မြန်မာ- ထိုင်းနယ်စပ် တာချီလိတ်မြို့ ကမ္ဘောဇဘဏ် (၂) အနီးတွင် ယနေ့ မနက် ၇နာရီကျော် ၌ အမျိုးသား ၄ဦးသည် ငွေလှဲဆိုင်တွင် ကျပ်သိန်း ၂၀၀ လုယက်သွားကြောင်း သတင်းရရှိသည်။
ဖြစ်စဉ်မှာ တာချီလိတ်မြို့ မယ်ခေါင်ရပ်ကွက် ဗိုလ်ချုပ်အောင်ဆန်းလမ်းမကြီး၊ ကမ္ဘောဇဘဏ် (၂) ဘေးသို့ အမည်မသိ အမျိုးသား ၄ဦး သည် ကားဖြင့် လာကာ ငွေလှဲဆိုင်ထံ မြန်မာ ကျပ်ငွေ သိန်း ၂၀၀ လုယက်ခဲ့ကြောင်း တာချီလိတ်မြို့မ ရဲစခန်း မှ တာဝန်ရှိသူ က ပြောသည်။
“ အမျိုးသား ၄ဦးက ကားနဲ့ ရောက်လာပြီး၊ ငွေလွှဲဆိုင် ကို ဝင်သွားတယ်။ နောက် ငွေလှဲဆိုင် က အမျိုးသားတဦးကို ထိန်းချုပ်ပြီး ငွေတွေ လုယက်ပြီး ကားနဲ့ ထွက်သွားတယ်” ဟု ၎င်း တာဝန်ရှိ ရဲကပြောသည်။
အဆိုပါ လုယက်သွားသည့် အမျိုးသား ၄ဦးသည် လက်ရှိ အချိန်ထိ လွှတ်မြောက်နေကြောင်း၊ သက်ဆိုင်ရာ မှ စုံစမ်းစစ်ဆေးနေကြောင်းလည်း သိရသည်။
တာချီလိတ်မြို့ တွင် မကြာခဏ လုယက်မှု၊ ဓားမြတိုက်မှု ဖြစ်ပွားသော်လည်း သက်ဆိုင်ရာ မှ တရားခံများကို ဖမ်းဆီးမှု မရကြကြောင်း ဒေသခံများပြောပြချက် အရသိရသည်။
“ နယ်စပ်ဒေသ ဆိုတော့ တရားဥပဒေ စိုးမိုးရေး က မရှိဘူး။ ကိုယ့်လုံခြုံရေး ကိုယ်ယူပဲ။ တကယ်ဆို ဌာနဆိုင်ရာ ရဲတွေက လုံခြုံရေး ယူရမှာ။ နယ်စပ်ဒေသဆိုပြီး ဖြစ်မှာပဲ။ လွှတ်ထားတဲ့သဘောဖြစ်နေတယ်” ဟု တာချီလိတ်မြို့နေထိုင်သည့် စိုင်းဆမ် က ပြောသည်။
သက်ဆိုင်ရာ များအနေဖြင့် နယ်စပ်ဒေသ လုံခြုံရေး ကို တိုးမြှင့်ဆောင်ရွက်ပေးစေလိုကြောင်း လည်း စိုင်းဆမ်က ပြောသည်။
လွန်ခဲ့သည့် အောက်တိုဘာ လတွင်လည်း တာချီလိတ်မြို့ အာခါဈေး အနီးတွင် ဓားမြတိုက်ခံခဲ့ရပြီး တရားခံ မမိသေးကြောင်းသိရသည်။
Leave a Comments