စစ်ကော်မရှင် ကျင်းပမည့် ရွေးကောက်ပွဲကို နှောင့်ယှက်ဟန့်တားသည်ဟုဆိုကာ စက်တင်ဘာလ ၃၀ ရက်အထိ အမူ ၂၄ မူနှင့် ပြည်သူ ၆၄ ဦးကို အဖွင့်အရေးယူထားကြောင်း ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ထွန်းထွန်းနောင်က ပြောသည်။

ယမန်နေ့ အောက်တိုဘာလ ၃ ရက်နေ့က မြန်မာနိုင်ငံ ရဲတပ်ဖွဲ့ဌာနချုပ် အရိန္ဒမာခန်းမ၌ ကျင်းပသည့် ပါတီစုံဒီမိုကရေစီ အထွေထွေရွေးကောက်ပွဲကာလ လုံခြုံရေးဆိုင်ရာကြီးကြပ်မှု ဗဟိုကော်မတီအစည်းအဝေးတွင် ဒုတိယဗိုလ်ချုပ်ကြီး ထွန်းထွန်းနောင်က ထိုသို့ပြောကြားခဲ့ခြင်း ဖြစ်သည်။

ထိုအစည်းအဝေးတွင် လွတ်လပ်ပြီး တရားမျှတမှုအပြည့်ရှိသည့် ပါတီစုံဒီမိုကရေစီ အထွေထွေရွေးကောက်ပွဲ တစ်ရပ် ကျင်းပပေးပြီး ထွက်ပေါ်လာသည့် အစိုးရကို နိုင်ငံတော်တာဝန်များအား လွှဲပြောင်းပေးအပ်နိုင်ရေး၊ မဲပေးပိုင်ခွင့်ရှိသူများအားလုံး မဲပေးနိုင်ရေး၊ လုံခြုံမှုအပြည့်အဝရှိသော ရွေးကောက်ပွဲဖြစ်စေရေး စသည့်ဖြင့် ၎င်းက ပြောကြားခဲ့သည်။

စစ်ကော်မရှင်သည် လာမည့် ဒီဇင်ဘာလ ၂၈ ရက်မှစတင်၍ ရွေးကောက်ပွဲကို အဆင့်လိုက် ကျင်းပပြလုပ်မည်ဖြစ်ကြောင်းနှင့် လွှတ်တော်များအတွက် မဲဆန္ဒနယ်များအား သတ်မှတ်ကြောခဲ့ပြီး ဖြစ်သည့်အပြင် နိုင်ငံရေးပါတီများမှ အမည်စာရင်း တင်သွင်းလာသည့် ပြည်ထောင်စုတစ်ဝန်လုံး စည်းရုံးမည့် နိုင်ငံရေးပါတီ ၆ ပါတီမှ လွှတ်တော်ကိုယ်စားလှယ်လောင်း ၃,၉၆၁ ဦးရှိကြောင်း ဆိုသည်။

ထို့ပြင် တိုင်းဒေသကြီး၊ ပြည်နယ်တစ်ခုအတွင်း စည်းရုံးမည့် နိုင်ငံရေးပါတီ ၅၁ ပါတီမှ လွှတ်တော်ကိုယ်စားလှယ်လောင်း ၉၆၆ ဦး၊ တစ်သီးပုဂ္ဂလ လွှတ်တော်ကိုယ်စားလှယ်လောင်း ၉၆ ဦး စုစုပေါင်း ၅,၀၂၃ ဦးတို့အား စိစစ်ခြင်းလုပ်ငန်းများ ဆောင်ရွက်လျက်ရှိကြောင်း သိရသည်။

စစ်ကော်မရှင်သည် ပြည်သူအများစုက လက်မခံသည့်ကြားမှ ရွေးကောက်ပွဲကို ဖြစ်မြောက်စေရန် နည်းလမ်းမျိုးစုံ အသုံးပြုလုပ်ဆောင်နေပြီး အနည်းဆုံး ထောင်ဒဏ် ၃ နှစ်မှ ထောက်ဒဏ် တသက်တကျွန်းနှင့် သေဒဏ်ချမှတ်နိုင်သည့် ရွေးကောက်ပွဲကို နှောင့်ယှက်ဟန့်တားဖျက်ဆီးခြင်းမှ ကာကွယ်ရေးဥပဒေကို ဇူလိုင် ၂၉ ရက်တွင် ပြဋ္ဌာန်းခဲ့သည်။