တရုတ်-မြန်မာ နယ်စပ်ရှိ မူဆယ်မြို့မှတဆင့် တရုတ်အငှားမယားအဖြစ် ပို့ဆောင်ရောင်းစားရန် စီစဉ်ဆောင်ရွက်ခဲ့သူ အမျိုးသမီး (၄) ဦးကို လူကုန်ကူးမှုဖြင့် စစ်ကော်မရှင်လက်အောက်ခံ တရားရုံးများမှ အလုပ်နှင့် ထောင်ဒဏ် ၁၀ နှစ် ချမှတ်ခဲ့ကြောင်း သတင်းသိရသည်။

ပြီးခဲ့သည့် ဩဂုတ်လ (၂၉) ရက်တွင် မူဆယ်မြို့နေ အေးမြတ်မွန်၊ အေးအိမွန်နှင့် မန္တလေးမြို့မှ ပွဲစား ဒေါ်သန်းအေး (ခ) ပီရင်း တို့ကို အမျိုးသမီးများအား တရုတ်နိုင်ငံသို့ ပို့ဆောင်ရောင်းစားရန် စီစဉ်ဆောင်ရွက်ခဲ့ခြင်းကြောင့် လူကုန်ကူးမှု တားဆီးနှိမ်နှင်းရေး ဥပဒေ ပုဒ်မ ၃၅/၄၄ အရ စစ်ကော်မရှင်လက်အောက်ခံ အောင်မြေသာဇံ ခရိုင်တရားရုံးမှ အလုပ်နှင့် ထောင်ဒဏ် ၁၀ နှစ်စီ ချမှတ်ခဲ့ကြောင်း စစ်ကော်မရှင်ဘက်မှ ယနေ့ (စက်တင်ဘာလ ၂ ရက်) တွင် သတင်းထုတ်ပြန်သည်။

ဖြစ်စဉ်မှာ သျှမ်းပြည် မူဆယ်မြို့တွင် နေထိုင်သည့် အေးမြတ်မွန် ဆိုသူ အမျိုးသမီးတစ်ဦးသည် Tik Tok လူမှုကွန်ရက်မှတဆင့် ကချင်ပြည်နယ် မိုးညှင်းမြို့မှ အသက် (၂၄) နှစ်အရွယ် အမျိုးသမီးတစ်ဦးနှင့် မန္တလေးတိုင်း တောင်သာမြို့နယ်မှ အသက် (၂၄) နှစ်အရွယ် အမျိုးသမီးတစ်ဦးတို့ကို တရုတ်သူဌေးများနှင့် တွေ့ဆုံပေးမည်ဟု စည်းရုံးပြောဆိုခဲ့ကြောင်း စစ်ကော်မရှင် ထုတ်ပြန်ချက်တွင် ဖော်ပြထားသည်။

ထိုအမျိုးသမီးနှစ်ဦးကို တရုတ်နိုင်ငံသို့ တစ်နှစ်သွားရောက်နေထိုင်၍ တရုတ်အငှားမယား လုပ်ကိုင်ပါက ယွမ် ၁၀၀၀၀ (မြန်မာကျပ်ငွေ ကာလပေါက်ဈေး သိန်း ၆၀ ကျော်) ရမည်ဟု ပြောဆိုပြီး တရုတ်ယောကျ်ားထံ ပို့ဆောင်ရောင်းစားရန် အမွှာညီမဖြစ်သူ အေးအိမွန်နှင့် အတူ စီစဉ်ဆောင်ရွက်ခဲ့ကြောင်း စစ်ဆေးပေါ်ပေါက်ခဲ့သည်ဟု ဆိုသည်။

အလားတူ လားရှိုးမြို့နေ အသက်(၃၉) နှစ်အရွယ် အမျိုးသမီးတစ်ဦးကိုလည်း တရုတ်အငှားမိန်းမအဖြစ် လုပ်ကိုင်ပါက တရုတ်ယွမ်ငွေ ၁၅၀၀၀ (မြန်မာကျပ်ငွေ သိန်း ၁၀၀ နီးပါး) ရမည်ဖြစ်ကြောင်း မူဆယ်မြို့နေ အေးမြန်မွန်မှ Tik Tok လူမှုကွန်ရက်မှတဆင့် စည်းရုံးပြောဆိုခဲ့ပြီး လုပ်ကိုင်လိုပါက မန္တလေးမြို့သို့ ခေါ်ဆောင်ခဲ့သည်။

