သျှမ်းပြည် မြောက်ပိုင်း နောင်ချိုမြို့နယ် အတွင်း ကျပ်သိန်း ၂၄၀၀ ကျော် တန်ဖိုးရှိ ထိန်းချုပ် ဓာတု ပစ္စည်းများ သိမ်းဆည်းရမိကြောင်း သတင်းရရှိသည်။

ဖြစ်စဉ်မှာ ယမန်နေ့(ဒီဇင်ဘာ ၁၀)ရက် ည ၅နာရီခွဲတွင် မန္တလေး-နောင်ချို ပြည်ထောင်စုလမ်းပေါ် ရှိ နောင်ချိုမြို့နယ် ခြေမြစ်ပင်ကျေးရွာ ၌ ရပ်ထားသည့် ၁၈ ဘီး မသင်္ကာသဖြင့် သွားရောက်စစ်ဆေးရာ ထိန်းချုပ်ဓာတု ဟိုက်ဒရိုကလိုရစ် အက်ဆစ် ၁၆၂၀၀ လီတာ ( ကာလပေါက်ဈေး ကျပ်သိန်း ၂၄၃၀) သိမ်းဆည်းရမိကြောင်း မူယစ်ရဲတပ်ဖွဲ့ ထုတ်ပြန်ချက် အရသိရသည်။

ဆက်လက်ပြီး ထိန်းချုပ်ဓာတု ဟိုက်ဒရိုကလိုရစ် အက်ဆစ် သယ်ဆောင်လာသည့် ကားကို စစ်ဆေးရာ ယာဉ်ပေါ် တွင် ပဲခူးတိုင်းဒေသကြီး၊ ကျောက်တံတားမြို့နယ်နေ သီဟအောင် ဖြစ်ကြောင်းသိရှိရပြီး၊ ယာဉ်မောင်း မှာ လွှတ်မြောက်နေကြောင်း မူးယစ်ရဲတပ်ဖွဲ့ ကပြောကြားသည်။

ထို သိမ်းဆည်းရမိသည့် ထိန်းချုပ်ဓာတု နှင့် ပတ်သက်ပြီး နောင်ချို မြို့မ ရဲစခန်းတွင် မူးယစ်ဆေးဝါး နှင့် စိတ်ကို ပြောင်းလဲစေသော ဆေးဝါးများဆိုင်ရာ ဥပဒေဖြင့် အမှုဖွင့် အရေးယူ ဆောင်ရွက်ထားပြီး၊ ထိန်းချုပ် ဓာတု ပစ္စည်းများ၏ ပိုင်ရှင် ဖြစ်သူကို ဖမ်းဆီးရမိရေး စုံစမ်းနေကြောင်း လည်း မူးယစ်ရဲတပ်ဖွဲ့ က ထုတ်ပြန်ချက်တွင် ရေးသားထားသည်။

ထို ထိန်းချုပ်ဓာတုပစ္စည်းများသည် တရုတ်နိုင်ငံမှ တင်သွင်းလာသည့် ပစ္စည်းများဖြစ်သည်။