အာဆီယံက ယခုနှစ်  အသန့်ရှင်းဆုံးဆု ချီးမြှင့်ထားသည့် သျှမ်းပြည်တောင်ပိုင်း မြို့တော် တောင်ကြီးတွင် မကြာခဏ ရေကြီးရေလျှံမှုဖြစ်ပွားနေကြောင်း သတင်းရရှိသည်။

အောက်တိုဘာ ၁၇ ရက် ညနေပိုင်းက မိုးသည်းထန်စွာ ရွာသွန်းမှုကြောင့် တောင်ကြီးမြို့မ ဈေး၊ Ocean ကုန်တိုက် အတွင်းရေကြီး ရေလျှံဝင်ကာ အထည်ဆိုင်များ၊ ကုန်ပစ္စည်းဆိုင်များ ပျက်စီးဆုံးရှုံးမှုများရှိခဲ့ သည် ဟု တောင်ကြီးမြို့ ဒေသခံများ က ပြောဆိုလိုက်ကြသည်။

“မနေ့က မိုးရွာတာ ခဏပဲ။ မိုးတော့သည်းတယ်။ ဈေးမှာ ခါးထိရေလျှံတယ်။ အိုးရှင်း ကုန်တိုက်ထဲရေတွေဝင်တယ်။ ပစ္စည်းတွေ ရေစိုကုန်တာ။ အဓိက အထည်တွေ ရေစို ပျက်စီးတယ်” ဟု တောင်ကြီးဒေသခံ စိုင်းကွမ်းလှိုင်း က သျှမ်းသံတော်ဆင့် သို့ပြောသည်။

တောင်ကြီးမြို့ တွင် ရေကြီးရေလျှံမှုမှာ တနေ့တခြား ဆိုးရွားလာကြောင်း၊  ထိုကဲ့သို့သောရေကြီးမှုမျိုး ယခင်နှစ်များက မရှိခဲ့ကြောင်း၊ လက်ရှိတွင် တောင်ကြီးဒေသခံများ မှာ မိုးရွာသွန်းလာပါက စိုးရိမ်ထိတ်လန့်မှုများဖြင့် နေထိုင်နေရကြောင်း စိုင်းကွမ်းလှိုင်း က ဆိုသည်။

“ မနေ့ က ရေကြီးတာလောက် အရင်ကတခါမျှ မကြုံဖူးဘူး။ ကားတွေ၊ ဆိုင်ကယ်တွေ က စ ရေနစ်ပျက်စီးသွားကြတယ်။ တောင်ပေါ်မြို့ ရေကြီးတာကတော့ စဉ်းစားစရာပဲ။ ဒီပျက်စီးတာမျိုးဆိုရင် ဘယ်သူ က လျော်ပေးမှာလဲ” ဟု တောင်ကြီးမြို့မ ဈေးထဲတွင် ဈေးဆိုင်ဖွင့်ထားသည့် ပါ့ခမ်း က ပြောသည်။

တောင်ကြီးမြို့သည် ယခင်က  လွန်စွာသာယာလှပပြီး သန့်ရှင်းသည့်မြို့ဖြစ်ကြောင်း၊ ယခုကဲ့သို့ရေကြီးမှုကို မကြုံဖူးကြောင်း၊ သက်ဆိုင်ရာများအနေဖြင့် ရေကြီး ရေလျှံသည့် ပြဿနာကို အမြန်ဆုံးဖြေရှင်းပေးသင့်ကြောင်း ပါ့ခမ်းက တောင်းဆိုလိုက်သည်။

“ စည်ပင်တွေ ကတော့လစဉ် ပိုက်ဆံကောက်တယ်။ ပြည်သူတွေ အတွက်တော့ ဘာမှ မလုပ်ပေးဘူး။ အခုက မိုးကျတာနဲ့ ရေကြီးနေတယ်” ဟု ပါ့ခမ်း က ပြောသည်။

လာမည့် ၂၀၂၀  ဇန္နဝါရီ လတွင် ဘရူနိုင်း နိုင်ငံ၌  ကျင်းပမည့် 2020 AFT  အခမ်းအနား၌ပေးအပ်မည့်  “ 2nd ASEAN Clean Tourist City Standard Award” ဆုကို တောင်ကြီးမြို့ အပါအဝင် ကယားပြည်နယ်မြို့တော် လွိုင်ကော်နှင့် တနင်္သာရီ တိုင်းမြို့တော် ထားဝယ်မြို့ တို့မှ လက်ခံရယူရန် ဖိတ်ထားခြင်းခံရကြောင်းသိရသည်။

တောင်ကြီးမြို့သည် အာဆီယံ အသန့်ရှင်းဆုံးမြို့တော်ဆု ရသော်လည်း လက်ရှိမှာ မိုးရွာသွန်းပါက ရေကြီး၊ရေလျှံမှု ပြဿနာများကို ပြည်သူများရင်ဆိုင် ကြုံတွေ့နေရသည်။

“ ကျနော်တို့တောင်ကြီးက အာဆီယံအသန့်ရှင်းဆုံး မြို့တော်ဆုတော့ ရထားတယ်။ ဒါပေမယ့် အခုလို မိုးရွာ ရေကြီးတာ မြင်တော့ ဘာပြောရမှန်းမသိဘူး။ မြောင်းစနစ်တွေ မပြုပြင်သေး သရွေ့တော့ ရေကြီး မှု ထပ်ရင်ဆိုင်ရအုံးမယ်” ဟု တောင်ကြီး ဒေသခံတဦး စိုင်းအောင် က ပြောသည်။

တောင်ကြီးသည် လွန်ခဲ့သည့် ၁၀ နှစ်ခန့်ကလည်း သာယာလှပသန့်ရှင်းသော တိုရစ်ဇင်မြို့အဖြစ်လည်း သတ်မှတ်ချီးမြှင့်ခြင်းခံရဖူးသည်။