သျှမ်းပြည်နယ်အဆင့်နှင့်ခရိုင်အဆင့် ပစ်ခတ်တိုက်ခိုက်မှုရပ်စဲရေးစောင့်ကြည့်ရေးအဖွဲ့များအား ဗြိတိသျှသံအမတ်များက တွေ့ဆုံမှုပြုပြီး ဒေသတွင်းဖြစ်ပေါ်နေသည့်အခြေအနေများ ကိုမေးမြန်းခဲ့ကြောင်းသိရသည်။

သျှမ်းပြည်နယ် JMC-S နှင့် JMC-L လူထုကိုယ်စားလှယ်များအား ဇွန်လ ၆ ရက် နံနက် ၁၁ နာရီမှ ၁၂ နာရီအထိ တောင်ကြီးမြို့ကောင်းလွန်းဟိုတယ်တွင် ဗြိတိသျှသံရုံးမှ ကိုယ်စားလှယ်နှင့်အဖွဲ့ကတွေ့ဆုံခဲ့ကြောင်း တွေ့ဆုံမှုတွင်ပါ၀င်ခဲ့သည့် JMC-L မှ လူထုကိုယ်စားလှယ် ဆရာစိုင်းကျော်လှကပြောသည်။

“အချက်အလက်တွေ သူတို့လာမေးတယ်။ ကျနော်တို့ သျှမ်းပြည်မှာ အပစ်ရပ်ပြီးနောက်ပိုင်း ဘယ်လိုတွေ ဆက်ဖြစ်နေသလဲ။ JMC-L တွေအနေနဲ့ ဘာအလုပ်တွေလုပ်ခဲ့ရသလဲ။ ဘယ်လိုအခက်အခဲတွေရှိသလဲ စသဖြင့် မေးမြန်းသွားပါတယ်။ ကျနော်တို့ကြားသိရသလောက်တော့ JMC လုပ်ငန်းတွေ ဆက်လက်လုပ်ဆောင် သွားနိုင်ဖို့အတွက်ကူညီထောက်ပ့ံမှုတွေ ပေးမယ်လို့ ဆိုပါတယ်။ ဒါပေမယ့် ခုလောလောဆယ်တော့ အချက်အလက်ဘဲကောက်ယူသွားပါတယ် ”- ဟု သျှမ်းသံတော်ဆင့်အားဖြေကြားခဲ့သည်။

တွေ့ဆုံပွဲသို့ JMC-S (သျှမ်း) ဒုတိယဥက္ကဋ္ဌ (၂) ဦးအောင်စိုးမိုး၊ ကော်မတီဝင်များ ဖြစ်ကြသော ဦးဝင်းတင်၊ ခွန်ကျော်ဆွေ၊ ဒေါ်နန်းခင်စန်းယု၊ JMC-L (လင်းခေး) မှ ကော်မတီဝင်များ ဖြစ်ကြသော ဦးစိုင်းကျော်လှ၊ ဒေါ်နန်းလဲ့လဲ့အေး၊ ဗြိတိသျှသံရုံးမှ Mr. Edward Bell (Second Secretary, Security Sector Advisor – CSSF) ဦးဆောင်သော ကိုယ်စားလှယ်အဖွဲ့ဝင် လေးဦးနှင့် JMC-S (သျှမ်း) ရုံးဝန်ထမ်းများ ပါဝင်တက်ရောက်ကြောင်းသိရသည်။

“ကျနော်တို့လုပ်နေတဲ့လုပ်ငန်းတွေကတော့ အခု ငြိမ်းချမ်းရေးနဲ့ပတ်သက်ပြီး ဒေသခံလူထုကို ကွင်းဆင်း တွေ့ဆုံရှင်းလင်းတယ်။ ငြိမ်းချမ်းရေးနဲ့ပတ်သက်တာတွေကိုလူထုကို သင်တန်းပေးတယ်။ခုတောင်မှ နမ့်စန်မှာလုပ်နေတယ်သင်တန်း။ လာမယ့်အပတ်ကျတော့ တောင်ကြီးမှာလုပ်မယ်။ အဲတာတွေပေါ့။”- ဟု လည်း စိုင်းကျော်လှ ကပြောသည်။

အလားတူပင် ကရင်ပြည်နယ်တွင်လည်း ကရင်ပြန်နယ်၏ JMC-S နှင့် JMC-L ကိုယ်စားလှယ်များအား ဗြိတိသျှသံရုံးမှ Ms. Jasveen Kakaria (CSSF Program Manager) ဦးဆောင်သော ကိုယ်စားလှယ်အဖွဲ့ဝင် များက ဇွန်လ ရ ရက်နေ့ကတွေ့ဆုံက အချက်အလက်များ မေးမြန်းမှတ်သားကောက်ယူ သွားခဲ့ကြောင်း သိရပါသည်။