သျှမ်းပြည်တောင်ပိုင်းလွိုင်လင်မြို့နယ်အတွင်း ကျေးလက်ဒေသခံတဦးအား မူးယစ်ဆေးဝါး မှုဖြင့် ရဲများလိုက်လံဖမ်းဆီးရာတွင် အဖမ်းမခံဘဲ ဇနီးဖြစ်သူအားဓါးဖြင့်ခုတ်ခဲ့ကြောင်း သိရသည်။
နိုဝင်ဘာလ ၁၀ ရက်နေ့က လွိုင်လင်မြို့နယ် ပန်ခေါက်ဝိုးရွာနေ စိုင်းဇိန အသက် ၄၁ အား မူးယစ်ဆေးဝါးမှုဖြင့် ၎င်းနေအိမ်အထိ ရဲများလိုက်လံဖမ်းဆီးရာ အဖမ်းမခံဘဲ ဇနီးဖြစ်သူ နန်းရွှေဝါ အသက် ၃၄ နှစ်အား ဓါးစာခံအဖြစ်ဖမ်းချုပ်ကာ ဓါးဖြင့်ခုတ်ပြီး ထွက်ပြေးရန်ကြိုးစား ခဲ့သည်ဟုသိရသည်။
လွိုင်လင်မြို့နယ် ပြည်နယ်လွှတ်တော်အမတ် နန်းမြထွေးက – “ဟုတ်တယ်။ သူ့ကို မနက် ၈ နာရီ ကတည်းက ပုလိပ်တွေသွားဖမ်းတာ မွန်းလွဲ ၂ နာရီမှသူ ထွက်ပြေးဖို့ကြိုးစားတော့ ပုလိပ်တွေက သူ့ကိုဖမ်းလိုက်တာ။ သူ့မိန်းမကိုဓါးနဲ့ခုတ်လိုက်လို့ သူ့မိန်းမ ဂုတ်တွေ လက်တွေမှာ ထိခိုက်ဒဏ်ရာရ သွားတယ်။ သူ့မိန်းမ နန်းဝါ တောင်ကြီးတက်ဆေးကုရတာ ဒီနေ့ နိုဝင်ဘာ ၁၃ ရက်မှ ဆေးရုံက ဆင်းလာတာ ”- ဟု သျှမ်းသံတော်ဆင့်အားပြောသည်။
စိုင်းဇိနအား ပုလိပ်များ ပစ်ခတ်ဖမ်းဆီးရာ ဒဏ်ရာအနည်းငယ်ရရှိပြီး လက်ရှိတွင် လွိုင်လင်ရဲစခန်းတွင်ချုပ်နှောင်ထားခြင်းခံရကြောင်းလည်း ဆိုပါသည်။
လွိုင်လင်ဒေသခံ လုံးဆုက လည်း-“ သူဆေးနဲ့ပတ်သက်တယ်လို့သတင်းရလို့ ပုလိပ်တွေသွားဖမ်းတာ လို့ပြောတယ်။ သူက အဖမ်းမခံဘူး။ သူ့မိန်းမကိုဖမ်းချုပ် ဓါးနဲ့ထောက်ပြီး ပုလိပ်တွေကိုအဖမ်းမခံဘဲပြန်ချိန်တာလေ။ သူထွက်ပြေးဖို့ကြိုးစားတော့သူ့ကို ပစ်လိုက်တာ သူ့မျက်နှာတွေ ရင်ဘတ်တွေမှာ ရှပ်ထိဒဏ်ရာရသွားတယ်။ သူ့ဆီက ယာဘအပြားပေါင်း ၁၀၀ ကျော်ရတယ်လို့ ကြားသိရပါတယ် ”- ဟု ပြောသည်။
လက်ရှိတွင် ဒေသတွင်း ယာဘစိတ်ကြွဆေး တပြားလျှင်ကျပ် ၁၀၀၀ ဖြင့်ရောင်းဝယ်ရာ စိုင်းဇိန ထံမှ ဆေးပြား ၁၁၈ ပြား ဖမ်းမိသဖြင့် ကာလတန်ဖိုးမှာ ကျပ် ၁၁၈၀၀၀ ခန့်ရှိသည်ဟုဆိုပါသည်။
စိုင်းဇိန နှင့် နန်းရွှေဝါ တို့တွင် သား ၁ ဦး သမီး ၁ ဦးရှိကြောင်းသိရသည်။
လက်ရှိတွင် စိုင်းဇိန အား ပ ၉၉/၂၀၁၉ ၊ ပုဒ်မ ၄၅၂/၅၀၆/၄၂၇ တို့ဖြင့် ရဲများက အမှုဖွင့်အရေးယူထားကြောင်းလည်း သိရပါသည်။
