သျှမ်းပြည် ကျောက်မဲနှင့် နောင်ချိုမြို့ကြားရှိ ကမ္ဘာကျော် ဂုတ်ထိပ်တံတား၏ မိုင်းခွဲဖျက်ဆီးခံထားရသည့် အစိတ်အပိုင်းများကို ပြန်လည်ပြင်ဆင်ရန် စစ်ကော်မရှင် ဝန်ကြီး သွားရောက်ကြည့်ရှုခဲ့ကြောင်း သတင်းသိရသည်။

ယမန်နေ့ (စက်တင်ဘာလ ၁၅ ရက်) တွင် စစ်ကော်မရှင်လက်အောက်ခံ ပို့ဆောင်ရေးနှင့် ဆက်သွယ်ရေးဝန်ကြီး ဗိုလ်ချုပ်ကြီး မြထွန်းဉီးသည် နောင်ချိုမြို့သို့ ရောက်ရှိလာပြီး နောင်ချိုဘူတာမှတဆင့် သံလမ်းပြေးယာဉ်ဖြင့် ဂုတ်ထိပ်တံတားကို သွားရောက်စစ်ဆေးခဲ့ကြောင်း စစ်ကော်မရှင်ဘက်မှ သတင်းထုတ်ပြန်သည်။

စစ်ကော်မရှင် ပြန်လည်ထိန်းချုပ်ထားသည့် နောင်ချိုမြို့ ဂုတ်ထိပ်တံတားသို့ ၎င်းလက်အောက်ခံ ဝန်ကြီး မလာရောက်ခင် စက်တင်ဘာလ ပထမပတ်မှ စတင်ပြီး နောင်ချိုမြို့နယ် ကုန်းစံကျေးရွာအုပ်စုရှိ ဒေသခံများကို စစ်ကော်မရှင်တပ်သားများက ရထားသံလမ်းတလျှောက် သန့်ရှင်းရေးပြုလုပ်ရန် လုပ်အားပေးခိုင်းစေခဲ့ကြောင်း ဒေသခံများက ပြောသည်။

“ကိုဗစ်ကတည်းက ရထားမသွားရတော့ သံလမ်းတလျှောက်မှာ ခြုံပုတ်တွေ ဖြစ်နေတာ၊ အဲ့တာ လူကြီးလာမယ်ဆိုပြီး ကုန်းစံဘက်က ရွာသားတွေကို လုပ်အားပေး ဆိုပြီးတော့ အလကား ခေါ်ခိုင်းတာ။ သံလမ်းဘေးက နေကြာရိုင်းတွေ သွားခုတ်ခိုင်းတာ”ဟု နောင်ချိုဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ဂုတ်ထိပ်တံတားကို စစ်ကော်မရှင်ဝန်ကြီး သွားရောက်ကြည့်ရှုစဉ် မိုင်းခွဲဖျက်ဆီးခံထားရသည့် ကျောက်မဲဘက်ခြမ်း တံတားချဉ်းကပ်တိုင်နေရာနှင့် တံတားတိုင်အမှတ် ၁၆ အကြား ယာယီဒေါက်တိုင်ဖြင့် သံပေါင်တပ်ဆင်နိုင်ရေး၊ သမိုင်းအမွေအနှစ် တံတားဖြစ်သဖြင့် မူလလက်ရာ ဒီဇိုင်းအတိုင်း ပြန်လည်တည်ဆောက်နိုင်ရေး မြန်မာ့မီးရထား အင်ဂျင်နီယာဝန်ထမ်းများမှ စီစဉ်ဆောင်ရွက်နေကြောင်း ထုတ်ပြန်ချက်တွင် ဆိုထားသည်။

ကျောက်မဲမြို့နယ် နောင်ပိန်တိုက်နယ်အတွင်း TNLA ပူးပေါင်းတပ်နှင့် စစ်ကော်မရှင်တပ်တို့ မြေပြင်ထိတွေ့တိုက်ပွဲ ပြင်းထန်နေစဉ် ပြီးခဲ့သည့် ဩဂုတ်လ (၂၄) ရက်တွင် ဂုတ်ထိပ်တံတား မိုင်းခွဲဖျက်ဆီးခံရပြီး ပေ (၃၀) ခန့် ကျိုးကျပျက်စီးသွားကြောင်း စစ်ကော်မရှင်လက်အောက်ခံ မီဒီယာများနှင့် ဝါဒဖြန့် တယ်လီဂရမ် ချန်နယ်များတွင် ပုံနှင့်တကွ ပျံ့နှံ့လာပြီးနောက် တံတားမိုင်းခွဲဖျက်ဆီးကြောင်း စစ်ကော်မရှင်နှင့် TNLA နှစ်ဘက်အပြန်အလှန် စွပ်စွဲထားကြသည်။

လက်ရှိတွင် ကျောက်မဲမြို့ဘက်သို့ မြေပြင်စစ်ကြောင်းထိုး ချီတက်နိုင်ရန် ဂုတ်တွင်းလမ်းပိုင်းရှိ မိုင်းခွဲဖျက်ဆီးခံထားရသည့် တံတားကြီးကို စစ်ကောင်မရှင်ဘက်မှ သံဘောင်ဘေလီတံတား တည်ဆောက်ထားပြီး TNLA ပူးပေါင်းတပ်မှ ကျောက်မဲမြို့နှင့် ၇ မိုင်ခန့်သာ ကွာဝေးသည့် စခန်းသာကျေးရွာတွင် စစ်ကော်မရှင်တပ်ကို ခုခံတိုက်ခိုက်နေကြောင်း ဒေသခံများထံမှ သိရသည်။