သျှမ်းပြည်မြောက်ပိုင်း လားရှိုးမြို့နယ် မိုင်းပိုင်အုပ်စုတွင် ရွာအုပ်ချုပ်ရေးမှူး နှင့် ဒေသအတွင်း လက်နက်ကိုင် အဖွဲ့နှင့်ပူးပေါင်းပြီး သားဖြစ်သူအား သတ်ဖြတ်သည်ဟုဆိုကာ မိခင်ဖြစ်သူက လားရှိုးမြို့မရဲစခန်းသို့လာရောက် အမှုဖွင့် တိုင်ကြားထားကြောင်းသိရသည်။
လားရှိုးမြို့အရှေ့တောင်ဘက်ရှိ မိုင်းပိုင်ကျေးရွာအုပ်စု ကောင်းဟုန်းရွာနေ စိုင်းအိုက်ထွန်း အသက် ၃၄ နှစ်အား ဒေသတွင်းပြည်သူ့စစ်များနှင့်အာဏာပိုင်များက ဇန်နဝါရီလနှောင်းပိုင်းက ဖမ်း ချုပ်ရိုက်နှက်ရာ စိုင်းအိုက် ထွန်း သေဆုံးသွားသည့်အပေါ်တရားမျှတမှုရရှိရေး စိုင်းအိုက်ထွန်း ၏ မိခင်ဖြစ်သူက မတ်လ ၁၄ ရက်နေ့က လားရှိုးမြို့နယ် ရဲစခန်းသို့အမှုဖွင့်လိုက်ကြောင်း သိရသည်။
စိုင်းထွန်း၏မိခင်ဖြစ်သူ ပါ့နန်းကောင်က – “ဟုတ်တယ် ကျမရဲ့သားက အရူး။ စိတ်မနှံ့ဘူး။ ဒါပေမယ့် သူက တခြားသူတွေကိုအနှောင့်အယှက်သွားမပေးဘူး။ သူ့ဟာသူအိမ်မှာဘဲနေနေတာ။ အဲတာကို ရပ်ရွာထဲကအကြီး အကဲတွေနဲ့လက်နက်ကိုင်ပြည်သူ့စစ်တွေက ဇန်နဝါရီလ ၂၉ ရက်နေ့က ကျမတို့အိမ်ကိုရောက်လာပြီး ကျမ သားကိုဖမ်းဆီးပြီးကြိုးနဲ့ချည်တယ်။ ပြီးရင်ရိုက်တယ်။ ရွာထဲမှာအရူးမထားနဲ့ ဆိုပြီးထမင်းလည်း ပေးမကျွေးဘူး ။ မနက်ရောက်တော့ ကျမသား သေပြီလေ။” – ဟု စိုင်းအိုက်ထွန်း၏မိခင်ဖြစ်သူ ပါ့နန်းကောင် ကပြောသည်။
သတင်းပေါက်ကြားပါက ခွင့်လွှတ်မည်မဟုတ်လည်းပြောဆိုသဖြင့် ပါ့နန်းကောင်တို့မိသားစုသည် လက်ရှိတွင် ကောင်းဟုန်းရွာတွင် မနေရဲတော့ဘဲ တခြားရွာသို့ တိမ်းရှောင်ခိုလှုံနေရကြောင်း သူမ ကပြောသည်။
“ပြည်သူ့စစ် ၃ ယောက်ပါတယ်။ သတင်းပေါက်ကြားရင်တဆွေလုံးတမျိုးလုံးရှင်းလင်းပစ်မယ်ဆိုလို့ ကျမတို့တဆွေလုံးတမျိုးလုံးက ရွာမှာမနေရဲတော့ဘူး။ ကျမ အိမ်ကိုလည်းသူတို့မီးရှို့ပစ်လိုက်တယ်။ ကျမ မှတ်ပုံတင်တွေ အိမ်ထောင်စုစာရင်းတွေဘာဆိုဘာမှမရခဲ့ဘူး။ မီးထဲအကုန်ပါသွားတာ။ ဒီလုပ်ရပ်တွေကို တရားဥပဒေနဲ့ ဖြေရှင်းသွားမယ်။ တရားမျှတမှုဖြစ်စေချင်ပါတယ်။” – ဟု ပါ့နန်းကောင် က သျှမ်းသံတော်ဆင့် အားပြောသည်။
၄င်းနှင့်ပတ်သက်ပြီး သက်ဆိုင်ရာကျေးလက်အာဏာပိုင်ထံ သျှမ်းသံတော်ဆင့်မှ ကြိုးစားဆက်သွယ် သော်လည်း ဆက်သွယ်၍မရခဲ့ပေ။
နစ်နာသူမိသားစုကလည်း သက်ဆိုင်ရာလူမှုအဖွဲ့အစည်းအပြင် သျှမ်းနိုင်ငံရေးပါတီတခုဖြစ်သော လားရှိုး မြို့နယ်ရှိ ကျားခေါင်းပါတီ SNLD ထံလည်းအကူအညီတောင်းထားသည်ဟုသိရသည်။
အဆိုပါ သေမှုသေခင်းဟုတ်မှန်ကြောင်း လားရှိုးခရိုင် အမျိုးသားလွှတ်တော်ကိုယ်စားလှယ် စိုင်းဝမ်းလျန်းခမ်းက -“ ဒီဖြစ်စဉ်က ခြေလွန်လက်လွန်ဖြစ်တဲ့ အပြင် မိဘပြည်သူလူထုအပေါ် အခွင့်အရေးချိုးဖောက်တယ်။ နိုင်ငံတော်ဥပဒေကိုလည်း ချိုးဖောက်တယ်။ ဒါလုံးဝမဖြစ်သင့်ဘူး။ ကျနော်တို့လည်း မိဘပြည်သူဘက်က ရပ်တည်ပြီး စောင့်ကြည့်နေပါတယ်။ တရား ဥပဒေအတိုင်းဖြစ်စေချင်ပါတယ်။ တရားမျှတစွာဆောင်ရွက်ပေးပါလို့ တိုက်တွန်းချင်ပါတယ် ” – ဟု သျှမ်းသံတော်ဆင့်အားပြောသည်။
ရိုက်နှက်ခံရသူ စိုင်းအိုက်ထွန်းသည် မိုင်းပိုင်အုပ်စု ကောင်းဟုန်းရွာ နေ လုံးစိုင်းအောင်ဘ နှင့် ပါ့နန်းကောင် တို့၏ သားဖြစ်ပြီး မွေးချင်းညီအကိုမောင်နှမ ၃ ယောက်ရှိကြောင်း၊ ၄င်းမှာ ဒုတိယ သားဖြစ်ကြောင်း သိရပါ သည်။
