မူဆယ်မြို့နယ် ထိန်းချုပ်ဓာတုပစ္စည်းများ သိမ်းဆည်းရ၊တရားခံ လွှတ်မြောက်

သျှမ်းပြည် မြောက်ပိုင်း မူဆယ်မြို့ နယ် ပန်ခမ်းကျေးရွာ အုပ်စု နောင်ရမ်းကျေးရွာတွင် မူးယစ်ဆေးဝါး ချက်ရာတွင် အသုံးပြုသည့် ဓာတု ပစ္စည်း များ သိမ်းဆည်းရပြီး၊ တရားခံ လွှတ်မြောက်နေကြောင်း သတင်းရရှိသည်။

ဖြစ်စဉ်မှာ ယမန်နေ့ (ဇန်နဝါရီ ၂) ရက် နေ့လည် ၂နာရီတွင် မူဆယ်မြို့နယ် နောင်ရမ်းကျေးရွာတွင် ချင်ဆင်းချန်း ငှားရမ်းထားသည့် ဂိုဒေါင် အတွင်း သံပေပါများဖြင့်ထည့်ထားသည့် 1-Phenyl-2-Propanol ၁၆၀ လီတာ၊ Benzyl Cyanide ၈၀၀၀ လီတာ၊ 1,2 Dichloroethane ၃၂၀ လီတာ TRIFLUOROACETIC ACID ၁၆၀ လီတာ ၊ Mixture of Methanol, Nitric acid ၆၀၀ လီတာ၊ 2-4 Dioxohexahydro 1,3,5 ၈၈၀ ကီလို၊ 1,3-DIBROMO 5,5-DIMETHYLHYDAN ၁၀၀ ကီလို တို့ကို သိမ်းဆည်းရမိကြောင်း မူးယစ်ရဲတပ်ဖွဲ့ ထုတ်ပြန်ချက် အရသိရသည်။

အဆိုပါ သိမ်းဆည်းရမိသည့် ထိန်းချုပ် ဓာတုပစ္စည်းများ၏ တန်ဖိုးငွေသည် ကျပ်သိန်း ၂၂၅သိန်းကျော်ရှိပြီး၊ ပိုင်ရှင် ချင်ဆင်းချန်းသည် ထွက်ပြေးလွှတ်မြောက်နေကြောင်း၊ တရားခံကို ဖမ်းဆီးရမိရေး အတွက် စုံစမ်းနေကြောင်းလည်း မူးယစ်ရဲတပ်ဖွဲ့ ထုတ်ပြန်ချက်တွင် ရေးသားထားသည်။

ထို့ပြင် မူးယစ်ဆေးဝါးချက်လုပ်ရာတွင်အသုံးပြုသည့် ဆက်စပ်ပစ္စည်းများနှင့် ဂိုဒေါင် အတွင်းရပ်ထားသည့် မော်တော်ယာဉ် ၁ စီးတို့အား တွေ့ရှိသိမ်းဆည်းရမိခဲ့သဖြင့် မူဆယ်မြို့မရဲစခန်းတွင် မူးယစ် ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာဥပဒေဖြင့် အမှုရေးဖွင့်ပြီး တရားခံဖမ်းဆီးရမိရေး စုံစမ်း စစ်ဆေးလျက်ရှိကြောင်း သိရသည်။