အောက်တိုဘာ ၂၀ ရက် ၂၀၁၉ ခု ယနေ့ ညနေ ၆ နာရီ ၄၅ မိနစ် သံဃာတော်များ ဘုရား၀တ်ပြုနေစဉ် လက်နက်ကိုင် လူနှစ်ဉီး ကျောင်းထိုင်ဆရာတော်အား ၀င်ရောက်ပစ်ခတ်ရာ ကျည် ၅ ချက် ထိမှန်ပြီး ပျံလွန်တော်မူ သွားသည်ဟု သိရသည်။
“သံဃာတော်တွေ ဘုရား ရှိခိုးနေချိန် ဆရာတော်က စင်္ကြန် လျှောက်နေတဲ့အချိန်အပြင် ကနေပြီး ၀င်ပစ်သွားတာ ပေ ၄၀-၅၀ လောက် ရှိမယ်။ ဒဏ်ရာ ၅ ချက် ခေါင်း နဲ့ ကိုယ်ခန္ဓာ မှာ ထိမှန်တာ ပွဲချင်းပြီး ဘဲ” – ဟု လားရှိုး နေ သျှမ်းလူငယ်ခေါင်းဆောင် စိုင်းဟန်က ပြောသည်။
ဆရာတော် ဉီးပညာဇောတ သက်တော် ၄၅ နှစ် ဝါတော် ၂၅ သည် ခေးနင်းကျေးရွာအုပ်စု ခေးနင်းကျောင်းတိုက် တွင် ၂၀၀၃ ခုနှစ်မှစပြီး ကျောင်းထိုင် ကာ ဘုရားအမှုပြုလာခဲ့သည်မှာ ၁၆ ဝါ ရှိ ပြီဟု ဒေသခံများ ပြောပြချက်အရ သိရသည်။
လက်ရှိ ဆရာတော်ဉီးပညာဇောတ ၏ ရုပ်ကလာပ်တော်အား လားရှိုးဆေးရုံတွင် ပို့ဆောင်ကာ တာ၀န်ရှိများက စစ်ဆေးနေကြောင်းသိရှိရသည်။
ခေးနင်းရွာသည် လားရှိုးမြို့အနောက်တောင်ဘက် ၁၀ မိုင်ခန့်အကွာ လားရှိုး-သီပေါကြားတွင် တည်ရှိပါသည်။
၂၀၁၈ ခုနှစ်က အောက်တိုဘာလ ၅ ရက် ယမန်နှစ်ကလည်း ကျောက်မဲမြို့ ရွှေကျင်ကျောင်းတိုက်ဆရာတော် ဉီးကလျာဏဝံသ အားလည်း အမည်မသိလက်နက်ကိုင် ဆိုင်ကယ်စီးလူနှစ်ဉီးက ၀င်ရောက်ပစ်ခတ်သည့်အတွက် သေနတ်ဒဏ်ရာ ၇ ချက်ဖြင့် ပျံလွန်တော်မူသွားသည်။ အဆိုပါ လူသတ်သမား အားလည်း ယနေ့တိုင် တာ၀န်ရှိများက ဖမ်းဆီးနိုင်ခြင်းမရှိသေးပေ။