လူသားချင်းစာနာမှုဖြင့် စစ်ဘေးသင့် ပြည်သူများအား ကူညီကယ်ဆယ်ခဲ့သည့် “ နယ်စည်းမခြား ပရဟိတ (သီပေါ)” အား သျှမ်းတိုင်းရင်းသားများ ဒီမိုကရေစီ အဖွဲ့ချုပ်က ဂုဏ်ပြု ချီးမြှင့်ခဲ့ကြောင်းသိရသည်။
သျှမ်းပြည်နယ် မြောက်ပိုင်း သီပေါမြို့တွင် စစ်ဘေးသင့် ပြည်သူများ အား လူမျိုးမရွေး လူသားချင်း စာနာမှု သက်သက်ဖြင့် အချိန်မရွေး သက်စွန့်ဆံဖျား ကူညီပေးသည့် “ နယ်စည်းမခြား ပရဟိတ (သီပေါ)” အသင်းအား သီပေါမြို့နယ် သျှမ်း တိုင်းရင်းသား များဒီမိုကရေစီ အဖွဲ့ချုပ် မှ မတ်လ ၉ ရက်နေ့က ဂုဏ်ပြုမှတ်တမ်းလွှာ ပေးခဲ့ခြင်းဖြစ်သည်။
“ နာရေးကိစ္စတွေ ကူညီဆောင်ရွက်တဲ့နေရာကနေ ၃ နှစ်အတွင်းမှာ စစ်ဘေးရှောင်တွေရှိလာတော့လည်း ရှေ့တန်းမှာ မားမားမတ်မတ် ကူညီ ကယ်ဆယ်နိုင်ခဲ့တယ်။ နေ့ ည မနား၊ ဖြစ်ပြီးဆိုရင် အမြဲ အားကိုးရတဲ့အဖွဲ့ ဖြစ်တော့ ကျနော် တို့ပါတီကဂုဏ်ပြုရတာဖြစ်ပါတယ်။ ကျနော်တို့က အချင်းချင်း အားပေးတဲ့ သဘောပါ” ဟု သျှမ်းတိုင်းရင်းသားများ ဒီမိုကရေစီ အဖွဲ့ချုပ် (SNLD) မှ သျှမ်းပြည်နယ် မဲဆန္ဒနယ် အမှတ်(၃) အမျိုးသားလွှတ်တော် ကိုယ်စားလှယ် စိုင်းဝမ်းလှိုင်းခမ်းက ပြောသည်။
စစ်ဘေးသင့် ပြည်သူများကို တိုက်ပွဲများကြားမှ အသက်ကို ပမာန မထားဘဲ ကယ်ထုတ်ခြင်းသည် “ နယ် စည်းမခြား ပရဟိတ” အသင်း၏ ကောင်းမွန်သည့် စေတနာဖြစ်ကြောင်း စိုင်းဝမ်းလှိုင်းခမ်း က ပြောသည်။
“ တဖက်မှာလည်း တိုက်ကြ ခိုက်ကြ သတ်ဖြတ်မှုတွေရှိသလို လူမှု ကွန်ရက် စာမျက်နှာပေါ်မှာ သွေးထိုးလှုံ့ဆော်မှုတွေ ရှိနေပေမယ့် တဖက်မှာ ဒုက္ခရောက်နေချိန် အသက်ကို စွန့်ပြီး ကယ်နေတာ တွေရှိနေပါတယ် ဆိုတာ မီးမှောင်းထိုးပြ ဖို့ လိုပါတယ်” ဟု သူက ထပ်လောင်း ပြောသည်။
“ နယ်စည်းမခြား ပရဟိတ (သီပေါ) ” သည် နားရေ ကူညီမှုလုပ်ငန်းများ ကူညီဆောင်ရွက်နေသည့် အပြင် လက်ရှိမှာ သျှမ်းပြည်နယ် မြောက်ပိုင်းတွင် တိုက်ပွဲများ ဆက်တိုက်ဖြစ်ပွားကာ စစ်ဘေးရှောင် များ အတွက် ဘေးကင်းလုံခြုံသည့်နေရာ ရောက်ရှိအောင် ကယ်ထုတ်ပေးခြင်း၊ တိုက်ပွဲများကြားတွင် လည်း အသက်ကို စွန့်ကာ ကူညီမှုများ ဆက်လက် လုပ်ဆောင်မှုများပြုလုပ်သည့် အသင်း တခုဖြစ်သည်။
“ ကိုယ့် တိုင်းရင်းသားအချင်းချင်းကနေပြီး ကျနော်တို့ကို အသိအမှတ်ပြုပေးတဲ့အတွက် ကျေးဇူးတင်ပါတယ်။ ဝမ်းသာပါတယ်။ ကျနော်တို့ အလိုချင်ဆုံးက ပြည်သူလူထုရဲ့ အားပါ။ အဲ့အား က အရမ်းအရေးကြီးပါတယ်။ အဲ့အားတွေနဲ့ပဲ ကျနော်တို့ ရှင်သန်နေရတဲ့အတွက် ကျေးဇူးပါ” ဟု နယ်စည်းမခြား ပရဟိတ (သီပေါ) မှ ကိုမျိုးက ပြောဆိုလိုက်သည်။
လက်ရှိမှာ စစ်မြေပြင် တွင် ကွင်းဆင်းကာ စစ်ဘေးသင့်များကို ကယ်ထုတ်သည့် အခါ စိန်ခေါ်မှု၊ အခက်အခဲများစွာရှိသော်လည်း ဒုက္ခရောက်နေသည့် တိုင်းရင်းသားများအား သွားကူသည့်အခါ အတားအဆီးများမရှိစေချင်ကြောင်း၊ အားလုံးမှလည်း လူသားချင်း စာနာစိတ်ဖြင့် ဝိုင်းဝန်း ပြီး ကူညီပေးစေချင်ကြောင်းလည်း ကိုမျိုးက ဆိုသည်။
“သျှမ်းမြောက် ဒေသအတွင်း တိုက်ပွဲများ အမြန်းဆုံး ရပ်တန့်ကာ၊ ကိုယ့်ဒေသ ကိုယ်နေရပ် အမြန်ပြန်ပြီး အလုပ်လုပ်စေချင်ပြီ ” ဟုလည်း ကိုမျိုးက ပြောသည်။
သျှမ်းမြောက် သီပေါမြို့နယ် အတွင်းတိုင်းရင်းသားလက်နက်ကိုင် အချင်းချင်း တိုက်ပွဲဖြစ်ပွားမှုကြောင့် သီပေါမြို့နယ် အတွင်း စစ်ဘေးရှောင် ၂ ထောင်ကျော် ရှိနေကြောင်း လည်း သိရသည်။
Leave a Comments