အမျိုးသား ပြန်လည်သင့်မြတ်ရေး နှင့် ငြိမ်းချမ်းရေး ဗဟိုဌာန (NRPC) နှင့် သျှမ်းပြည် ပြန်လည် ထူထောင်ရေး ကောင်စီ RCSS/SSA တို့ ယနေ့ မနက်ပိုင်း တွင် အလွတ်သဘော တွေ့ဆုံခဲ့ကြောင်း သတင်းရရှိသည်။

ယနေ့ အောက်တိုဘာ ၁၇ ရက်နေ့ မနက် ၁၀ နာရီ တွင် NRPC နှင့် RCSS /SSA တို့ အလွတ်သဘောတွေ့ဆုံရာတွင် တနိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် အကောင်အထည်ဖော်မှု ဆိုင်ရာ အစည်းအဝေး JICM ကျင်းပနိုင်ရေး ကိစ္စနှင့် NCA လက်မှတ်ရေးထိုးခဲ့သည့် ၄ နှစ်ပြည့် နှစ်ပတ်လည်နေ့ ကျင်းပရေး ကိစ္စ တို့ ဆွေးနွေးခဲ့ကြောင်း သိရသည်။

အဆိုပါ တွေ့ဆုံမှုတွင် RCSS/SSA ၏ အတိုင်ပင်ခံ ပုဂ္ဂိုလ် ဦးခွန်စိုင်း က“ အဓိက ငြိမ်းချမ်းရေး ကိစ္စ ဘဲပေါ့။ NRPC က RCSS နဲ့ အပြင် NCA လက်မှတ် မထိုးရသေးတဲ့ ကရင်နီ အမျိုးသားတိုးတက်ရေးပါတီ(KNPP) နဲ့လည်း တွေ့ဆုံတယ်” ဟု သျှမ်းသံတော်ဆင့် သို့ ပြောသည်။

အလွတ်တွေ့ဆုံပွဲတွင် NRPC အဖွဲ့မှ အငြိမ်းစား ဒုတိယ ဗိုလ်ချုပ်ကြီး ခင်ဇော်ဦး ခေါင်းဆောင်ပြီး ဦးဇော်ဌေး၊ ဦးလှမောင်ရွှေ၊ ဦးမိုးဇော်ဦး နှင် ဦးကျော်လင်းဦး တို့တက်ရောက်ခဲ့ကြသည်။

RCSS/SSA အဖွဲ့မှ ဗိုလ်ချုပ်ပေါင်ခေး၊ ဗိုလ်ချုပ်ကြီး စိုင်းငင်း၊ဒေါက်တာ စိုင်းဦး၊ စိုင်းလျန်း၊ ဗိုလ်မှူး စင်းဆိုင်မိုင် တို့ ဖြစ်သည်။

NRPC အနေဖြင့် NCA လက်မှတ်မရေးထိုးသေးသည့် ကချင်လွတ်မြောက်ရေး အဖွဲ့ (KIO) နှင့် လည်းတွေ့ဆုံရန် အစီစဉ်ရှိသည် ဟု သိရသည်။

သြဂုတ် လ ၂၀ရက်နေ့တွင်လည်း NRPC နှင့် RCSS/SSA တို့သည် ထိုင်းနိုင်ငံ ချင်းမိုင် တွင် အလွတ်သဘော တွေ့ဆုံမှု ပြုလုပ်ခဲ့သည်။