သျှမ်းပြည်နယ် အတွင်းရှိ ပြည်တွင်းလေဆိပ် များတွင် ခရီးသွားပြည်သူများထံမှ အခကြေးငွေ ကောက်ခံမှုများရှိနေကြောင်း ခရီးသွားဧည့်သည်များကပြောသည်။
သျှမ်းပြည်နယ် နယ်စပ် ဒေသ ဖြစ်သည့် တာချီလိတ် နှင့် လားရှိုး လေဆိပ်သို့ လိုက်ပါသည့် ခရီးသည် များကို လေဆိပ်တွင် အလုပ်လုပ်နေသည့် (ပြင်ပအလုပ်သမား)များက အခကြေးငွေ အပို ကောက်ခံနေကြကြောင်း ထိုကောက်ခံမှု နှင့် ပတ်သက်ပြီး ခရီးသွားများ မလိုလားကြောင်းလည်း တာချီလိတ်ခရီးသည် စိုင်းရွက် က ပြောသည်။
“ လားရှိုးလေဆိပ်မှာ တအိတ်တထောင် ပေးရတယ်။ အခု တာချီလိတ်ပြန်မယ်ဆိုတော့ security scan (လုံခြုံရေး စက်) စတေကာ အတွက် တယောက် တထောင် နဲ့ အိတ်သယ်ခ တယောက်တထောင် ထပ်ပေးရတယ်” ဟု စိုင်းရွက် ကပြောသည်။
ကောက်ခံသည့်ငွေကြေးပမာဏမှာ အနည်းငယ်သာဖြစ်သည်ဆိုကြသော်လည်း တရားဝင်ကောက်ခံခြင်းမျိုး မဟုတ်ဘဲ အိတ်သယ်ခြင်း ၊အိတ်များစောင့်ရွေးခြင်း တို့တွင်ပါမကျန် တောင်းခံနေသည့်အပေါ် သက်ဆိုင်ရာ အာဏာပိုင်များအနေဖြင့် ကွင်းဆင်းစစ်ဆေးပေးစေလိုကြောင်း စိုင်းရွက်ကပြောသည်။
“ကျမတို့ ပြည်သူတွေ ကို ဘာမှ မသိဘူးဆိုပြီး ခေါင်းစဉ် အမျိုးမျိုးတပ် ငွေတောင်းကြတယ်။ အိတ်ရွေးတာက စပေးရတာတော့ မဟုတ်သေးဘူး။ တချို့ဆို အိတ်သေးသေးလေးတွေက စ ငွေကောက်တယ်။ နိုင်ငံတကာမှာ တန်ပို ခ ဆောင်ရတာပဲရှိတယ်။ ကျမတို့ သျှမ်းပြည်ကတော့ ရှိသမျှ အိတ်ဖိုးပေးနေရတယ်။ တနေရာတထောင်စီ ဘဲဆိုပေမယ့်လည်း ပေးရတဲ့နေရာတွေများပြီး တရက်ကို လူ ရာချီ သွားလာနေတော့ သူတို့ရသွားတဲ့ငွေက မနည်းဘူး။ ဒီ ပြသနာကို သက်ဆိုင်ရာက သိရက်နဲ့ လွှတ်ထားတာလား ။ လာရောက်စစ်ဆေးအရေးယူပေး စေချင်ပါတယ်။ ” ဟုလည်း ထိုင်းနိုင်ငံသို့အလုပ်သွားလုပ်မည့် ခရီးသည် အမျိုးသမီး နန်းမြ က ပြောသည်။
အဆိုပါအပိုပေးဆောင်မှုများသည် တရားဝင်ဆိုပါက အများပြည်သူမှသိရှိရအောင် တရားဝင်အတည့်အလင်းကြေငြာသင့်ကြောင်း လေကြောင်းခရီးသည်များကပြောဆိုနေသည်။
၄င်းကိစ္စနှင့်ပတ်သက်ပြီး တာချီလိတ် လေယာဉ်လက်မှတ် အရောင်းဌာန မှ နန်းချယ်ရီ က အဆိုပါ လေဆိပ်တွင်း အပို အခကြေးငွေတောင်းခံမှုသည် တရားမဝင် တောင်းခံခြင်းဖြစ်ကြောင်း၊ ထိုကဲ့သို့ မကောက်ခံရန် မကြာခဏ တားမြစ်ထားသော်လည်း အရေးယူမှု အားနည်းနေကြောင်းပြောသည်။
“ တကယ်တော့လက်မှတ်ထဲမှာ လေဆိပ်ခွန် ပါပြီးပြီ။ ဘာမှ ထပ်ပေးစရာမလိုတော့ဘူး” ဟု လည်း နန်းချယ်ရီ ကဆိုသည်။
ခရီးသွားဧည့်သည်များ အနေဖြင့် လေယာဉ်လက်မှတ် ဝယ်သည့်အချိန်တွင် နိုင်ငံတော် အတွက် အခွန်ခ ပေးဆောင်ပြီးဖြစ်ကြောင်း၊ လက်ရှိ လေဆိပ်တွင် ကောက်ခံသည့် သူများသည် လေကြောင်း အရာရှိ လက်အောက်နှင့် သက်ဆိုင်ကြောင်း လည်း နန်းချယ်ရီ က ဆိုသည်။
သို့သော် လဝက၊ အကောက်ခွန်များ၊ အစိုးရအာဏာပိုင်များမှ ခရီးသွားလူထုအပေါ် ငွေကြေးကောက်ခံမှုများမှာမူ ယခု ၃-၄ နှစ်အတွင်း မရှိသလောက်အထူးလျော့နည်း သွားကြောင်းလည်း တာချီလိတ်-ဟဲဟိုး ပုံမှန်ခရီးသည် ဦးစိုင်းကလည်း ပြောဆိုပါသည်။
