သျှမ်းပြည်တောင်ပိုင်းလဲချားမြို့နယ် ထွန့်ယိမ်းအုပ်စုအတွင်း သျှမ်းအမျိုးသားကျောင်းများနှင့် ဆရာ ဆရာမ များအား အစိုးရ၏ တပ်မတော်မှဝင်ရောက်စစ်ဆေးသည့်အပေါ် ငြိမ်းချမ်းရေးသရုပ်သကန်မမြင်တွေ့ရကြောင်း RCSS ခေါင်းဆောင် ဗိုလ်ချုပ်ကြီးယွက်စစ်က ပြောဆိုလိုက်သည်။

ဂျန္နဝါရီလ ၁၁ ရက်နေ့က ခိုလမ်အခြေစိုက် ရလခတိုင်းမှ ညွှန်ကြားမှုဟုဆိုကာ အစိုးရတပ်မတော် ရလခ ၅၂၅ တပ်မှ အင်အား ၃၀ ခန့်သည် လဲချားမြို့နယ် ထွန့်ယိမ်းအုပ်စု ဖလားလိန်ဆီရွာရှိ သျှမ်းစာပေသင်ကြားသည့် ကိုယ်ထူကိုယ်ထ အမျိုးသားကျောင်းသို့ရောက်ရှိကာ စစ်ဆေးမှုပြုလုပ်ခဲ့ခြင်းဖြစ်သည်။

အခုနောက်ပိုင်း အစိုးရရဲ့တပ်မတော်က သျှမ်းပြည်အမျိုးသားကျောင်းက ဘယ်မှာတွေရှိသလဲ။ RCSS/SSA ကထောက်ပ့ံကူညီပေးတဲ့ကျောင်းဘယ်မှာရှိသလဲ လို့စုံစမ်းနေတယ်။ RCSS/SSA က ထောင်ထားတဲ့ မူးယစ်ဆေးဝါးတိုက်ဖျက်မှုစခန်းက ဘယ်မှာရှိသလဲ လို့စုံစမ်းနေတယ်။ စစ်ဆေးမှုတွေပြုလုပ်တယ်။ ဒီလုပ်ရပ်တွေက ၂ ဦး ၂ ဖက်ကြားမှာ ယုံကြည်မှုတွေကိုလျော့ပါးစေတယ်။ ဒီဟာတွေက ငြိမ်းချမ်းရေးသရုပ်သကန် မမြင်ရတော့ဘူး- ဟုသျှမ်းသံတော်ဆင့်အားပြောပြသည်။

အစိုးရ၏စစ်ကြောင်းသည် အဆိုပါ အမျိုးသားကျောင်းသို့ရောက်ရှိကာ ကျောင်းဆရာများအား စစ်ဆေးမေးမြန်းအချက်အလက်များကောက်ယူသည့်အပြင် ဆရာရော ကလေးများကိုပါ ဓါတ်ပုံရိုက်ယူသွားကြောင်း၊ သျှမ်းစစ်သားများအကြောင်းကိုပါ မေးမြန်းခဲ့ကြောင်း ကျောင်းဆရာတဦးကပြန်လည်ပြောပြသည်။

၄င်းနှင့်ပတ်သက်၍ ဗိုလ်ချုပ်ကြီးယွက်စစ်က – တကယ်ဆိုအဲလိုမလုပ်သင့်ဘူး။ အဲလိုလုပ်ကြေးဆိုရင် ကျေးလက်တောရွာတွေမှာရှိတဲ့ အစိုးရကျောင်းတွေသာမကဘူး မြို့ထဲကကျောင်းတွေကိုပါ ကျနော်တို့ကသွားပြီး တားလို့ရတယ်။ ကျေးလက်ကကျောင်းတွေကိုသူတို့ကအချိန်ပြည့် လုံခြုံရေးသွားယူပေးနေတာမှမဟုတ်တာ- ဟု သျှမ်းသံတော်ဆင့်အားပြောသည်။

လဲချားမြို့နယ် ထွန့်ယိမ်းရှိအမျိုးသားကျောင်းအား ပြီးခဲ့သည့် ၂၀၁၅ ခုနှစ်က ကျေးလက်ရွာသားများနှင့်သံဃာတော်များ စုပေါင်းကာသွားရောက်ဖွင့်လှစ်ခဲ့ခြင်းဖြစ်သည်။ လက်ရှိတွင် ကျောင်းသူကျောင်းသား ၃၆ ဦး၊ ဆရာ ဆရာမ ၃ ဦးရှိပြီး ကျောင်းသားများအား သချာင်္၊ သမိုင်း၊ အင်္ဂလိပ်စာ၊ သျှမ်းစာနှင့်ဗမာစာသင်ကြားပေကြောင်းသိရသည်။

စစ်တိုင်းရုံးနှင့်နီးစပ်သည့်သတင်းရပ်ကွက်က – ၂၀၁၇ ခုနှစ်နှောင်းပိုင်းက ရလခ စစ်တိုင်းရုံးမှ တိုင်းမှူး ဗိုလ်ချုပ်သန်းလှိုင်က ရလခတိုင်းရုံးလှုပ်ရှားရာ ခိုလမ်၊ လွယ်လင်၊ မိုးနဲ၊ လင်းခေး တဝိုက်ရှိ သျှမ်းအမျိုးသားစာသင်ကျောင်းများစာရင်း ကောက်ယူကာ စစ်ဆေးမှုပြုသွားရန် ဆင့်ဆိုမှာကြားကြောင်း ပြောဆိုသည်။