ထိုင်းနိုင်ငံမြောက်ပိုင်း၊ ဖယောင်း (Phayao) ခရိုင်ရှိ ငှားရမ်းထားသော အိမ်တစ်လုံးအတွင်း အထောက်အထားမဲ့ မြန်မာရွှေ့ပြောင်းလုပ်သား ၆၃ ဦးကို ဖမ်းဆိရမိကြောင်း Khaosod English တွင် ဖော်ပြသည်။

ယမန်နေ့ (ဧပြီလ ၂၃ ရက်) ညနေ ၃ နာရီဝန်းကျင်တွင် ဒေသခံရဲတပ်ဖွဲ့၏ စစ်ဆေးဖော်ထုတ်ချက်များအရ လူကုန်ကူးမှုကွင်းဆက်တစ်ခု ရှိနိုင်သည်ဟူသော သံသယဖြင့် ဖယောင်းခရိုင်၊ မဲ့တန်း (Mae Tam) ကျေးရွာအုပ်စုအတွင်း အဆိုပါအိမ်ကို ဝင်ရောက်စီးနင်းခဲ့ခြင်းဖြစ်သည်။

အဆိုပါ စီးနင်းမှုကို မောင်းဖယောင်းခရိုင် အုပ်ချုပ်ရေးမှူး ဆုမ်ချိုင်း (Somchai Wongjiriyakasem) က အမိန့်ပေးခဲ့ခြင်းဖြစ်ပြီး ခရိုင်ရဲတပ်ဖွဲ့၊ လူဝင်မှုကြီးကြပ်ရေးအရာရှိများ၊ အလုပ်သမားညွှန်ကြားရေးဦးစီးဌာနနှင့် ပြည်တွင်းလုံခြုံရေးတပ်ဖွဲ့များ ပါဝင်သည့် ပူးပေါင်းအဖွဲ့ဖြင့် ဆောင်ရွက်ခဲ့ခြင်းဖြစ်သည်။ ယင်းစစ်ဆေးမှုတွင် အဓမ္မခိုင်းစေမှု၊ လူကုန်ကူးမှုနှင့် ဆက်နွှယ်မှုများ ရှိ၊ မရှိ အဓိက စစ်ဆေးခဲ့ကြသည်။

ဖမ်းဆီးခံရသူများတွင် ပအိုဝ်း၊ သျှမ်းနှင့် ကရင် အပါအဝင် အမျိုးသား ၃၃ ဦးနှင့် အမျိုးသမီး ၃၀ ဦး၊ စုစုပေါင်း ၆၃ ဦး ဖြစ်ကြောင်း တာဝန်ရှိသူများက ပြောသည်။ ထိုအထဲတွင် အသက် ၁၈ နှစ်အောက် ကလေးငယ် ၃ ဦးလည်း ပါဝင်နေသည်။

ကနဦး စစ်ဆေးမေးမြန်းချက်များအရ ၎င်းတို့သည် ချင်းရိုင်ခရိုင်၊ မယ်ဆိုင်ခရိုင်မှတစ်ဆင့် ထိုင်းနိုင်ငံအတွင်းသို့ အထောက်အထားမဲ့ ဝင်ရောက်လာခဲ့ခြင်းဖြစ်ပြီး “ဆမ်” (Sam) နှင့် “ပမ်း” (Palm) ဟု အမည်ရသည့် ပွဲစားများက ကူညီခဲ့ခြင်းဖြစ်ကြောင်း ဖော်ပြထားသည်။

ရွှေ့ပြောင်းလုပ်သားများ၏ ပြောကြားချက်အရ ၎င်းတို့သည် ပွဲစားခအဖြစ် တစ်ဦးလျှင် ဘတ်ငွေ ၈,၅၀၀ မှ ၁၀,၀၀၀ အထိ ပေးဆောင်ခဲ့ရကြောင်း သိရသည်။ အချို့မှာ နယ်စပ်ဖြတ်ကျော်ခွင့် လက်မှတ်များ ကိုင်ဆောင်ထားသော်လည်း ထိုင်းနိုင်ငံဥပဒေအရ တရားဝင် ဝင်ရောက်နေထိုင်ခွင့် အထောက်အထားများ မရှိကြပေ။

ဖမ်းဆီးခံရသူ လူကြီးအားလုံးကို တရားမဝင် ဝင်ရောက်မှုဖြင့် အမှုဖွင့်ထားပြီး ဥပဒေအရ အရေးယူဆောင်ရွက်နိုင်ရန် ဖယောင်း ရဲစခန်းရှိ စုံစမ်းစစ်ဆေးရေးအရာရှိများထံ လွှဲပြောင်းပေးအပ်ထားသည်။

အသက်မပြည့်သေးသည့် ကလေးငယ် ၃ ဦးအား ကာကွယ်စောင့်ရှောက်ရန်နှင့် လူကုန်ကူးခံရမှု ရှိ၊ မရှိ စစ်ဆေးနိုင်ရန်အတွက် ခရိုင်ကလေးသူငယ်နှင့် မိသားစုဝင်များ စောင့်ရှောက်ရေးစင်တာသို့ လွှဲပြောင်းပေးမည်ဖြစ်ပြီး နောက်ပိုင်းတွင် နေရပ်ပြန်လည်ပို့ဆောင်ရေးကို ဆောင်ရွက်သွားမည်ဖြစ်ကြောင်း တာဝန်ရှိသူများက ပြောကြားခဲ့သည်။