နမ္မတူမြစ်ပေါ်တွင်ဆောက်လုပ်မည့်ရေကာတာစီမံကိန်းအတွက် ပါ၀င်ထားသောပြင်သစ်နိုင်ငံ ကုမ္မဏီတခု နှုတ်ထွက်သွားသည့်အပေါ် ၀မ်းသာကြောင်းနှင့် ရေကာတာစီမံကိန်းတွင်ပါ၀င်နေသေးသော ကုမ္မဏီများအားလုံးလည်း နှုတ်ထွက်ပေးပါရန်တိုက်တွန်းကြောင်း ရှမ်းပြည်နယ် မြစ်ချောင်းများအတွက် လှုပ်ရှားမှုကွန်ယက်က ထုတ်ပြန်လိုက်သည်။

ထုတ်ပြန်ချက်ကို ဖေဖော်ဝါရီလ ၁၁ ရက်နေ့က ထုတ်ပြန်ခဲ့ပြီး – မိမိသည်စီမံကိန်းမှ နှုတ်ထွက်ကြောင်း၊ ထို့အတွက် နာမည်ပျက် (Dirty List) စာရင်းမှပယ်ဖျက်ပေးပါရန် ပြင်သစ်နိုင်ငံ Engie ကုမ္မဏီသည် Burma Campaign UK ထံ ဇန်နဝါရီလက စာပေးပို့သည့်အပေါ် ၀မ်းမြောက်ဝမ်းသာကြိုဆိုကြောင်း၊ စီမံကိန်းရှိသည့်ဒေသသည် အေးချမ်းမှုမရှိသေးသော စစ်ရေးပဋိပက္ခဖြစ်သည့်နယ်မြေဖြစ်ကြောင်း၊ တဖက်တွင်လည်း ရေကာတာလုပ်ငန်းခွင်တွင် မြေပြိုမှုများ ရှိသဖြင့် ရေကာတာကြံ့ခိုင်မှုအတွက်လည်း စိုးရိမ်ရကြောင်းပါရှိပါသည်။

တာ့လုံဒေသခံ နန်းလောဝ်ခမ်းက – “ရေကာတာအလိုမရှိတဲ့ကျမတို့ဒေသခံတွေအတွက် အောင်မြင်မှုတခုဖြစ်ပါတယ်။ ကျန်တဲ့ကုမ္မဏီတွေလည်း နှုတ်ထွက်ပေးဖို့၊ စီမံကိန်းအတွက်ပြင်ဆင်နေတာတွေကိုရပ်တန့်ပေးဖို့တောင်းဆိုချင်ပါတယ်”- ဟု ပြောသည်။

တာ့လုံရွာအနီး နမ္မတူမြစ်ပေါ်တွင် တည်ဆောက်မည့်အဆိုပါ အထက်ရဲရွာရေကာတာ စီမံကိန်းအားလည်းဒေသခံများက အကြိမ်ကြိမ်ဆန့်ကျင်ဆန္ဒပြခဲ့ကြသည်။

၂၀၁၈ နှစ်နှောင်းပိုင်းကလည်း နေပြည်တော်အောက်လွှတ်တော်တွင် အထက်ရဲရွာရေကာတာအတွက် ဘတ်ဂျက်တိုးမြှင့်ပေးရေးနှင့်ပတ်သက်ပြီး သီပေါမြို့ ပြည်သူ့လွှတ်တော်ကိုယ်စားလှယ်က ကန့်ကွက်ခဲ့သော်လည်း မအောင်မြင်သည့်အပြင် လျှပ်စစ် စွမ်းအင်ဝန်ကြီးဌာနက – ဆန့်ကျင်ကန့်ကွက်နေသော ဒေသခံလူထုသည်တခြားအဖွဲ့အစည်းများ၏သွေးထိုးမှုကိုနားယောင်နေသည်- ဟုလည်းပြောဆိုဖြေကြားခဲ့သည်။

လက်ရှိရေကာတာစီမံကိန်းတွင်ပါ၀င်နေသော ကုမ္မဏီများမှာ ဆွိဇာလန်နိုင်ငံ၏ Stucky SA ကုမ္မဏီ၊ ပြင်သစ်နိုင်ငံ၏ IPGRB ၊ တရုတ်နိုင်ငံကုမ္မဏီနှင့် ဂျပန်နိုင်၏ Toshiba ၊ High Tech Concrete Technology Co. Ltd တို့ဖြစ်ကြောင်း အဆိုပါကြေငြာချက်တွင် ရေးသားဖော်ပြထားသည်။