သျှမ်းပြည် ကျောက်မဲမြို့နယ်ထဲသို့ စစ်ကော်မရှင်တပ်က လေကြောင်းဖြင့် ထပ်မံဗုံးကြဲ တိုက်ခိုက်ခဲ့ရာ SSPP တပ်စခန်းအနီးသို့ ကျရောက်ပေါက်ကွဲခဲ့ကြောင်း စုံစမ်းသိရသည်။

ယမန်နေ့ (အောက်တိုဘာ ၁၁ ရက်) နေ့လယ် ၁ နာရီခွဲကျော်တွင် ကျောက်မဲမြို့နယ်အတွင်းရှိ တော့ဆန်ကျေးရွာသို့ စစ်ကော်မရှင်တပ်က လေကြောင်းဖြင့် ဗုံး(၂)လုံး ကြဲချတိုက်ခိုက်ခဲ့ရာ ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) တပ်စခန်းအနီး ဗုံးတစ်လုံး ကျရောက်ပေါက်ကွဲခဲ့ပြီး အခြားဗုံးတစ်လုံးမှာ ကျေးရွာထဲ ပေါက်ကွဲခဲ့ကြောင်း စစ်ရေးသတင်းရင်းမြစ်ထံမှ သိရသည်။

“တော့ဆန်မှာ လေယာဉ်နဲ့ဗုံးကြဲတာ နှစ်လုံး၊ SSPP စခန်းနား တစ်လုံးကျတယ်။ နောက်ပြီး ရွာထဲတစ်လုံးကျတာ ကလေးတစ်ယောက် ဒဏ်ရာရတယ်လို့ ပြောတယ်။ တခြားထိခိုက်တာတော့ မကြားသေးဘူး”ဟု ကျောက်မဲမြို့နယ်မှ စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

အဆိုပါ လေကြောင်းဗုံးကြဲခံရမှုအတွင်း တော့ဆန်ကျေးရွာထဲမှ ကလေးတစ်ဦး ထိခိုက်ဒဏ်ရရှိခဲ့ကြောင်း သိရသော်လည်း SSPP တပ်စခန်းအနီး ဗုံးကျရောက်ပေါက်ကွဲမှုကြောင့် တပ်သားထိခိုက်ဒဏ်ရာရမှု ရှိ/မရှိကို မေးမြန်းနိုင်ရန် သျှမ်းသံတော်ဆင့်မှ SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်ထံ ဆက်သွယ်ခဲ့သော်လည်း ဖုန်းစက်ပိတ်ထားသည်။

ကျောက်မဲမြို့နယ် တော့ဆန်ကျေးရွာ လေကြောင်းဗုံးကြဲခံရမှုကြောင့် ပြည်သူနေအိမ် (၂) လုံးနှင့် ဘုန်းကြီးကျောင်းရှိ ဇရပ် ထိခိုက်ပျက်စီးခဲ့ပြီး စစ်ကော်မရှင်တပ် ပစ်ခတ်တိုက်ခိုက်ခဲ့သော ပေါင် (၂၅၀) ဗုံးနှစ်လုံးသည် တော့ဆန်ရွာမ ကျေးရွာအတွင်း တစ်လုံးနှင့် ရွာအနီးရှိ လွယ်ရင်တောင်တွင် တစ်လုံး ကျရောက်ပေါက်ကွဲခဲ့ကြောင်း TNLA သတင်းနှင့် ပြန်ကြားရေးဌာနမှ ယနေ့နံနက်ပိုင်းတွင် သတင်းထုတ်ပြန်သည်။

ယခုဗုံးကြဲခံရသည့် တော့ဆန်ကျေးရွာသည် စစ်ကော်မရှင်တပ် ပြန်လည်ထိန်းချုပ်ထားသည့် ကျောက်မဲမြို့နှင့် အနောက်ဘက် မိုင် ၄၀ ခန့် ကွာဝေးပြီး TNLA ထိန်းချုပ်ထားသည့် မိုင်းလုံမြို့နှင့် မိုင်းငေါ့မြို့ကြားတွင် တည်ရှိသည်။

ထို့အပြင် လေကြောင်းအန္တရာယ် စိုးရိမ်မှုကြောင့် TNLA ထိန်းချုပ်ထားသည့် မိုင်းငေါ့မြို့ဘက်တွင် လမ်းပန်းဆက်သွယ်ရေး ဖြတ်တောက်ခံထားရပြီး ကုန်သည်များလည်း ကန့်သတ်တားမြစ် ခံရခြင်းကြောင့် စားသောက်ကုန် လူသုံးကုန်ပစ္စည်းများ၊ စားသုံးဆီနှင့် စက်သုံးဆီ ပြတ်လပ်နေပြီး ပြည်သူများလည်း ပိတ်မိနေကြောင်း ဒေသခံများက ပြောသည်။

“TNLA က မိုင်းငေါ့လမ်းက တာဟွမ်းတံတားကို ဆူးချွန်တွေနဲ့ အသေပ်ိတ်လိုက်တယ်၊ အဝင်အထွက် လုံးဝ မရတော့ဘူး။ လက်ရှိ မိုင်းငေါ့မှာ စားသုံးဆီ၊ စက်သုံးဆီနဲ့ ကိုယ့်ဒေသက မထွက်တဲ့ ခရမ်းချဉ်သီးတွေကအစ ပြတ်နေတယ်၊ စပါးရိတ်ချိန်လဲရောက်တော့ ပိုခက်တယ်။ ယာစပါးတွေက ဝါလို့ ရိတ်ချိန်တန်ပြီ၊ မရိတ်ရလို့ ဒုက္ခရောက်နေကြတယ်” ဟု မိုင်းငေါ့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် စစ်ကော်မရှင်တပ်သည် ကျောက်မဲမြို့နယ်အတွင်း TNLA ထိန်းချုပ်ထားသည့် မိုင်းလုံမြို့နှင့် မိုင်းငေါ့မြို့တို့ကို လေကြောင်းဖြင့် ဖိအားပေး တိုက်ခိုက်နေပြီး မြေပြင်စစ်ကြောင်းထိုးအရပ်သား ထိခိုက်သေဆုံးမှု မြင့်တက်လာသည်။