဆယ်မြို့နယ် အတွင်း ရှိ နယ်စပ်ဂိတ်များဖြစ်သည့် ဆင်ဖြူဂိတ်၊ ရွှေနန်းတော် ဂိတ်၊ မန့်ဝိန်းဂိတ် နှင့် ပန်ဆိုင်း (ဝမ်တိန်ဂိတ်) တို့ကို ယနေ့ အချိန်ထိ ဖွင့်လှစ်ထားကြောင်းလည်း မူဆယ်မြို့ဒေသခံများက ဆိုသည်။

“ ဂိတ်တွေကတော့ ဖွင့်နေသေးတယ်။ ဝင်၊ထွက်သွားလာတာကတော့ နည်းသွားတယ်။ ဂိတ်တွေမှာတော့ ကျန်းမာရေ စစ်ဆေးတာတွေ ရှိတယ်” ဟု မူဆယ်မြို့တောင်ရပ်ကွက် ဒေသခံ စိုင်းအွမ်ခေး က ပြောသည်။

ယခုကာလသည် တရုတ်နှစ်သစ်ကူး ကာလဖြစ်သည့် အတွက် နယ်စပ်ကုန်သွယ်မှု ထိခိုက်မှု သိပ်မရှိသေးသော်လည်း တနိုင်တပိုင်း ဈေးသည်များအတွက် အနည်းငယ် ထိခိုက်မှုရှိကြောင်း လည်း စိုင်းအွမ်ခေး က ဆိုသည်။

လက်ရှိ နယ်စပ် ဒေသ မူဆယ်၊ နမ့်ခမ်း တလျောက် ဝူဟန် ဗိုင်းရပ်(စ်) ကာကွယ်ရေး အတွက် သက်ဆိုင်ရာ ကျန်းမာရေး ဌာန က ပညာပေးမှု အားနည်းအတွက် ဒေသခံများ စိုးရိမ်မှု များရှိနေကြောင်းလည်း သိရသည်။

ဝူဟန်ဗိုင်းရပ်(စ်) ရောဂါများ ကာကွယ်ရန် အတွက် သျှမ်းပြည် အရှေ့ပိုင်း အထူးဒေသ (၄) မိုင်းလား ကလည်း ကစားပျော်ရွှင်သည့် နေရာများ ကို ယာယီရပ်နားထားကြောင်း၊ အကပဒေသာဖျော်ဖြေခြင်း၊ ပျော်ပွဲ ရွှင်ပွဲ ကျင်းပခြင်းနှင့် ဘာသာရေး ဆိုင်ရာ လုပ်ငန်းများ ကျင်းပခြင်း တို့ကို ဖျက်သိမ်းရန် ကြေညာချက်ထုတ်ပြန်ခဲ့သည်။

ထို့ပြင် မြို့ မဈေးနှင့် စားသောက်ဆိုင် များတွင် တောရိုင်းတိရိစ္ဆာန် ရောင်းချခြင်းများ မပြုလုပ်ရန်လည်း ဇန်နဝါရီ ၂၆ရက် ထုတ်ပြန်သည့် ကြေညာချက်တွင်ရေးသားထားသည်။

ယနေ့အချိန်ထိ တရုတ်နိုင်ငံ တွင် ဝူဟန်ရောဂါကူးစက်သည့် သူ ၂၇၄၄ဦး ရှိပြီး၊ သေဆုံးသူ ၈၀ ဦး ရှိကြောင်း တရုတ် အစိုးရ ထုတ်ပြန်ချက် အရ သိရသည်။