Thursday, April 18, 2024

တာမိုးညဲ တွင် တိုက်ပွဲကြောင့် အသက် ၁၉ နှစ်အရွယ် လူငယ်တဦး ကျည်ထိမှန်သေဆုံး

Must read

သျှမ်းပြည်နယ် မြောက်ပိုင်း ကွတ်ခိုင်မြို့နယ် တာမိုးညဲ မုံးစီးကျေးရွာ တွင် တိုက်ပွဲကြောင့် အသက် ၁၉ နှစ် အရွယ် လူငယ်တဦး ဦးခေါင်း ကျည်ထိမှန် သေဆုံးခဲ့ကြောင်း သတင်းရရှိသည်။

Photo Credit to Kutkai Nsen – ကျည်ထိမှန်သေဆုံးခဲ့သည့် အသက် ၁၉ နှစ် အရွယ် လူငယ် ၏ အလောင်းအား ဆွေမျိုးမိဘများက ပြန်လည်သဂြိုဟ်ပေးနေစဉ်

သြဂုတ် ၁၃ ရက် ညနေ ၃ နာရီခွဲက တာမိုးညဲ မုံးစီး ကြား တအာင်း(ပလောင်) အမျိုးသားလွတ်မြောက်ရေး တပ်မတော် (TNLA) နှင့် မြန်မာ့တပ်မတော်တို့ ထိတွေ့မှု ဖြစ်ပွားရာ လူငယ် ၂ ဦးနှင့်ကျောင်းအုပ်တဦးတို့ ခေတ္တရပ်ဆိုင်းပြီး ပုန်းရှောင်နေစဉ် ကျည်ဆံထိမှန်ခြင်းဖြစ်ကြောင်း တာမိုးညဲ ဒေသ အသင်းတော် ဆရာ နော်ဆန့် က သျှမ်းသံတော်ဆင့် သို့ပြောသည်။

“ ၁၉ နှစ်အရွယ် လူငယ်လေးက သူ့ညီနဲ့အတူတူ ခြံသွားပြီး အပြန်လမ်းမှာ ကျည်ဆံထိမှန်တာ။ ခေါင်းမှာထိ သွားတာ။ မုံစီး အထက်တန်းကျောင်းက ကျောင်းအုပ်ကတော့ နံရိုးပဲ ထိတာပါ။ ကွတ်ခိုင်ဆေးရုံပို့ထားတယ်” ဆရာ နော်ဆန့် က ဆိုသည်။

Photo Credit to Kutkai Nsen – မုံးစီးအထက်တန်းကျောင်းအုပ်အား ကျည်ဆံထိမှန်သည့်ဒဏ်ရာ

တိုက်ပွဲ ပြင်းထန်မှုကြောင့် ကျည်ထိမှန်သေဆုံးခဲ့သည့် အသက် ၁၉ နှစ် အရွယ် လူငယ် ၏ အလောင်းကို ကားလမ်းမဘေးတွင် မြန်မာ့တပ်မတော်မှ ယာယီ မြုပ်နှံခဲ့ပြီး သြဂုတ်လ ၁၄ ရက်နေ့မှ ဘာသာရေး အသင်းတော်နှင့် လူငယ်၏ ဆွေမျိုးများက အလောင်းပြန်သွားဖော်ကာ ပြန်လည် သဂြိုလ်ပေးခဲ့သည် ဟု ဆရာ နော်ဆန့် က သျှမ်းသံတော်ဆင့် ကို ပြန်ပြောပြသည်။

“ မနေ့ကမှ ကျနော်တို့ လူငယ်ရဲ့ အလောင်းကို ပြန်သွားဖော်ပြီး ဘာသာရေး ထုံစံ နဲ့ပြန်သဂြိုလ်ခဲ့ပါတယ်” ဟု ဆိုသည်။

ကွတ်ခိုင်မြို့နယ် တာမိုးညဲဒေသ တွင် နေ့စဉ်တိုက်ပွဲများဖြစ်ပွားမှုကြောင့် ဒေသခံများ လယ်ယာများ၊ ခြံများ သွားရန် ခက်ခဲ နေသည် ဟု လည်း တာမိုးညဲ ဒေသခံများက ဆိုသည်။

“ တိုက်ပွဲက နေ့တိုင်းဖြစ်နေတာ။ ကွတ်ခိုင် တာမိုးညဲ လမ်းဖြစ်လိုက်။ တာမိုးညဲ မုံးစီးလမ်းပေါ် ဖြစ်လိုက်ပါပဲ။ ပြည်သူတွေကတော့ လယ်ဆင်းဖို့ အတွက် ခက်ခဲတယ်။ စိုးရိမ်နေရတယ်” ဟု တာမိုးညဲ ဒေသခံ အမျိုးသား တဦး က ဆိုသည်။

သြဂုတ်လ ၁၁ ရက်နေ့တွင် လည်း တာမိုးညဲ ဒေသ မော်ဟန်ကျေးရွာ အုပ်စု ဖက်ကာ အနီးတွင် အသက် ၁၇ အရွယ် လူငယ်တဦး လက်နက်ကြီး ထိမှန်ခဲ့ကြောင်း မော်ဟန်ကျေးရွာ သင်းထောက် ဆရာ တဦး က ပြောသည်။

သျှမ်းပြည်နယ်မြောက်ပိုင်း အတွင်း မြန်မာ့တပ်မတော်နှင့် TNLA အပါအဝင် မဟာမိတ် ညီနောင် များဖြစ်သည့် ကိုးကန့် (MNDAA)၊ ရက္ခိုင့် ( AA) တပ်မတော်တို့သည် တိုက်ပွဲများ ပြင်းထန်နေကြောင်း သိရသည်။

Leave a Comments

- Advertisement -spot_img

Latest article