စစ်ကော်မရှင်လက်အောက်ခံ စွမ်းအင်ဝန်ကြီးသည် တရုတ်နိုင်ငံပိုင် စွမ်းအင်ဆိုင်ရာ အဖွဲ့အစည်းများမှ အကြီးအကဲများနှင့် တွေ့ဆုံစဉ် ရေနံနှင့် သဘာဝဓာတ်ငွေ့ ပိုက်လိုင်း လုံခြုံရေးကိစ္စများ ထည့်သွင်းဆွေးနွေးခဲ့ကြောင်း သတင်းသိရသည်။

တရုတ်နိုင်ငံတွင် စွမ်းအင်အသွင်ကူးပြောင်းရေးဖိုရမ် တက်ရောက်နေသည့် စစ်ကော်မရှင်လက်အောက်ခံ စွမ်းအင်ဝန်ကြီးဌာန ပြည်ထောင်စုဝန်ကြီး ဦးကိုကိုလွင်သည် အောက်တိုဘာလ (၂၁) ရက်တွင် တရုတ်နိုင်ငံပိုင် China National Petroleum Corporation (CNPC) ဒုဥက္ကဋ္ဌနှင့် တွေ့ဆုံခဲ့ကြောင်း ယနေ့ထုတ် စစ်ကော်မရှင်လက်အောက်ခံ သတင်းစာများတွင် ဖော်ပြသည်။

ထိုသို့ တွေ့ဆုံစဉ်အတွင်း ရေနံနှင့် သဘာဝဓာတ်ငွေ့ပိုက်လိုင်း လုံခြုံရေး၊ ပိုက်လိုင်းတစ်လျှောက် နယ်မြေဒေသ တည်ငြိမ်အေးချမ်းရေး၊ အရှေ့တောင်အာရှ ရေနံနှင့် သဘာဝဓာတ်ငွေ့ ပိုက်လိုင်းများကို စွမ်းရည်အပြည့်အဝ အသုံးပြုနိုင်ရန် ပူးပေါင်းဆောင်ရွက်ရေးတို့ကို ဆွေးနွေးခဲ့ကြောင်း ထုတ်ပြန်ချက်တွင် ရေးသားထားသည်။

ထို့အပြင် ရေနံနှင့်သဘာဝဓာတ်ငွေ့ ကဏ္ဍတွင် နှစ်နိုင်ငံ တိုးမြှင့်ဆောင်ရွက်နိုင်ရေး၊ စီမံကိန်းများတွင် တရုတ်နိုင်ငံမှ လာရောက်ရင်းနှီးမြှုပ်နှံရေး၊ ထွက်ရှိလာသော သဘာဝဓာတ်ငွေ့များကို သွယ်တန်းထားသည့် အရှေ့တောင်အာရှ သဘာဝဓာတ်ငွေ့ ပိုက်လိုင်းအတွင်း ပို့လွှတ်သယ်ဆောင်နိုင်ရေးတို့ကိုလည်း ဆွေးနွေးခဲ့ကြောင်း ထုတ်ပြန်ချက်အရ သိရသည်။

စစ်ကော်မရှင်ခန့် စွမ်းအင်ဝန်ကြီးသည် မြန်မာနိုင်ငံရှိ ကုန်းတွင်းရေနံတူးဖော်မှု လုပ်ငန်းများ၊ ကမ်းလွန်စီမံကိန်းများ၊ ရေနံချက်စက်ရုံ တည်ဆောက်ခြင်း၊ ရေနံနှင့် သဘာဝဓာတ်ငွေ့ ပိုက်လိုင်းများ တပ်ဆင်သွယ်တန်းခြင်းများတွင် လာရောက်ရင်းနှီးမြှုပ်နှံရန် အောက်တိုဘာလ ၁၉ ရက်ကလည်း တရုတ်နိုင်ငံကို ဖိတ်ခေါ်ခဲ့သည်။

စစ်ကော်မရှင်တပ်သည် သျှမ်းပြည်မြောက်ပိုင်းရှိ ရေနံနှင့် သဘာဝဓာတ်ငွေ့ပိုက်လိုင်း ဖြတ်သန်းရာ ကျောက်မဲမြို့နှင့် သီပေါမြို့တို့ကို အောက်တိုဘာလအတွင်း ပြန်လည်ထိန်းချုပ်နိုင်ခဲ့သော်လည်း တရုတ်နယ်စပ်အထိ နယ်မြေတလျှောက်ကို ညီနောင်မဟာမိတ်တပ်များက ဆက်လက်ထိန်းချုပ်ထားသည်။

အလားတူ သဘာဝဓာတ်ငွေ့ပိုက်လိုင်း စတင်ရာ ရခိုင်ပြည်နယ်တွင်လည်း အာရက္ခတပ်တော် AA က ထိန်းချုပ်ထားပြီး ကျောက်ဖြူရေနက်ဆိပ်ကမ်းမှ မကွေးနှင့် မန္တလေးတိုင်းတို့ကို ဖြတ်ကာ သျှမ်းပြည်မြောက်ပိုင်းမှတဆင့် တရုတ်နိုင်ငံ ယူနန်ပြည်နယ် ကူမင်းမြို့တွင် အဆုံးသတ်ပြီး ၇၇၁ ကီလိုမီတာ (၄၈၀ မိုင်ခန့်) ရှည်လျားသည်။

ပြီးခဲ့သည့် ဩဂုတ်လ ၃၀ ရက်မှ စက်တင်ဘာ ၆ ရက်အထိ စစ်ခေါင်းဆောင် တရုတ်ခရီးစဉ်အတွင်း တရုတ်သမ္မတ ရှီကျင့်ဖျင်နှင့် တွေ့ဆုံခဲ့စဉ် ပိုးလမ်းမစီမံကိန်း OBOR/BRI နှင့် တရုတ်-မြန်မာ စီးပွားရေးစင်္ကြံ CMEC ၌ ပါဝင်သည့် စီမံကိန်းများကို အရှိန်အဟုန် မြှင့်တင်ရေး၊ သဘာဝ သယံဇာတနှင့် ကုန်သွယ်မှု ပူးပေါင်းဆောင်ရွက်ရေး၊ နယ်စပ်ဒေသ တည်ငြိမ်အေးချမ်းရေးတို့ကို ဆွေးနွေးခဲ့သည်။

ပုံစာ – စစ်ကော်မရှင်ခန့် စွမ်းအင်ဝန်ကြီးနှင့် တရုတ်ကိုယ်စားလှယ်များ တွေ့ဆုံစဉ် (ဓာတ်ပုံ-MOI)