သျှမ်းပြည်မြောက်ပိုင်း မူစယ်မြို့တွင် ဗိုလ်ချုပ်အောင်ဆန်း တဦးတည်း၏ကြေးရုပ်ထက် အာဇာနည် ၉ ဦးစလုံး၏ကြေးရုပ်စိုက်ထူပါက ပိုမိုသင့်လျော်မည်ဖြစ်ကြောင်း မူစယ်ဒေသခံလူငယ်များကပြောဆိုသည်။
မူစယ်မြို့တွင် ပြည်ထောင်စုနေ့အခမ်းအနားနှင့်လွတ်လပ်ရေးနေ့အခမ်းအနား ကျင်းပသွားရန် အတွက် ကျောက်တိုင်နှင့်ဗိုလ်ချုပ်ကြေးရုပ်တည်ထားရေး သင့်တော်သောမြေနေရာ ကွင်းဆင်းရှာဖွေ ရေးအတွက် အမျိုးသားဒီမိုကရေစီအဖွဲ့ချုပ်မှ မြို့နယ်စီမံခန့်ခွဲမှုကော်မတီအား ဖေဖော်ဝါရီလ ၂၆ ရက်နေ့ကဖွဲ့စည်းလိုက်သည့်အပေါ် မူစယ်ဒေသခံလူငယ်များက ထိုသို့ပြောဆိုလိုက်ခြင်းဖြစ်သည်။
ဗိုလ်ချုပ်ကြေးရုပ်ကိုစိုက်ထူဖို့ ဒီက NLD တွေက စီစဉ်နေပါတယ်။ ကျနော်တို့ဒေသခံတွေ အနေနဲ့မြင်တာကတော့ ဗိုလ်ချုပ်အောင်ဆန်းတဦးတည်းရဲ့ကြေးရုပ်စိုက်ထူမှာထက်စာရင် ရဲဘော်ကိုထွေးအပါအဝင် အာဇာနည်ခေါင်းဆောင် ၉ ဦးစလုံးရဲ့ကြေးရုပ်ကိုစိုက်ထူပါမှ ပြည့်စုံပါမယ်။ ဗိုလ်ချုပ်အောင်ဆန်းဟာ မြေပြန့်သားများအတွက် အာဇာနည်ခေါင်းဆောင်ဖြစ်တာမှန်တယ်။ တိုင်းရင်းသားတွေအတွက်တော့ သူ့ဟာနဲ့သူ အာဇာနည် ခေါင်းဆောင်ကရှိပြီးသားဘဲ ။ ဒါကြောင့် တိုင်းရင်းသားတွေ တောင်းဆိုနေတဲ့ တန်းတူညီမျှမှုအခွင့်အရေးဖြစ်စေချင်တယ်ဆိုရင် ဗိုလ်ချုပ်တဦးတည်းမလုပ်ပါနဲ့ ။ အာဇာနည်ခေါင်းဆောင် ၉ ဦးစလုံးရဲ့ကြေးရုပ်ကိုစိုက်ထူပါ – ဟု မူစယ်မြို့ခံလူငယ် စိုင်းလိတ်ကသျှမ်းသံတော်ဆင့် အားပြောပြသည်။
ထိုအတွက် မူစယ်ဒေသခံများလက်မှတ်ရေးထိုးကာ မတ်လ ၇ ရက် အုပ်ချုပ်ရေးပိုင်း ဆိုင်ရာ အစည်းအဝေးမတိုင်မှီ ဗိုလ်ချုပ်ကြေးရုပ်တခုတည်းစိုက်ထူမည့်အပေါ် ကန့်ကွက်လက်မှတ်ရေးထိုးထားသည့် စာပေးပို့မည်ဖြစ်ပြီး အကယ်၍ အာဇာနည်ခေါင်းဆောင် ၉ ဦးစလုံး၏ကြေးရုပ်စိုက်ထူပေးမည်ဆိုပါက လက်ခံသဘောတူမည်ဖြစ်ကြောင်း၊ သို့သော် ဗိုလ်ချုပ်ကြေးရုပ်တခုတည်းကိုသာ စိုက်ထူမည် ဆိုပါက ဆက်လက်ကန့်ကွက်သွားမည်ဖြစ်ကြောင်း မူစယ်မြို့ခံ စိုင်းမြတ်က လည်းပြောသည်။
လက်ရှိတွင် မူစယ်မြို့ စီမံခန့်ခွဲမှုကော်မတီက သင့်တော်မည့်မြေနေရာ ကွင်းဆင်းစီစစ်ကြည့်ရှုနေ ဆဲဖြစ်ပြီး မတ်လ ၁၃ ရက်နေ့တွင်ထပ်မံကျင်းပမည့်အစည်းအဝေးတွင် တင်ပြကြရမည်ဖြစ်ပါသည်။
စီမံခန့်ခွဲမှုကော်မတီ များမှာ မူစယ်မြို့ပေါ် ၉ ရပ်ကွက်အုပ်ချုပ်ရေးမှူးများအပါအဝင် မူစယ်မြို့နယ် စည်ပင်သာယာရေးဌာန အမှုဆောင်အရာရှိ ၊မြို့နယ်လယ်ယာမြေစီမံခန့်ခွဲရေးနှင့် စာရင်းအင်း ဌာနမှ မြို့ နယ်ဦးစီးမှူး၊ ရပ်မိရပ်ဖ စိုင်းခမ်းမြတ်နှင့် မူစယ်မြို့ NLD ပါတီဉက္ကဌတို့ပါဝင်ကြောင်းသိရသည်။
Leave a Comments