သျှမ်းပြည် တောင်ပိုင်း ပင်လောင်းမြို့နယ် တီကျစ်ရှိ အများပြည်သူပိုင် ဘုရားကုန်းနေရာ တွင် ဓာတ်ပုံ သွားရိုက်သည့် MATA အဖွဲ့ နှင့် သတင်းထောက် များကို ဧဒင် ကုမ္ပဏီ ဝန်ထမ်း ၅၀ ကျော်က လာရောက် ပိတ်ဆို့ ကြောင်း သတင်းရရှိသည်။
ဖြစ်စဉ်မှာ ယနေ့ (အောက်တိုဘာ ၂၉ ) ညနေ ၄ နာရီ ကျော်က MATA အဖွဲ့ဝင်များ ၊ သျှမ်းသံတော်ဆင့်သတင်းဌာန သတင်းထောက်များ၊ ဖရီးလန့်စ်သတင်းထောက်တချို့ စုစုပေါင်း ၇ ယောက် တီကျစ်မြို့ ဘုရားကုန်း ပေါ်မှ မြို့တွင်းသို့ ဓါတ်ပုံလှမ်းရိုက်ရာ ထိုအနီးရှိ ကျောက်မီးသွေး စီမံကိန်းမှ ဧဒင်ကုမ္ပဏီ ဝန်ထမ်း ၅၀ ကျော်က ၄င်းတို့အား ဝိုင်းပိတ်ထားကြောင်း MATA အဖွဲ့ ကိုယ်စားလှယ် ကိုအောင်ကျော်မိုး က သျှမ်းသံတော်ဆင့် သို့ ပြောသည်။
“ အဓိက တော့ သူတို့ မိုင်းတွင်းကို ဓာတ်ပုံ ရိုက်တယ်လို့ယူဆတဲ့အတွက် ကျနော်တို့ကို ၄ နာရီထိုးဖို့ ၁၀ မိနစ်လောက်မှာ လာဝိုင်းကြပါတယ်။ ကျနော်နဲ့ အတူ သျှမ်းသံတော်ဆင့်သတင်းက သတင်းထောက် ၃ ယောက် ၊ သဘာဝ ပတ်ဝန်းကျင် လူမှု ဘဝ ကိုလာပြီးရိုက်ကူးရေးလုပ်တဲ့ ရှင်ဒေဝီ ရယ် နောက်ပြီး ဖရီးလန့်စ်သတင်းထောက်ရယ် ကျနော်တို့ ရ ယောက်ပါ ” ဟု ကိုအောင်ကျော်မိုး က ဆိုသည်။
အဆိုပါ အဖွဲ့များ ဓာတ်ပုံ ရိုက်သည့်နေရာသည် ကန့်သတ်ထားသည့်နေရာ မဟုတ်ကြောင်း၊ ဘုရားကုန်းနေရာတွင် ကန့်သတ်နယ်မြေ ဟုလည်း မရေးသားထားကြောင်း၊ တားမြစ်သတင်းပေးချက်တစုံတရာမရှိကြောင်း ၊ ထိုနေရာတွင် လွတ်လပ်စွာ ဓာတ်ပုံရိုက်ပိုင်ခွင့်၊ သတင်းအချက်အလက် ရပိုင်ခွင့်ရှိသည့်နေရာဖြစ်သဖြင့် ၀င်ရောက်ဓါတ်ပုံရိုက်ရခြင်းဖြစ်ကြောင်း ကိုအောင်ကျော်မိုး က ထပ်လောင်းပြောသည်။
သဘာဝ ပတ်ဝန်းကျင်လူမှုဘဝ အကြောင်းကို ရိုက်ကူးသည့် မရှင်ဒေဝီ သည် ဧဒင်ကုမ္ပဏီ ဝန်ထမ်းများလာရောက် ပိတ်ဆို့စဉ် လူမှု ကွန်ရက်တွင် တိုက်ရိုက်ထုတ်လုပ်မှု LIVE လွှင့်ရာ ဧဒင် ဝန်ထမ်း တချို့က “ အရူး” “သူခိုး” စသဖြင့်စွပ်စွဲ ပြောဆိုမှုများလည်းရှိခဲ့ပါသည်။
