တောင်ကြီးတန်ဆောင် မီးပုံးပျံ ပွဲတော်ကို ပွဲရက်လျှော့ချလိုက်သည့် ကိစ္စနှင့် ပတ်သက်၍ တောင်ကြီး မီးပုံးပျံ ပညာရှင်များနှင့် ဒေသခံများက ယခင်နှစ်များ အတိုင်း ပြန်လည်သတ် မှတ်ပေး ရန် သျှမ်းပြည်နယ်ဝန်ကြီးချုပ်ထံ တင်ပြ တောင်းဆို ထားသည်ဟု သိရသည် ။
စက်တင်ဘာ ၆ ရက် ယနေ့ရက်စွဲ ဖြင့် စာတင်ပြခြင်းဖြစ်ပြီး မီးပုံးပျံပွဲတော်အား ယခင်နှစ်များအတိုင်း ၁၀ ရက် ကျင်းပပေးရန်တောင်းဆိုထားသည်။
“ ဒီနှစ်က မီးပုံးပျံ အလုံးရေ ပိုများမယ့်သဘောမှာရှိတယ် ။ မီးပုံးပျံကလဲများမယ်။ ပွဲရက်ကလျှော့ မယ်ဆိုရင် ကျနော် တို့က လွတ်တင်ရေးအပိုင်း မှာ ကျပ်တည်းသွား နိုင်တယ်။ သွားရေးလာရေးကအစ ။အများကြီးအခက်အခဲကြုံနိုင်တယ် ။ ဒီနေ့ရက်စွဲနဲ့ ၀န်ကြီးချုပ်ဆီကို စာတင်သွားတာ ဖြစ်ပါတယ် ” ဟု မီးပုံးပျံ ပညာရှင် ၀ိဇ္ဇာမီးအဖွဲ့ခေါင်းဆောင် ဖြိုးမင်းသန့်ကပြောသည် ။
စက်တင်ဘာ (၃) ရက်နေ့က သျှမ်းပြည်နယ်အစိုးရရုံး ၊ အစည်းအဝေးခန်းမတွင် တောင်ကြီးမြို့တန်ဆောင်တိုင် ရိုးရာ မီးပုံးပျံ ပွဲတော်ပြုလုပ်ကျင်းပနိုင်ရေး ပထမအကြိမ် ညှိနှိုင်း အစည်းအဝေးပြုလုပ်ရာ ပွဲတော်ရက်အား နိုဝင်ဘာလ(၄) ရက်နေ့မှ (၁၂) ရက်နေ့အထိ (၈) ည (၉) ရက်သာကျင်းပရန် ဆုံးဖြတ်ထားကြောင်းသိရသည် ။
မီးပုံးပျံပွဲတော်ကျင်းပသည့်ရက်လျှော့ချပါက မီးပုံးပျံအဖွဲ့အပြင် စျေးသည်များအတွက်လည်းနစ်နာမည်ဖြစ်သကဲ့သို့ နိုင်ငံတော်စီးပွါးရေးနှင့်ခရီးသွားလုပ်ငန်းများပါ လျော့ကျမည်ဖြစ်ကြောင်း မီးပုံးပျံပညာရှင်များကပြောသည်။
၂၀၁၄ ခုနှစ်တောင်ကြီး တန်ဆောင်တိုင်ရိုးရာမီးပုံးပျံပွဲတော် တွင်ရာသီဥတု ကြောင့် ပြိုင်ပွဲဝင် မီးပုံးပျံ(ညမီးကြီး) အလုံး ၄၀ ခန့်လွတ်တင်ရန်ကျန်ရှိပြီး ရှေ့လွတ်တင်ပြီးခဲ့ သော မီးပုံးပျံများကိုသာ ဆုပေးရွေးချယ် သွားခဲ့ခြင်းကြောင့် လွတ်တင်ရန်ကျန်ခဲ့သော မီးပုံးပျံ အဖွဲ့များအတွက် ဆုံးရှံုးနှစ်နာမှုများ ကြံုတွေ့ခဲ့ဖူးကြောင်း သိရှိရပါသည်။
Leave a Comments