သျှမ်းပြည် မြောက်ပိုင်း လားရှိုးမြို့နယ် မောက်တောင်းကျေးရွာတွင် နေထိုင်သည့် အသက် ၁၅ နှစ် အရွယ် ကျောင်းသူ တဦးကို ဈေးသည်တဦးက အကြမ်းဖက်ကာ အတင်းအဓမ္မပြုကျင့်ရန် ကြိုးစားခဲ့ကြောင်း သတင်းရရှိသည်။
ဖြစ်စဉ်မှာ အောက်တိုဘာ ၉ ရက်နေ့ ည ၁၀နာရီက အသက် ၁၅နှစ် အရွယ် ၆ တန်းကျောင်းသူ အေးယိင်း အိပ်နေစဉ် နမ့်ပေါင်ကျေးရွာနေ ဈေးသည် အသက် ၂၀ အရွယ် မောင်နေလင်းက အိမ်တံခါးသော့ဖျက်ကာ အိမ်အတွင်း ခိုးဝင်လာပြီး အေးယိင်း အား လက်ပြန်ကြိုးတုပ်၊ လက်ကိုင်ပဝါဖြင့် ပါးစပ်ကို ပိတ်ပြီး အတင်းအဓမ္မပြုကျင့်ရန် ကြိုးစားခဲ့ကြောင်း ကလေး အမှုကို လိုက်ပါ ကူညီပေးနေသည့် သျှမ်းလူငယ်အဖွဲ့ (TYO) မှ စိုင်းဟန် က သျှမ်းသံတော်ဆင့် သို့ ပြောသည်။
အေးယိင်းက ရုန်းကန်သည့်အသံကြားရာ အခန်းအပြင်ဘက်တွင်အိပ်နေသော ဖွားအေဖြစ်သူ နိုးလာပြီး မီးခွက်ထွန်းစဉ် မုဒိန်းကျင့်ရန်ကြိုးစားနေသည့် မောင်နေလင်းသည် အိမ်ထရံအားခုန်ကျော်လွှားကာ ထွက်ပြေးလွှတ်မြောက်သွားကြောင်း မြေးအဖွားကပြောသည်ဟု ဆိုပါသည်။
“ ပြောရရင် ဒါက အတင်းအဓမ္မမှုမြောက်ပါတယ်။ ၆ တန်း ကျောင်းသူ အဖွား က မနိုးလာရင် မုဒိမ်းကျင့်ခံရပြီလေ။ဒါကြောင့် ဒါက သက်ငယ်မုဒိမ်းမှု မမြောက်ဘူးလို့ ပြောလို့ မရဘူး” ဟု စိုင်းဟန် က ပြောပြသည်။
ထိုကိစ္စကို ၆ တန်းကျောင်းသူ သည် ကျောင်းဆရာမကို သွားရောက် တိုင်ကြားခဲ့ကြောင်း ဆရာမက ကျေးရွာ အုပ်ချုပ်ရေးမှူး (ရွာသူကြီး) အားသွားရောက်ဆွေးနွေးသောအခါ ရွာသူကြီးက မုဒိမ်းကျင့် ရန် ကြိုးစားသည့် မောင်နေလင်းကို သတိပေးပြီး ပြန်လွှတ်ပေးခဲ့ကြောင်း သိရသည်။
“ နေလင်းဆိုတဲ့သူကလည်း ဝန်ခံတယ်။ သူလုပ်တယ်ဆိုတာ။ ကျေးရွာ ကသူတွေက ဒီအမှု ဘယ်လောက် မြောက်တယ်ဆိုတာ မသိဘူး။ ဒီသတင်းကို ကြားကြားချင်း ကျနော်တို့ တွေ ချက်ချင်းလိုက်သွားတယ်” ဟု စိုင်းဟန် က ဆိုသည်။
အေးယိင်းသည် မိဘအိမ်တွင်မနေဘဲ ဖွားအေဖြစ်သူအား အဖော်ပြုကာ ၎င်းနေအိမ်တွင် မြေးအဘွား ၂ ဦးသာနေထိုင် နေကြောင်းလည်းသိရသည်။
လက်ရှိ ၆တန်းကျောင်းသူ ကို အတင်းအဓမ္မပြုကျင့်ခြင်း၊ မတရားချုပ်နှောင်ခြင်း၊ အိမ်ကျူးကျော်ဝင်ရောက်ခြင်း နှင့်ထိခိုက်နာကျင်ခြင်း တို့ဖြစ်သည့် ရာဇာဓတ်ကြီး ပုဒ်မ ၃၇၆၊၃၄၂၊ ၄၅၁ နှင့် ၅၀၁ တို့နှင့် လားရှိုး အမှတ်(၁) ရဲစခန်းတွင် အမှုဖွင့် ထားပြီး တရားခံမောင်နေလင်း ကို အောက်တိုဘာ ၁၀ ရက်နေ့တွင် ဖမ်းဆီးချုပ်နှောင်ထားကြောင်း သိရသည်။
“ မုဒိန်းကျင့်ခြင်းပြီးမြောက်မှ မုဒိန်းမှုဖြစ်တယ် ဆိုတာကျနော်တို့ လက်မခံဘူး။ အခု လို အိမ်ထဲကျူးကျော်လာပြီးကျင့်ကြံကတည်းက သက်ငယ်မုဒိမ်းမှုပဲ” ဟု စိုင်းဟန် က မှတ်ချက်ပြုသည်။
ကျေးလက်ဒေသ တွင်နေထိုင်သည့် ပြည်သူများအနေဖြင့် အတင်းအဓမ္မပြုကျင့်ခံရပါက ရှက်ကြောက်စရာ မလိုကြောင်း၊ ကြေအေးစရာမလိုကြောင်း၊ ကျူးလွန်သူများကို ကြီးလေးသည့် ပြစ်ဒဏ်ပေးရန် တိုင်ကြားဖို့လိုအပ်ကြောင်းလည်း လူ့အခွင့်အရေး တက်ကြွဆောင်ရွက်သူများကတိုက်တွန်းပြောဆိုထားသည်။
စက်တင်ဘာ ၁၅ရက် ညပိုင်းတွင်လည်း သျှမ်းပြည်နယ် မြောက်ပိုင်း မိုင်းရယ်မြို့နယ် အတွင်းနေထိုင်းသည့် အသက် ၁၄နှစ် အရွယ် ကျောင်းသူ တဦးကို အမျိုးသားတဦးက သက်ငယ်မုဒိမ်း ကျူးလွန်ခဲ့ကြောင်း သိရသည်။