ထို ကဲ့သို့ ပြောဆိုမှု အမျိုးသမီး တယောက်၏ ဂုဏ်သိက္ခာ ကို ညိုးနွမ်းအောင် ဖိအားပေး ပြီ း ပြုလုပ်သည် ဟု ကိုအောင်ကျော်မိုးက ထောက်ပြ ပြောဆိုလိုက်သည်။
“ ကျနော်တို့ မှာ သတင်းအချက်အလက်တွေ ရဖို့အခွင့် အရေးတွေရှိတယ်။ ဥပဒေ ဘောင် မကျော်မချင်း ကျနော်တို့ လွတ်လပ်စွာနေခွင့် ရှိတယ်။ ဥပဒေတွေ ရယူပိုင်ခွင့်ရှိတယ်။ ကုမ္ပဏီကနေ လာရောက် ဖိအားပေးတာဟာ ဥပဒေအနေနဲ့ နိုင်ငံသားတယောက်ပေါ်မှာ ဥပဒေမဲ့လုပ်ရပ်ပါ” ဟု ကိုအောင်ကျော်မိုး ပြောဆိုလိုက်သည်။
ဧဒင် ကျောက်မီးသွေး ကုမ္ပဏီ ဝန်ထမ်းများ ပိတ်ဆို့ထားသည့်ဖြစ်စဉ်အတွင်း ပါဝင်သည့် သျှမ်းသံတော်ဆင့် ရုပ်သံ အယ်ဒီတာ စိုင်းမျိုး က “ ကျနော်တို့ ကားနောက်ကို သူတို့ကားနဲ့ ပိတ်ထားတယ်။ သူတို့ကား က ၃ စီးရှိတယ်။ ကျနော်တို့ ဓာတ်ပုံ ရိုက်ဖို့လာကြတာ။ ကျနော်တို့ဓာတ်ပုံရိုက်ချိန်မှာပဲသူတို့ လာပြီး ပိတ်ဆို့ဝိုင်းတာပါ။ ဓာတ်ပုံကို ပြန်ဖျက်ခိုင်းတာတော့ မရှိပါဘူး” ဟု ပြောသည်။
ကျောက်မီးသွေး တူးဖော်နေသည့် ဧဒင် ကုမ္ပဏီသည် အစိုးရ ထံမှ တရားဝင်ခွင့်ပြုချက်ရထားသည့် ကုမ္ပဏီ ဖြစ်သည့် အတွက် ထိုကဲ့သို့ရုပ်ပျက်ဆင်းပျက်မပြုလုပ်သင့်ကြောင်းလည်း ဝိုင်းခံရသည့် သူများက ပြောဆိုသည်။
တီကျစ်ဒေသတွင် ကျောက်မီးသွေး စက်ရုံကြောင့် ဒေသခံများ ကျန်းမာရေး ဆိုးရွာစွာ ခံစားနေရသည်ဟုဆိုကာ မနက်ဖန် (အောက်တိုဘာ ၃၀) ရက်တွင် လည်း ကျောက်မီးသွေး စက်ရုံ လည်ပတ်မှု ရပ်ဆိုင်းရန် ဒေသခံလူထုမှ ဆန္ဒထုတ်ဖော်မှုပြုလုပ်မည်ဖြစ်ကြောင်း သိရသည်။
မြန်မာ နိုင်ငံတွင် ကျောက်မီးသွေး လျှပ်စစ်ထုတ် စက်ရုံ (၃) ရုံ အနက် တီကျစ် ကျောက်မီးသွေး သုံး လျှပ်စစ်ရုံသည်အကြီးဆုံး နှင့် ပထမဦးဆုံး လည်ပတ်သည့် စက်ရုံဖြစ်သည်။
