သျှမ်းပြည် မြောက်ပိုင်း ကျောက်မဲမြို့နယ် ဝေလုံကျေးရွာ တွင်နေထိုင်သည့် အမျိုးသားတဦး ယမန် မနက် ပိုင်းတွင် သေနတ်ပစ်သတ်ခံရကြောင်း သတင်းရရှိသည်။
ဖြစ်စဉ်မှာ ယမန် (ဒီဇင်ဘာ ၂၃) မနက် ၁၀နာရီ ဝန်းကျင်တွင် ကျောက်မဲမြို့နယ် မိုင်းတင်းကျေးရွာ အုပ်စု ဝေလုံ ကျေးရွာ ၌ အသက် ၄၀ အရွယ် စိုင်းဌေးအောင် ကို အမည်မသိ အမျိုးသား ၂ဦးက သေနတ် ၁၀ချက်ဖြင့် လာရောက် ပစ်သတ်ခဲ့သည် ဟု ကျောက်မဲမြို့မ ရဲစခန်းမှ စုံစမ်းသိရသည်။
“ သေနတ်ပစ်တာက ၁၀ချက်ပါ။ အဲ့နေရာမှာပဲ လှဲချ သေဆုံးသွားတယ်။ စိုင်းဌေးအောင် ကို လာပစ်တဲ့ အမည်မသိ အမျိုးသား၂ဦးကို စုံစမ်းနေပါတယ်” ဟု ကျောက်မဲမြို့ မ ရဲစခန်းမှ တာဝန်ရှိသူ တဦးက သျှမ်းသံတော်ဆင့် သို့ပြောသည်။
အဆိုပါ သေနတ်ပစ်ခံရသည့် စိုင်းဌေးအောင် သည် ကျောက်မဲမြို့နယ် ပြည်ခိုင်ဖြိုး ပါတီ ကော်မတီ ဝင် တဦးဖြစ်ပြီး၊စိုင်းဌေးအောင်ကို ပစ်သည့် ကျည်ဆံခွံ ၁၀ခု သည် LUGER အမျိုးအစား 9MM ဖြစ်ကြောင်း ကျောက်မဲမြို့မ ရဲစခန်း စစ်ဆေးချက် မှ သိရသည်။
“ ကျနော် ကြားရတာတော့ သေနတ်ပစ်ခံရတဲ့ အမျိုးသားက သူ့ အမေ အိမ်ပြင်နေတာ သွားကူနေချိန် အမည်မသိတဲ့ အမျိုးသား ၂ဦး က လာပြီး သေနတ်ပစ်တယ်။ နောက် ပစ်ခံရတဲ့သူက ကြံ့ခိုင်ရေး ပါတီ အဖွဲ့ ဖြစ်နေတယ်။ သူတို့တွေ ပြဿနာ တခုခု တော့ရှိပုံရတယ်” ဟု ကျောက်မဲမြို့နယ် အိုမ်းတမောဝ် လူမှုကူညီရေး အသင်း က အဘမ်း ကပြောသည်။
သျှမ်းပြည် မြောက်ပိုင်း ကျောက်မဲမြို့နယ် တွင် တိုင်းရင်းသားလက်နက်ကိုင်များ နှင့် မြန်မာ့တပ်မတော် လှုပ်ရှားသည့်နေရာဖြစ်ပြီး၊ မကြာခဏ တိုက်ပွဲဖြစ်ပွားသည့် နေရာတခုလည်း ဖြစ်သည်။
Leave a Comments