သျှမ်း-မန္တလေးနယ်စပ် မိုးကုတ်အပါအဝင် ကျောက်မဲ၊ မိုင်းငေါ့၊ သီပေါနှင့် မိုင်းလုံ မြို့နယ်တွင် စစ်ကော်မရှင်တပ်မှ လေကြောင်း၊ လက်နက်ကြီးနှင့် ဒရုန်းတို့ဖြင့် ဗုံးကြဲပစ်ခတ်တိုက်ခိုက်မှုကြောင့် သြဂုတ်လအတွင်း ပြည်သူ (၄၆) ဦး သေဆုံးခဲ့ရကြောင်း TNLA က ယမန်နေ့ စက်တင်ဘာလ ၁ ရက်နေ့တွင် သတင်းထုတ်ပြန်သည်။

ထိုသေဆုံးမှုတွင် သံဃာတော် (၃) ပါး၊ သီလရှင် (၁) ပါး၊ အမျိုးသား (၁၉) ဦး၊ အမျိုးသမီး (၁၈) ဦးနှင့် ကလေး (၅) ဦး ပါဝင်ပြီး စစ်ကော်မရှင်တပ်က ပြည်သူများကို ဦးတည်၍ လေကြောင်းဖြင့် ဗုံးကြဲတိုက်ခိုက်နေခြင်း ဖြစ်ကြောင်း ထုတ်ပြန်ချက်တွင် ရေးသားဖော်ပြထားသည်။

ထို့ပြင် စစ်ကော်မရှင်တပ်၏ လေကြောင်းဗုံးကြဲမှုကြောင့် သံဃာတော် (၆) ပါး၊ သာမဏေ (၆) ပါး၊ အမျိုးသား (၃၁) ဦး၊ အမျိုးသမီး (၁၂) ဦး စုစုပေါင်း လူ (၅၅) ဦးလည်း ထိခိုက်ဒဏ်ရာရရှိသွားခဲ့ကြောင်း ဆိုသည်။

“အခုကျောက်မဲနဲ့ သီပေါကို စစ်တပ် (စစ်ကော်မရှင်) က ရအောင်ပြန်တိုက်မယ်လို့ ကြားတယ်။ တိုက်ပွဲထပ်ဖြစ်ရင် ပြည်သူတွေတော့ ထွက်ပြေးရုံမှတစ်ပါး အခြားနည်းလမ်းမရှိဘူး။ အခုချိန်မှာတော့ ပြည်သူကနေ ပြည်သူကို အပြန်အလှန် ကူညီနေရတာပေါ့” ဟု ကျောက်မဲမြို့ဒေသခံတစ်ဦးက သျှမ်းသံတော်ဆင့်ကို ပြောသည်။

တရုတ်အစိုးရ၏ အစီအစဉ်ဖြင့် သြဂုတ် ၂၇ ရက်နေ့က တရုတ်နိုင်ငံ ယူနန်ပြည်နယ် ကူမင်းမြို့တွင် တအာင်းတပ် TNLA နှင့် စစ်ကော်မရှင်၏ ကိုယ်စားလှယ်များအကြား အပစ်ရပ်ရေးအတွက် ဆွေးနွေးခဲ့သော်လည်း တစ်စုံတစ်ရာ သဘောတူညီမှုမရရှိဘဲ ပြီးဆုံးခဲ့သည်။

အဆိုပါဆွေးနွေးပွဲတွင် ကျောက်မဲမြို့နှင့် သီပေါမြို့ကို ပြန်ပေးမည်ဟု TNLA ဘက်က ကမ်းလှမ်းခဲ့သော်လည်း ထိုကမ်းလှမ်းချက်ကို စစ်ကော်မရှင်ဘက်က လက်မခံခဲ့ဘဲ (ကျောက်မဲနှင့် သီပေါ) မြို့ကိုသာ ပြန်သိမ်းမည်ဟု ပြောကြားခဲ့ကြောင်း သိရသည်။

“တိုက်ပွဲက ပြင်းပြင်းထန်ထန် ပြန်ဖြစ်မလား ဒါမှမဟုတ် အနည်းငယ်ပဲ ပစ်ကြမလား မသိတော့၊ ပြည်သူတွေအနေနဲ့ ဘေးကင်းတဲ့နေရာမှာ ကြိုတင်ရှောင်ရှားဖို့ တိုက်တွန်းထားတယ်” ဟု ကျောက်မဲမြို့ လူမှုကူညီရေးအသင်းမှ တာဝန်ခံတစ်ဦးက ပြောသည်။

TNLA သည် ၂၀၂၃ အောက်တိုဘာလ ၂၇ ရက်နေ့တွင် စတင်ခဲ့သည့် “၁၀၂၇ စစ်ဆင်ရေး”အတွင်း သျှမ်းမြောက် သီပေါ၊ ကျောက်မဲ၊ နောင်ချို၊ နမ့်ခမ်း၊ နမ္မတူ၊ နမ့်ဆန်၊ ကွက်ခိုင်၊ မန်တုံ၊ မိုင်းငေါ့၊ မိုင်းလုံ၊ မိုးမိတ်နှင့် မန္တလေးတိုင်း မိုးကုတ် အပါအဝင် စုစုပေါင်း ၁၂ မြို့ကို သိမ်းပိုက်ထားခဲ့သည်။

သို့သော် စစ်ရေးအရ အရေးပါသည့် နောင်ချိုမြို့ကို စစ်ကော်မရှင်တပ်များက ပြီးခဲ့သည့် ဇူလိုင်လ ၁၅ ရက်နေ့တွင် TNLA လက်ထဲမှ ပြန်သိမ်းနိုင်ခဲ့သည်။