ကလော-သာစည် လမ်းပိုင်းရှိ စစ်ကော်မရှင် စစ်ဆေးရေးဂိတ်တွင် ရန်ကုန်မြို့မှ တောင်ကြီးမြို့သို့ တင်ပို့သည့် နိုင်ငံခြားကုန်ပစ္စည်းများကိုသိမ်းဆည်းမှုများ ပြုလုပ်နေကြောင်း သတင်းရရှိသည်။

သျှမ်းပြည် တောင်ပိုင် ကလော နှင့် သာစည် လမ်းပိုင်းရှိ စစ်ကော်မရှင် စစ်ဆေးရေး ကျွဲတပ်ဆုံ ဂိတ်တွင် ပြီးခဲ့သည့် သြဂုတ်လ ၂၃ ရက်မှစပြီးရန်ကုန် မှ တောင်ကြီးသို့ တင်ပို့လာသည့်  နိုင်ငံခြားထုတ် ကုန်ပစ္စည်းအမျိုးမျိုးကို သိမ်းဆည်းမှုများကြောင်း အသက် ၄၀ ဝန်းကျင် ကားသမားတစ်ဦးက သျှမ်းသံတော်ဆင့်ကို ပြောသည်။

“အဲ့ကျွဲတပ်ဆုံဂိတ်မှာက အရင်တုန်းကလည်း စစ်ဆေးကြမ်းတယ်။ဒီနောက်ပိုင်းကြတော့ ကုန်ပစ္စည်းတွေ ပေးမဖြတ်တော့ဘူး။အဓိကတော့နိုင်ငံခြားကုန်တွေ စားသောက်ကုန်တွေက အစပါတယ်။”ဟု အသက် ၄၀ ဝန်းကျင် ကားသမားတစ်ဦးက ပြောသည်။

ဆက်လက်ပြီး ကားဂိတ်များတွင်လည်း  နိုင်ငံခြားကုန်ပစ္စည်းများဖြစ်သည့် စားသောက်ကုန်၊ အဝတ်အထည်၊ စက်ပစ္စည်း၊ အလှကုန်၊ ကလေးအသုံးအဆောင်ပစ္စည်းများကို ကျွဲတပ်ဆုံးဂိတ်တွင် သိမ်းဆည်းမှုများ ပြုလုပ်နေသည့်အတွက် လက်ခံပိုဆောင်မှုများကို ယာယီရပ်နားထားကြောင်း  အမျိုးသမီးဂိတ်မှူးတစ်ဦးက ထပ်မံလောင်းပြောသည်။

“ကျွဲတပ်ဆုံ စစ်ဆေးရေးဂိတ်မှာ တကယ်လို့ သူတို့ဖောက်စစ်လိုက်လို့ ထိုင်းပစ္စည်းတွေ၊ တရုတ် ပစ္စည်းတွေဆိုရင် ပေးမဖြတ်ဘူး မရဘူး။စားသောက်ကုန် ဖြစ်ဖြစ် အိမ်သုံးကုန်ဖြစ်ဖြစ်မရဘူး။ ပို့ချင်ရင်တော့ တစ် ပတ်လောက်တော့ စောင့်ကြည့်ရအုံးမယ်။”ဟု အမျိုးသမီးဂိတ်မှူးတစ်ဦးက ပြောသည်။

ထိုကဲ့သို့  ရန်ကုန် မှ တောင်ကြီးသို့ တင်ပို့လာသည့် ကုန်ပစ္စည်များကို သိမ်းဆည်းမှု ပြုလုပ် နေခြင်းကြောင့် ကုန်ပစ္စည်းများ ဈေးတက်ခြင်း၊တောင်ကြီးမှတဆင့် ပြန်လည်း တင်ပို့ရောင်းချ နေသော တခြားမြို့နယ် ဒေသများတွင် ကုန်ပစ္စည်း ပြတ်လပ်မှု ဖြစ်လာနိုင်ကြောင်း တောင်ကြီးမြို့ဒေသခံ အမျိုးသမီးတစ်ဦးက ဆက်ပေကြာသည်။

“ခုဆို ထိုင်းဘက်က ပစ္စည်းတွေလည်း သိပ်မရောက်တော့ဘူး။ အဲ့ကြောင့် လိုအပ်မယ် ထင်တဲ့ ခရုဆီ၊ ဆပ်ပြာတို့စတဲ့ လိုအပ်တာတွေကို စျေးထဲမှာလုဝယ်ကြတယ်။ တစ်ချို့နေရာဆို မရောင်းပေးချင်ဘူး။ လုံးဝပစ္စည်း ပြတ်သွားရင် စျေးတင်ရောင်းကြအုံးမယ်ထင်တယ်။ နောက်နည်းနည်းဆိုတခြားမြို့ တွေလည်း ထိုင်းဘက်က ဘာပစ္စည်းမှ မဝင်လောက်တော့ဘူး။ ခေတ်နောက်ပြန် သွားနေသလိုပဲ။”ဟု တောင်ကြီးမြို့ ဒေသခံအမျိုးသမီး တစ်ဦးကပြောသည်။

သြဂုတ် ၁၃ ရက်တွင် နိုင်ငံခြားသုံးငွေ ကြီးကြပ်မှုကော်မတီ၏ လမ်းညွှန်ချက်အရ နယ်စပ်ဂိတ်၊ ပင်လယ်ရေကြောင်းဂိတ်များမှ စ၍ ကုန်ပစ္စည်း၃၅ မျိုးကို တင်သွင်းခွင့် ယာယီပိတ်လိုက် ကြောင်း အွန်လိုင်းလူမှုကွန်ရက် စာမျက်နှာပေါ်တွင် ပျံ့နှံ့ခဲ့သည်။

သြဂုတ်လ တတိယပတ်မှ စတင်ပြီး တာချီလိတ်မြို့မှ အခြားမြို့သို့ တင်ပို့မည့် ကုန်ပစ္စည်းများကို စစ်ကော်မရှင်ဘက်မှ သယ်ဆောင်ခွင့်မပြုခြင်း၊ခရီးသည် သွားလာမှု နည်းပါးခြင်းတို့ကြောင့် ခရီးသည်တင်ယာဉ်အချို့ ရပ်နားထားရကြောင်းသိရသည်။