စစ်ကော်မရှင် ကျင်းပပြုလုပ်မည့် အတုအယောင် ရွေးကောက်ပွဲအပေါ် ကွဲပြားခြားနေသော နိုင်ငံတကာ တုံ့ပြန်မှုများ ရှိနေသော်လည်း မိတ်ဖက်နိုင်ငံများ၏ ထောက်ခံမှုများကတော့ အခိုင်အမာ ရရှိထားပြီးဖြစ်ကြောင်း စစ်ကော်မရှင်ပြောခွင့်ရ ဗိုလ်ချုပ်ဇော်မင်းထွန်းက ပြောသည်။
ယနေ့ (နိုဝင်ဘာလ ၁၁) ရက်တွင် စစ်ကော်မရှင်လက်အောက်ခံ မြန်မာအလင်းသတင်းစာမှတစ်ဆင့် ဗိုလ်ချုပ်ဇော်မင်းထွန်းက ယင်းကဲ့သို့ ပြောဆိုခဲ့ခြင်း ဖြစ်သည်။
“မြန်မာနိုင်ငံရဲ့ ရွေးကောက်ပွဲအပေါ် ကွဲပြားခြားနားတဲ့ နိုင်ငံတကာ တုံ့ပြန်မှုများ ရှိနေသော်လည်း မိတ်ဖက်နိုင်ငံများရဲ့ ထောက်ခံမှုကတော့ အခိုင်အမာ ရရှိထားပြီး ဖြစ်ပါတယ်။ မြန်မာနိုင်ငံရဲ့ ရွေးကောက်ပွဲ လုပ်ငန်းစဉ်များကိုလည်း အားလုံးက အသိအမှတ်ပြုပြီး ဖြစ်ပါတယ်” ဟု ဗိုလ်ချုပ်ဇော်မင်းထွန်းက ပြောသည်။
စစ်ကော်မရှင်သည် လာမည့် ဒီဇင်ဘာလ ၂၈ ရက်တွင် အတုအယောင် ရွေးကောက်ပွဲ အပိုင်း (၁)ကို မြို့နယ် ၁၀၂ နှင့် အတုအယောင် ရွေးကောက်ပွဲ အပိုင်း (၂) ကို ၂၀၂၆ ဇန်နဝါရီလ ၁၁ ရက်တွင် ကျင်းပပြုလုပ်သွားမည်ဟု ကြေညာထားသည်။
ထို့ပြင် အတုအယောင် ရွေးကောက်ပွဲ အပိုင်း (၃) ကို အပိုင်း (၂) အပြီး နှစ်ပတ်ခြားအကြာတွင် ကျင်းပပြုလုပ်သွားမည်ဟု စစ်ကော်မရှင်ပြောခွင့်ရ ဗိုလ်ချုပ်ဇော်မင်းထွန်းက ပြောသည်။
သို့သော် စစ်ကော်မရှင် ကျင်းပပြုလုပ်မည့် အတုအယောင်ရွေးကောက်ပွဲတွင် ယုံကြည်စိတ်ချရသော ရလဒ်မထွက်နိုင်၍ လေ့လာစောင့်ကြည့်ရေးအဖွဲ့များ စေလွှတ်ရန်အစီအစဉ်မရှိကြောင်း ဥရောပသမဂ္ဂ၏ လူ့အခွင့်အရေးဆိုင်ရာ အထူးကိုယ်စားလှယ် Kajsa Ollongren က အောက်တိုဘာလ ၁၆ ရက်နေ့တွင် ထုတ်ဖော်ပြောဆိုခဲ့သည်။
အလားတူ ယမန်နေ့ (နိုဝင်ဘာလ ၁၀) ရက်တွင် စစ်ကိုင်းတိုင်းနှင့် ကရင်နီ (ကယာ) ပြည်အတွင်း သပိတ်အဖွဲ့များ၊ ဒေသခံပြည်သူများသည် စစ်ကော်မရှင်၏ အတုအယောင် ရွေးကောက်ပွဲနှင့် ပတ်သက်၍ ဆန့်ကျင့်ကြောင်း ဆန္ဒထုတ်ဖော်ခဲ့ကြသည်။
ထို့အပြင် စစ်ကော်မရှင် ကျင်းပပြုလုပ်မည့် အတုအယောင် ရွေးကောက်ပွဲသည် ၎င်းတို့၏ အာဏာတည်မြဲရေးနှင့် အကြမ်းဖက်စစ်တပ် အာဏာသက်ဆိုးရှည်စေမည့် မည်သည့် လုပ်ရပ်မျိုးကိုမဆို ဆန့်ကျင်တော်လှန်သွားမည်ဟု “ဝ”၊ တအာင်း၊ မွန် လူငယ်များက ယမန်နေ့ နိုဝင်ဘာလ ၁၀ ရက်နေ့တွင် ပူးတွဲသဘောထား ထုတ်ပြန်ကြေညာထားသည်။
Leave a Comments