သျှမ်းပြည် သီပေါမြို့နှင့် နမ္မတူမြို့တို့ကို စစ်ကော်မရှင်တပ်က သီတင်းကျွတ်လပြည့်နေ့တွင် လေကြောင်းဗုံးကြဲ တိုက်ခိုက်ခဲ့ကြောင်း စုံစမ်းသိရသည်။
ယနေ့ (အောက်တိုဘာလ ၆ ရက်) သီတင်းကျွတ်လပြည့်နေ့ နံနက် ၇ နာရီခွဲတွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် သီပေါမြို့နှင့် နမ္မတူမြို့တို့ကို စစ်ကော်မရှင်တပ်က တပြိုင်တည်း လေကြောင်းဗုံးကြဲ တိုက်ခိုက်ခဲ့ခြင်းကြောင့် နေအိမ်အများအပြား ထိခိုက်ပျက်စီးခဲ့ကြောင်း ဒေသခံများက ပြောသည်။
TNLA ထိန်းချုပ်ထားသည့် နမ္မတူမြို့ ပန်ဟိုက် ရပ်ကွက်(၂) ထဲသို့ စစ်ကော်မရှင်တပ်က ဂျက်ဖိုက်တာဖြင့် ဗုံးကြဲ တိုက်ခိုက်ခဲ့ရာ နေအိမ်(၁၅) လုံးကျော် ပျက်စီးခဲ့ပြီး အမျိုးသမီးတစ်ဦး ထိခိုက်ဒဏ်ရာ ရရှိခဲ့ကြောင်း နမ္မတူဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ပန်ဟိုက်ထဲက အပေါ်ရုပ်ရှင်ရုံ လမ်းကြားကို ဂျက်ဖိုက်တာနဲ့ ဗုံးကြဲသွားတာ၊ ပေါင် ဘယ်နှရာလဲတော့ မသိဘူး။ သီတင်းကျွတ်လပြည့် ဘုန်းကြီးကျောင်းသွားကြလို့ လူထိတာ မရှိဘူး။ အခါကြီး ရက်ကြီးမလို့ သတိထားနေတဲ့ကြားက ဗုံးလာကြဲသွားတာ၊ အများစုက ရှေ့ရက် ဗုံးကြဲခံရကတည်းက ရှောင်နေကြပြီ”ဟု နမ္မတူဒေသခံ ၎င်းအမျိုးသားက ပြောသည်။
အလားတူ TNLA ထိန်းချုပ်ထားသည့် သီပေါမြို့ကိုလည်း စစ်ကော်မရှင်တပ်က တစ်ချိန်တည်းတွင် ဂျက်ဖိုက်တာဖြင့် ဗုံးကြဲတိုက်ခိုက်ခဲ့ရာ ထွေအုပ်ရုံးအနီး ကျရောက်ပေါက်ကွဲကြောင်း ကနဦး သိရပြီး ထိခိုက်ပျက်စီးမှု အသေးစိတ်ကို သျှမ်းသံတော်ဆင့်မှ ဆက်လက်စုံစမ်းနေသည်။
စစ်ကော်မရှင်တပ်သည် အောက်တိုဘာ (၁) ရက်တွင် ကျောက်မဲမြို့ကို ပြန်လည်ထိန်းချုပ်နိုင်ခဲ့ပြီးနောက် TNLA ထိန်းချုပ်ထားသည့် သီပေါမြို့ဘက်သို့ မြေပြင်စစ်ကြောင်းထိုးနေပြီး ၄ ရက်အတွင်း လေကြောင်းတိုက်ခိုက်မှု ၅ ကြိမ်ထက်မနည်း ပြုလုပ်ခဲ့ကြောင်း ဒေသခံများထံမှ သိရသည်။
ပြီးခဲ့သည့် အောက်တိုဘာလ ၄ ရက်တွင် TNLA ထိန်းချုပ် နမ့်ဆန်မြို့နယ် ဇယ်တုန်ဟုန်းကျေးရွာကို စစ်ကော်မရှင်တပ်မှ လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် ကလေး ၂ ဦး သေဆုံးပြီး ကလေး အပါအဝင် အရပ်သား (၉) ဦး ထိမှန်ဒဏ်ရာရရှိခဲ့ကြောင်း TNLA က သတင်းထုတ်ပြန်သည်။
ထို့အပြင် TNLA ထိန်းချုပ်ထားသည့် နမ္မတူမြို့ပေါ်ကို စစ်ကော်မရှင်တပ်က အောက်တိုဘာ ၂ ရက် နံနက်ပိုင်းတွင် လေကြောင်းဖြင့် ဗုံးကြဲတိုက်ခိုက်ခဲ့ရာ စစ်ဘေးရှောင် ၄ ဉီး သေဆုံးခဲ့ပြီး ၅ ဦးထက်မနည်း ထိခိုက်ဒဏ်ရာ ရရှိခဲ့ကြောင်း ဒေသခံများထံမှ သိရသည်။
Leave a Comments