သျှမ်းပြည် တောင်ကြီးမြို့နယ်တွင် ရောက်ရှိနေသည့် စစ်ဘေးရှောင်အမျိုးသားတစ်ဦးကို ရွေးကောက်ပွဲနှောင့်ယှက်မှုဥပဒေဖြင့် ထောင်ဒဏ်(၇)နှစ် ချမှတ်လိုက်ကြောင်း စစ်ကော်မရှင်ဘက်က ထုတ်ပြန်လိုက်သည်။
ယမန်နေ့ (စက်တင်ဘာလ ၉ ရက်) တွင် စစ်ကော်မရှင်လက်အောက်ခံ တောင်ကြီးမြို့နယ် တရားရုံးက အေးသာယာမြို့တွင် ရပ်ကွက်(၁) တွင် နေထိုင်သည့် လားရှိုးစစ်ဘေးရှောင် ကိုနေသွေး အား ရွေးကောက်ပွဲများကို နှောင့်ယှက်ဟန့်တား ဖျက်ဆီးခြင်းမှ ကာကွယ်ပေးရေးဥပဒေ ပုဒ်မ ၂၃(က) ဖြင့် အမှုဖွင့်စစ်ဆေးခဲ့ပြီး ပြစ်မှုထင်ရှားသဖြင့် အလုပ်နှင့်ထောင်ဒဏ် (၇) ကျခံစေရန် အမိန့်ချမှတ်ခဲ့ကြောင်း ထုတ်ပြန်ခဲ့သည်။
ပြီးခဲ့သည့် ဩဂုတ်လ (၂၅) ရက်တွင် စစ်ကောင်မရှင်တပ် လုံခြုံရေးအဖွဲ့က ရှာဖွေစစ်ဆေးခဲ့ရာ အေးသာယာမြို့ ရပ်ကွက်(၁)၊ အမှတ် (၄၄/၅၇) တွင် နေထိုင်သူ ကိုနေသွေး အား နေအိမ်၌ သွားရောက်ဖမ်းဆီးခဲ့ပြီး အေးသာယာမြို့မရဲစခန်းတွင် ရွေးကောက်ပွဲနှောင့်ယှက်မှုဥပဒေဖြင့် ပထမဆုံး အမှုဖွင့်ခံခဲ့ရသည်။
“ပြည်သူတစ်ယောက်အနေနဲ့ ပြောရရင် လွတ်လပ်စွာ ပြောဆိုပိုင်ခွင့် ရှိရမယ်။ ဒါက သူမကြိုက်တဲ့ စစ်အာဏာရှင်နဲ့ စစ်တပ်ရဲ့ ပြည်သူအပေါ် လုပ်ရပ်တွေကို ထောက်ပြတာပဲလေ။ အဲ့လောက်လေး ထောက်ပြတာနဲ့ ထောင်ချတယ်ဆိုတော့ မဖြစ်သင့်ဘူးလေ၊ ဒါက သူတို့ရွေးကောက်ပွဲကို နှောင့်ယှက်တယ်လို့ ယူဆရင် ဘယ်လိုမျိုးပဲဖြစ်ဖြစ် ထောင်ချနိုင်လို့ လူတိုင်း သတိထားရမှာ”ဟု တောင်ကြီးဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဩဂုတ်လ (၂၃) ရက်တွင် စစ်ကော်မရှင်တပ် ပြန်လည်ထိန်းချုပ်ထားသည့် လားရှိုးမြို့ ရပ်ကွက်(၅) ၌ ဖြစ်ပွားခဲ့သော သေနတ်ပစ်ခတ်၍ ကားလုယူသွားသည့် ဖြစ်စဉ်ကို Lashio Baegyi အမည်ရှိ ဖေ့စ်ဘုတ် အကောင့်ဖြင့် ပြန်လည်မျှဝေရာတွင် ရွေးကောက်ပွဲကိစ္စနှင့် ပတ်သက်၍ ဝေဖန်ရေးသားထားသည်။
ယခုနှစ် ၂၀၂၅ ဇူလိုင်လ ၂၉ ရက်တွင် စစ်ကော်မရှင်မှ အသစ်ပြဋ္ဌာန်းခဲ့သည့် ရွေးကောက်ပွဲများကို နှောင့်ယှက်ဟန့်တား ဖျက်ဆီးခြင်းမှ ကာကွယ်ပေးရေးဥပဒေ ပုဒ်မ ၂၃(က) အရ ရွေးကောက်ပွဲလုပ်ငန်းစဉ်ကို ပျက်ပြားစေရန် ဟောပြောခြင်း၊ ပြောဆိုခြင်း၊ စည်းရုံးခြင်း၊ လှုံ့ဆော်ခြင်း၊ ဆန္ဒပြခြင်း သို့မဟုတ် စာရေးသားဖြန့်ချိခြင်းတို့ကို မည်သည့်နည်းနှင့်မျှ မပြုလုပ်ရန် တားမြစ်ကြောင်း ပြဋ္ဌာန်းထားသည်။
အကယ်၍ ၎င်းတားမြစ်ချက်ကို ဖောက်ဖျက်ကျူးလွန်ကြောင်း ပြစ်မှုထင်ရှားစီရင်ခြင်း ခံရလျှင် အနည်းဆုံး ထောင်ဒဏ် (၃)နှစ်မှ အများဆုံး (၇)နှစ်အထိ ချမှတ်ခံရမည့်အပြင် ငွေဒဏ်လည်း ချမှတ်နိုင်ကြောင်း ဆိုထားသည်။
ထိုဥပဒေအရ ရွေးကောက်ပွဲနှင့် ပတ်သက်ပြီး အွန်လိုင်းပေါ် ရေးသားချက်များကိုပါ စောင့်ကြည့်လျက်ရှိကာ တစ်လကျော်အတွင်း အမှု(၃)မှု အရေးယူခဲ့ကြောင်း စက်တင်ဘာလ (၅) ရက်တွင် နေပြည်တော်၌ ကျင်းပခဲ့သည့် ရွေးကောက်ပွဲကာလ လုံခြုံရေးဆိုင်ရာ ကြီးကြပ်မှု ဗဟိုကော်မတီ အစည်းအဝေးတွင် စစ်ကော်မရှင် ပြည်ထဲရေးဝန်ကြီး ဒုဗိုလ်ချုပ်ကြီး ထွန်းထွန်းနောင်က ပြောဆိုခဲ့သည်။
Leave a Comments