ထိုင်းနိုင်ငံ မြောက်ပိုင်း ခရိုင် ၉ ခု တွင် နေထိုင် အလုပ်လုပ်သည့် မြန်မာ နိုင်ငံကူး လက်မှတ်ကိုင်ဆောင်သူများ၏ ကလေးငယ်များ ၂၀၁၉ – ၂၀၂၀ ပညာသင်နှစ် အခြေခံပညာ အထက်တန်း စာပေး စာယူ  အတွက် ကျောင်းအပ်လက်ခံကြောင်း သတင်းရရှိသည်။

ထိုင်းနိုင်ငံ မြောက်ပိုင်း ခရိုင် ၉ ခု ဖြစ်သည့် ချင်းမိုင်ခရိုင်၊ လမ်းဖွန်း ခရိုင် ၊ လမ်းပန်းခရိုင်၊ အွတ်တရဒစ်ခရိုင်၊ ဖရယ့်ခရိုင်၊ နန့်ခရိုင်၊ ဖရောဝ့် ခရိုင်၊ ချင်းရိုင်းခရိုင်နှင့် မယ်ဟောင်ဆောင်ခရိုင်အတွင်းနေထိုင် အလုပ်လုပ်သည့် မြန်မာနိုင်ငံကူးလက်မှတ်ကိုင်ဆောင်သူများ၏ ကလေးများ အခြေခံ ပညာစာပေးစာယူ သင်တန်း အပ်နှံလက်ခံကြောင်း ချင်းမိုင်မြို့ မြန်မာနိုင်ငံ ကောင်စစ်ဝန်ချုပ်ရုံးက မတ်လ ၂၄ ရက်နေ့ ရက်စွဲဖြင့် ထုတ်ပြန်ခဲ့သည်။

သူငယ်တန်းသို့ တက်ရောက်သင်ယူခွင့် လျှောက်ထားသူသည် ၂၀၁၉ ခုနစ် မေ ၃၁ ရက်တွင် အသက် ၅ နှစ်ပြည့်ပြီးသူဖြစ်ပြီး၊ မွေးစာရင်းမိတ္တူ တင်ပြရမည် ဖြစ်သည်။

ထို့ပြင် အခြား အတန်းများ အတွက် ၂၀၁၈- ၂၀၁၉ ပညာသင်နှစ် အမြင့်ဆုံးအောင်မြင်ခဲ့သည် အတန်းအထောက်အထား အဖြစ်အောင်လက်မှတ် (သို့မဟုတ်) ကျောက်ထွက်လက်မှတ် တင်ပြရမည် ဖြစ်ကြောင်း နဝမတန်း နှင့် ဒသမတန်း တက်ရောက်ညမ့် သူများအနေဖြင့် စိတ်ကြိုက်ဘာသာတွဲ ၈ခုအနက် မိမိတို့ ရွေးချယ်ထားသည် စိတ်ကြိုက်ဘာသာတွဲကို ဖော်ပြရမည် ဟု ကြေညာချက်တွင် ရေးသားထားသည်။

သင်တန်း ဝင်ခွင့်ရသည့် ကျောင်းသားများသည် (ပြည်ပစာစစ်ဌာန )ထိုင်းနိုင်ငံ ချင်းမိုင်မြို့ မြန်မာ ကောင်စစ်ဝန်ချုပ်ရုံးတွင် စာမေးပွဲဝင်ရောက်ဖြေဆိုရမည်ဖြစ်ပြီး ပထမ နှစ်ဝက်၊ ဒုတိယ နှစ်ဝက် စာမေးပွဲ ဝင်ရောက်ဖြေဆို အောင်မြင်မှသာ အောင်စာရင်း ထုတ်ပေးမည် ဟုလည်း သိရသည်။

ယမန်နှစ်က ထိုကဲ့သို့သော အခြေခံပညာအထက်တန်းအတွက် စာပေးစာယူ (အဝေးသင်) စနစ်ဖြင့် လျှောက်လွာတင်ခဲ့သည့်ကျောင်းသားများမှာ သူငယ်တန်း ၂ ဦး၊ နဝမတန်း ၂ ဦး နှင့် ဒသမတန်း ရ ဦး ရှိကြောင်း မြန်မာသံရုံး ချင်းမိုင်မြို့က ထုတ်ပြန်သည်။

ယခင်တွင် မြန်မာသံရုံး အသိုင်းအဝန်းမှ ကလေးငယ်များကို သာ ခွင့်ပြုခဲ့ပြီး လက်ရှိအစိုးရ လက်ထက်မှ စတင်ကာ ပြည်ပ ရောက် မြန်မာ အလုပ်သမား ကလေးများကို လက်ခံလာခြင်းဖြစ်သည်။

နိုင်ငံခြားရောက် မြန်မာ နိုင်ငံသားကလေး များသည် အခြေခံ ပညာစာပေးစာယူ သင်တန်းများအတွက် စာမေးပွဲ ဖြေဆိုရာတွင် ပညာရေး ဝန်ကြီး ဌာန မှ ချမှတ်ထားသည် စာမေးပွဲ စည်းမျဉ်း စည်းကမ်း များကို အတိအကျ လိုက်နာရမည် ဖြစ်ပြီး ပြည်ပစာစစ်ဌာန ချင်းမိုင်မြို့ (မြန်မာ ကောင်စစ်ဝန်ချုပ်ရုံး) အနေဖြင့်လည်း စာမေးပွဲ စည်းမျဉ်းစည်းကမ်း များအတိုင်းသား ဆောင်ရွက်မည်ဖြစ်ကြောင်း အသိပေး ကြေညာထားသည်။