သျှမ်းပြည် မက်မန်းမြို့နယ်ကို ‘ဝ’ဒေသ ရုံးစိုက်ရာမြို့အဖြစ် စစ်ကော်မရှင်က ပြောင်းလဲသတ်မှတ်လိုက်ကြောင်း သတင်းသိရသည်။

အောက်တိုဘာလ (၃၁) ရက်တွင် ထုတ်ပြန်ခဲ့သည့် မြန်မာနိုင်ငံတော်ပြန်တမ်းတွင် သျှမ်းပြည်အတွင်း ‘ဝ’ဒေသအတွက် ရုံးစိုက်ရာမြို့အဖြစ် မက်မန်းမြို့ကို ပြောင်းလဲသတ်မှတ်လိုက်ကြောင်း ယာယီသမ္မတ တာဝန်ယူထားသည့် စစ်ခေါင်းဆောင် မင်းအောင်လှိုင် ကိုယ်တိုင် လက်မှတ်ရေးထိုး ထုတ်ပြန်ထားသည်။

အမျိုးသားကာကွယ်ရေးနှင့် လုံခြုံရေးကောင်စီမှ စက်တင်ဘာလ (၁၉) ရက်စွဲဖြင့် ထုတ်ပြန်သည့် အမိန့်အမှတ် (၉/၂၀၂၅) ထဲတွင် နိုင်ငံတော်အေးချမ်းသာယာရေးနှင့် ဖွံ့ဖြိုးရေးကောင်စီက ၂၀၁၀ ဩဂုတ်လ ၂၀ ရက်တွင် သတ်မှတ်ခဲ့သည့် ‘ဝ’ဒေသအတွက် ဟိုပန်မြို့ ဆိုသည့် ဖော်ပြချက်ကို အုပ်ချုပ်ရေးနှင့် ဒေသဖွံ့ဖြိုးရေးလုပ်ငန်းများ ပိုမိုထိရောက်အောင် ဆောင်ရွက်နိုင်ရန် မက်မန်းမြို့ အဖြစ် ပြင်ဆင်သတ်မှတ်ကြောင်း ဖော်ပြထားသည်။

အလားတူ စစ်ကော်မရှင်ကျင်းပမည့် ၂၀၂၅ ရွေးကောက်ပွဲတွင်လည်း သျှမ်းပြည်အတွက် အမျိုးသားလွှတ်တော် မဲဆန္ဒနယ် အမှတ်(၁) အဖြစ် သတ်မှတ်ထားသည့် ‘ဝ’ဒေသတွင် ‘ဝ’အမျိုးသားပါတီ (WNP) မှ ကိုယ်စားလှယ်လောင်းတစ်ဦးတည်း ပြိုင်ဘက်မရှိ အမည်စာရင်း တင်သွင်းထားကြောင်း ပြည်ထောင်စုရွေးကောက်ပွဲကော်မရှင် UEC မှ ကြေညာထားသည်။

‘ဝ’ဒေသကို သျှမ်းပြည်မြောက်ပိုင်းရှိ ဟိုပန်၊ မိုင်းမော၊ ပန်ဝိုင်၊ နားဖန်း၊ မက်မန်းနှင့် ပန်ဆန်းမြို့နယ် ခြောက်ခုကို ခရိုင်နှစ်ခု အဖြစ် စုဖွဲ့ပြီး ‘ဝ’ကိုယ်ပိုင်အုပ်ချုပ်ခွင့်ရ တိုင်းအဖြစ် ၂၀၀၈ ဖွဲ့စည်းပုံအခြေခံဥပဒေတွင် သတ်မှတ်ပေးထားသည်။

သို့သော် “၁၀၂၇ စစ်ဆင်ရေး” အတွင်း ညီနောင်မဟာမိတ်တပ်များ တိုက်ခိုက်သိမ်းပိုက်ခဲ့သည့် ဟိုပန်မြို့နှင့် ပန်လုံမြို့ (၂) မြို့ကို ၂၀၂၄ ဇန်နဝါရီ လဆန်းပိုင်းတွင် ‘ဝ’တပ်ဖွဲ့ထံသို့ လွှဲပြောင်းပေးခဲ့ပြီး ၂၀၂၄ ဇွန်လမှ စတင်ကာ ဟိုပန်ခရိုင်အဖြစ် ပြောင်းလဲဖွဲ့စည်း၍ UWSA ၏ အုပ်ချုပ်ရေးယန္တရားများ အကောင်အထည်ဖော် လည်ပတ်နေသည်။

ထို့ကြောင့် ‘ဝ’တပ်ဖွဲ့ UWSA အနေဖြင့် “၁၀၂၇ စစ်ဆင်ရေး” အတွင်း သေနတ်တစ်ချက် မပစ်ဖောက်ရဘဲ ဟိုပန်မြို့နှင့် ပန်လုံမြို့ နှစ်မြို့ကို ထိန်းချုပ်ခွင့် ရရှိသွားပြီးနောက် စစ်ကော်မရှင်ဘက်က ‘ဝ’ဒေသ ရုံးစိုက်ရာမြို့အဖြစ် မက်မန်းမြို့သို့ ပြောင်းရွှေ့ခဲ့သည်။

အခြားတစ်ဘက်တွင် ပြည်ထောင်စုအစိုးရထံ နှစ်ပေါင်းများစွာ တင်ပြတောင်းဆိုမှုများ ပြုလုပ်ခဲ့ပြီးနောက် ၂၀၂၄ ဇန်နဝါရီလ ၄ ရက်တွင် နိုင်ငံတော်စီမံအုပ်ချုပ်ရေးကောင်စီမှ ဟိုပန်၊ ပန်လုံဒေသအား လွှဲပြောင်းပေးအပ်ရန် သဘောတူခဲ့ပြီး ၂၀၂၄ ဇန်နဝါရီ ၁၀ ရက်တွင် UWSA မှ လွှဲပြောင်းလက်ခံခဲ့ကြောင်း WSTV မှ သတင်းထုတ်ပြန်ခဲ့သည်။