ရန်ကုန်တိုင်း၊ လမ်းမတော်မြို့နယ် ပြည်သူ့လွှတ်တော် နေရာ ဝင်ရောက် ယှဉ်ပြိုင်သည့် ပြည်သူ့ပါတီ ဥက္ကဌ ဦးကိုကိုကြီး ရွေးကောက်ပွဲ ရှုံးနိမ့်ကြောင်း ပါတီ တာဝန်ရှိသူ တဦးက သျှမ်းသံတော်ဆင့်ကို ဇန်နဝါရီလ ၂၅ ရက် ညပိုင်းတွင် အတည်ပြုပြောသည်။
စစ်ကောင်စီ ရွေးကောက်ပွဲသည် မြေပေါ် နိုင်ငံရေး (ဝါ) ပါတီ နိုင်ငံရေး (ဝါ) လွှတ်တော် နိုင်ငံရေး၊ စစ်ဘက်- အရပ်ဘက် ဆက်ဆံရေး စသည်များ အတွက် လိုအပ်သည့် ပေါင်းကူးလမ်း (ဝါ) စင်္ကြန်(ဝါ) ပလက်ဖောင်း (Platform) တခု ဖြစ်ကြောင်း မကြာခဏ ပြောဆိုလေ့ရှိသဖြင့် လူမှုကွန်ရက်တွင် “ပလက်ဖောင်း ကိုကိုကြီး” ဟု ချစ်စနိုး ဝိဂြိုဟ်ပြု ခေါ်ဝေါ် ခံရသူ ဦးကိုကိုကြီး သည် ကြိုတင်မဲကြောင့် ရှုံးနိမ့်ခဲ့ရခြင်း ဖြစ်သည်ဟု ဆိုသည်။
“ကြိုတင်မဲနဲ့ ရှုံးတယ်။ မဲစာရင်းက မနက်ဖြန် မနက် တင်ပေးမယ်”ဟု ပြည်သူ့ပါတီ တာဝန်ရှိသူက ဆိုသည်။
လက်ရှိ မဲရလဒ်များအရ လမ်းမတော်မြို့နယ် ပြည်သူ့လွှတ်တော် ကိုယ်စားလှယ် နေရာကို ကြံ့ခိုင်ရေးပါတီမှ ဦးရန်မျိုးအောင်သိန်း အနိုင်ရသွားကြောင်း သိရသည်။
လမ်းမတော် အပါအဝင် ရန်ကုန်တိုင်း မဲဆန္ဒနယ်များတွင် ပြည်သူ့ပါတီ၊ ကြံ့ခိုင်ရေးပါတီ၊ တိုင်းရင်းသား စည်းလုံးညီညွတ်ရေး (တစည) ပါတီနှင့် ပြည်သူ့ရှေ့ဆောင်ပါတီ (PPP) တို့ ဝင်ရောက် ယှဉ်ပြိုင်ခဲ့သည်။
နောက်ဆုံး မဲရလဒ်များအရ ဒဂုံမြို့သစ် အရှေ့ပိုင်းတွင် ကြံ့ခိုင်ရေးပါတီက အနိုင်ရသွားပြီး အခြားမြို့နယ် အများစုတွင်လည်း ကြံ့ခိုင်ရေးပါတီသာ အနိုင်ရနေကြောင်း နီးစပ်သူ တဦးက ဆိုသည်။
ဇန်နဝါရီ ၂၅ ရက်နေ့ ပြုလုပ်သည့် စစ်တပ် ရွေးကောက်ပွဲ တတိယပိုင်းကို ရန်ကုန်တိုင်း မြို့နယ်များ အပါအဝင် မြို့နယ် ၆၁ ခုတွင် ပြုလုပ်ခဲ့ခြင်း ဖြစ်သည်။
ဦးကိုကိုကြီး ဦးဆောင်သည့် ပြည်သူ့ပါတီသည် ပြီးခဲ့သည့် စစ်တပ်ရွေးကောက်ပွဲ ပထမပိုင်းနှင့် ဒုတိယပိုင်းတွင် အမျိုးသားလွှတ်တော် တနေရာ၊ တိုင်း သို့မဟုတ် ပြည်နယ် လွှတ်တော် ၇ နေရာ အနိုင်ရရှိထားပြီး စစ်တပ်၏ ကြံခိုင်ရေးပါတီက ပြည်သူ့လွှတ်တော် ၁၈၁ နေရာ၊ အမျိုးသားလွှတ်တော် ၅၂ နေရာနှင့် တိုင်း သို့မဟုတ် ပြည်နယ်လွှတ်တော်တွင် ၂၃၈ နေရာ အနိုင်ရထားသည်။
Leave a Comments