သျှမ်းပြည် မြောက်ပိုင်း သီပေါမြို့နယ် အတွင်း အမျိုးသား ၃ဦး သေနတ် ဒဏ်ရာဖြင့် သေဆုံးမှု ဖြစ်ပွားကြောင်း သတင်းရရှိသည်။
ဖြစ်စဉ်မှာ ယနေ့(ဒီဇင်ဘာ ၂၈) မနက် ၈နာရီဝန်းကျင်တွင် သီပေါမြို့နယ် ကုံးမုံ ကျေးရွာ တွင် အမျိုးသား ၃ဦး ဒဏ်ရာဖြင့် သေဆုံးနေကြောင်း နယ်စည်းမခြား ပရဟိတ လူမှုကူညီရေး အသင်း (သီပေါမြို့) မှ ကိုမျိုးက သျှမ်းသံတော်ဆင့်သို့ပြောသည်။
“ မနက် ၈နာရီက သေနတ်ဒဏ်ရာနဲ့ အမျိုးသား ၃ဦး အလောင်းကို လာသယ်ဖို့ ဖုန်းဆက်လာတယ်။ ၂ဦးကတော့ ဦးခေါင်း ဒဏ်ရာပါ။ ၁ဦးကတော့ နံရိုးထိတယ်။ ၃ဦးစလုံးက လူလတ်ပိုင်းတွေပါ” ဟု ကိုမျိုး က ဆိုသည်။
အဆိုပါ သေနတ်ဒဏ်ရာဖြင့်သေဆုံးသည့် အမျိုးသား ၃ဦး ကို သီပေါမြို့ ပြည်သူ့ဆေးရုံ သို့ ပို့ဆောင်ထားကြောင်း၊ မည်သည့် အဖွဲ့အစည်းက လာရောက်ပစ်ခတ်သည်ကို မသိရှိကြောင်း လည်း ကိုမျိုးက ထပ်လောင်းပြောသည်။
“ အမျိုးသား ၃ဦး သေနတ်ပစ်ဒဏ်ရာနဲ့ သေဆုံးနေတာ ဟုတ်ပါတယ်။ ဘယ်အဖွဲ့က ပစ်သွားလည်းဆိုတာ စုံစမ်းနေဆဲပါ” ဟု သီပေါမြို့ ရဲစခန်းမှ တာဝန်ရှိသူ က ပြောသည်။
အမျိုးသား ၃ဦး သေနတ်ပစ်ခံရပြီး သေဆုံးနေသည့် နေရာသည် မူးယစ်ဆေးဝါး ရောင်းဝယ်ဖောက်ကားသည့် နေရာဖြစ်သည် ဟု သီပေါမြို့ဒေသခံများ ပြောပြချက် အရသိရသည်။
“ဒီနေ့ အမျိုးသား ၃ဦး သေနတ်ပစ်ခံရတဲ့နေရာက ဆေးတွေ ရောင်းနေတဲ့နေရာပါ။ တယောက်တည်း မသွားရဲတဲ့နေရာပါ။ ဒီဒေသမှာတော့ မကြာခဏ သေနတ်ပစ်ခံရတယ်။ တခါမှ တရားခံ မပေါ်ဘူး” ဟု သီပေါမြို့ ဒေသခံအသက် ၄၀ အရွယ် စိုင်းမွန်း က ပြောသည်။
သီပေါမြို့နယ် နှင့် ကျောက်မဲမြို့နယ် အတွင်း မကြာခဏ သေနတ်ပစ်ခတ်မှု ဖြစ်ပွားကာ သေဆုံးမှု ရှိသော်လည်း တကြိမ်တခါမျှ တရားခံ ဖော်ထုတ်နိုင်ခြင်းမရှိကြောင်း၊ ဒေသခံများအနေဖြင့် စိုးရိမ်ထိတ်လန့်မှုဖြင့်နေထိုင်နေရကြောင်းလည်း စိုင်းမွန်း က ဆိုသည်။
ဒီဇင်ဘာ ၂၃ရက်နေ့တွင်လည်း ကျောက်မဲမြို့နယ် မိုင်းတင်းကျေးရွာ အုပ်စု ဝေလုံကျေးရွာ တွင် ကြံ့ခိုင်ရေး ပါတီ ကော်မတီ အဖွဲ့ဝင် အသက် ၄၀ အရွယ် စိုင်းဌေးအောင် သေနတ်ပစ်ခတ်မှု ဖြစ်ပွားခဲ့ကြောင်း သတင်းရရှိသည်။
သျှမ်းပြည်နယ် မြောက်ပိုင်း ကျောက်မဲမြို့နယ် နှင့် သီပေါမြို့နယ် တွင် တိုင်းရင်းသား လက်နက်ကိုင် တပ်ဖွဲ့များ နှင့် မြန်မာ့တပ်မတော် တို့ လှုပ်ရှားသည့် နေရာဖြစ်ပြီး မကြာခဏ တိုက်ပွဲဖြစ်ပွားသည့် နေရာလည်း ဖြစ်သည်။
Leave a Comments