ထိုစဉ် မန္တလေးမြို့ရှိ တည်းခိုခန်းတစ်ခုတွင် ပွဲစား ဒေါ်သန်းအေး(ခ) ပီရင်းနှင့်အတူ ပက်စ်ပို့နှင့် ဗီဇာပြုလုပ်ရန် စောင့်ဆိုင်းနေစဉ် တာဝန်ရှိသူများ၏ စစ်ဆေးမေးမြန်းခံခဲ့ရကြောင်း စစ်ကော်မရှင် ထုတ်ပြန်ချက်အရ သိရသည်။

ထို့အပြင် ရန်ကုန်တိုင်း ခရမ်းမြို့နယ်မှ အသက် (၁၉) နှစ်အရွယ် အမျိုးသမီးတစ်ဦးကို တစ်ရွာတည်းနေ မနိုင် (ခ) လေးလေးနိုင်က တရုတ်နိုင်ငံရှိ ဆံပင်တုနှင့် လက်သည်းတု စက်ရုံတွင် အလုပ်လုပ်ကိုင်ရမည်ဟု ကနဦး စည်းရုံးခဲ့ပြီးနောက် မူဆယ်မြို့နေ မိုးသူဇာ (ခ) မချိုထံ ပို့ဆောင်ခဲ့သည်။
ယင်းနောက်တွင် စက်ရုံ၌ အလုပ်ရမည်မဟုတ်ဘဲ တရုတ်ယောကျ်ား ယူရမည်၊ မယူပါက လမ်းစရိတ် ပြန်လျော်ရမည်ဟု ပြောဆိုပြီး တရုတ်နိုင်ငံသို့ ပို့ဆောင်ခဲ့ခြင်းကြောင့် စစ်ကော်မရှင်လက်အောက်ခံ သန်လျင်ခရိုင် တရားရုံးမှ မနိုင် (ခ) လေးလေးနိုင်ကို လူကုန်ကူးမှု တားဆီးနှိမ်နှင်းရေးဥပဒေ ပုဒ်မ ၃၅/၄၄ အရ အလုပ်နှင့် ထောင်ဒဏ် ၁၀ နှစ် ကျခံရန် အမိန့်ချမှတ်ခဲ့ပြီး မိုးသူဇာ (ခ) မချို ကို ရာဇဝတ်ကျင့်ထုံးဥပဒေအရ ထုတ်ဆင့်ထားကြောင်း စစ်ကော်မရှင်ဘက်မှ ထုတ်ပြန်သည်။

မြန်မာ-တရုတ် နယ်စပ်ဒေသတွင် အလုပ်အကိုင် ရှားပါးမှုကြောင့် ပွဲစားမျာက အလုပ်ရှာဖွေပေးမည်ဟု မက်လုံးပေးခေါ်ရာမှ တရုတ်ဇနီးမယားအဖြစ် ရောင်းစားခံရမှု တိုးလာနေကြောင်း ထိုကဲ့သို့ အမှုကိစ္စများတွင် ပါဝင်ကူညီနေသည့် လူမှုကူညီရေးအသင်းများထံမှ သိရသည်။

ရောင်းစားခံရသူများမှာ အသက် ၂၀ ကျော်အရွယ် မြန်မာ-တရုတ်နယ်စပ်ဒေသက ဒေသခံအမျိုးသမီးများ အပါအဝင် မကွေး၊ ပခုက္ကူ၊ ရန်ကုန် စသည့်ဖြင့် အနယ်နယ်အရပ်ရပ်က အမျိုးသမီးများဖြစ်ကြပြီး တရုတ်ပြည်ယူနန်မြို့အထိသို့ ရောင်းစားခံရကြောင်း၊ အမျိုးသမီးတစ်ဦးလျှင် တရုတ်ယွမ် ၅ သောင်း (မြန်မာကာလပေါက်စျေး ကျပ်သိန်း ၂၈၀ နီးပါး) မက်လုံးပေး၍ ခေါ်ခဲ့ကြောင်း သိရသည်။

မြန်မာအမျိုးသမီးများရောင်းစားခံရမှုနှင့် ပတ်သက်၍ နှစ်နိုင်ငံက ပူးပေါင်းပြီး ခြေရာခံ လိုက်မည်ဆိုလျှင်လည်း ခက်ခဲကြောင်း၊ အမျိုးသမီးများရောင်းစားခံရမှု နောက်ကွယ်မှာ လူမှုအဖွဲ့အစည်းနှင့် လက်နက်ကိုင်တပ်ဖွဲ့တချို့ ပါဝင်ပတ်သက်နေကြောင်း လူမှုကူညီရေးအသင်းက ပြောသည်။