စစ်ရေးတင်းမာနေဆဲဖြစ်သော သျှမ်းပြည်မြောက်ပိုင်း ကွတ်ခိုင် တိုးဂိတ်တွင် အိမ်စီးကားတစီး သေနတ်ပစ်ခံရပြီး ယာဉ်မောင်း နားရွက်ကျည်ထိမှန် ဒဏ်ရာရရှိသွားကြောင်း သတင်းရရှိသည်။
သြဂုတ်လ ၂၇ ရက် ယနေ့မနက် ၁၀ နာရီခွဲ ဝန်းကျင်က မူဆယ်မြို့အထွက် ကွတ်ခိုင်တိုးဂိတ် တွင် သေနတ်ပစ်ခံရသည့် အိမ်စီးကားသည် အနက်ရောင် Crown အမျိုးအစား အိမ်စီး ကားဖြစ်ပြီး ၊ ယာဉ်မောင်း မှာ နာရွက် ကျည်ထိမှန်ခဲ့ကြောင်း မျက်မြင်တွေ့ရှိခဲ့သည် ကွတ်ခိုင်ရောက် လားရှိုးဒေသခံ ကိုနေမျိုး က သျှမ်းသံတော်ဆင့် သို့ ပြောသည်။
“ ကားနောက် မှန်ကနေ ဖောက်ပြီး နားရွက်ကို ရှက်ထိတာပါ။ ဦးခေါင်းမထိတာ ကံကောင်းတယ်။ အခုတော့ ကွတ်ခိုင်ဆေးရုံ ပို့လိုက်တယ်။ လမ်းအခြေအနေကတော့မကောင်းသေးဘူး” ဟု ကိုနေမျိုး က ဆိုသည်။
သျှမ်းပြည်နယ် မြောက်ပိုင်း ကွတ်ခိုင်မြို့နယ် အတွင်း မြောက်ပိုင်းမဟာမိတ် (၃)ဖွဲ့ နှင့် မြန်မာ့တပ်မတော် တို့ တိုက်ပွဲသည် ယနေ့တိုင် ပြင်းထန်နေဆဲ ဖြစ်သဖြင့် ခရီးသွားပြည်သူများအနေဖြင့် သတိဖြင့် သွားလာကြရန် လည်း ကိုနေမျိုး က ထပ်လောင်းပြောသည်။
“ ကားနောက်မှန် ကနေ ပစ်တာ နာရွက်ပဲထိလို့ တော်သေးတယ်။ ကားဘီးလည်း ပစ်ခံရတယ်။ အခု ကားတွေကတော့ ကွတ်ခိုင် တိုးဂိတ်မှာ ပိတ်မိနေတယ်” ဟု မူဆယ်ကားသမား စိုင်းကွမ်းက သျှမ်းသံတော်ဆင့် သို့ ပြောသည်။
ထို့ပြင် ယမန်နေ့ ညနေ ၅နာရီတွင်လည်း ကွတ်ခိုင်-မူဆယ်ကြား ရှိ မန်လွယ်နှင့် နမ့်ဖတ်လွန်းကြားတွင် တွဲကား ၈စီး တာယာ သေနတ်ပစ်ခံရသေးကြောင်း၊ ကားသမားများကို ဦးတည် တိုက်ခိုက်မှု ရပ်တန့်ပေးရန် လည်း စိုင်းကွမ်း က ပြောသည်။
ဝမ်းရေးအတွက် ရုန်းကန်လှုပ်ရှားနေရသည့် ခရီးသွားပြည်သူများ ကို ငဲ့ညှာပြီး နယ်စပ်ကုန်သွယ်ရေး လမ်းကြောင်းပေါ်တိုက်ပွဲများ ရပ်တန့်ပေးစေလိုကြောင်းလည်း မူဆယ်- မန္တလေးပြေးဆွဲနေသည့် ကားသမားများက တောင်းဆိုလိုက်သည်။
မြန်မာ့တပ်မတော်နှင့် ညီနောင် မဟာမိတ်(၃) ဖွဲ့ တို့ ကြား ဖြစ်ပွားနေသည့် တိုက်ပွဲများမှာ တရက်ပြီး တရက် ပိုပြီးပြင်ထန်းလာသည့်အတွက် ခရီးသွားပြည်သူများ၊ လူမှု ကူညီ ကယ်ဆယ်ရေး အသင်းအဖွဲပများ အနေဖြင့် လမ်းခရီးအခြေအနေများကို သေချာစွာ လေ့လာစုံစမ်းပြီး သွားရန်လည်း သြဂုတ် ၂၅ရက်နေ့ တွင် ညီနောင်မဟာမိတ် (၃) ဖွဲ့ က ထုတ်ပြန်ကြေညာခဲ့သည်။
Leave a Comments