သျှမ်းပြည် ကျောက်မဲမြို့နယ် နောင်ပိန်တိုက်နယ်အတွင်းသို့ စစ်ကောင်စီအသွင်ပြောင်း စစ်ကော်မရှင်တပ်မှ မြေပြင်စစ်ကြောင်းထိုး ဝင်ရောက်လာပြီး TNLA ပူးပေါင်းတပ်ဖွဲ့နှင့် တိုက်ပွဲဖြစ်ပွားနေကြောင်း စုံစမ်းသိရသည်။

ယနေ့ (ဩဂုတ်လ ၁၉ ရက်) နံနက်ပိုင်းမှ စတင်ပြီး ကျောက်မဲမြို့နယ် နောင်ပိန်တိုက်နယ်အတွင်းရှိ ထန်းတပင်ကျေးရွာသို့ နောင်ချိုဘက်မှ တပ်မ – ၁၁ လက်အောက်ခံ စစ်ကောင်စီတပ်သားများ ဂုတ်တွင်းချောင်းဖြတ်ကူး၍ အင်အား (၇၀၀) ကျော် မြေပြင်စစ်ကြောင်းထိုးလာပြီး နောင်ပိန် တောင်ဘက် (၆) ရပ်ကွက်တွင် TNLA ပူးပေါင်းတပ်များနှင့် ထိတွေ့တိုက်ပွဲ ဖြစ်ပွားနေကြောင်း ဒေသခံများက ပြောသည်။

“နောင်ပိန်ရွာထဲ ဝင်တွယ်ကုန်ပြီ၊ နောင်ချိုဘက်က စစ်သားတွေ ဂုတ်တွင်းဆင်းပြီး ထန်းတပင်ကို ရေချောင်းကနေ ဖြတ်လာတာ။ ပလောင်က တောင်ခြေတစ်လျှောက်ကို ပိတ်ထားတာ။ စစ်တပ်က ရွာထဲဝင်တော့ ပလောင်လည်း ဘူတာရုံဘက်ကနေ ဝင်လာတာ၊ အခုတော့ ၆ ကွက်ဘက် ပစ်နေတယ် ကြားတယ်။ ရွာထဲကနေ တော်တော်များများ ပြေးကုန်ပြီ”ဟု နောင်ပိန်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

စစ်ကောင်စီတပ်များ မြေပြင်စစ်ကြောင်းထိုး ဝင်ရောက်လာသည့် ထန်းတပင်ရွာသည် နောင်ပိန်ရွာနှင့် ၂ မိုင်ခန့်သာ ကွာဝေးပြီး ကျေးရွာရှိ ပြည်သူများကို အပြင်ပေးမထွက်ဘဲ ဆေးဖြန်းသွားသည့် အမျိုးသား (၃) ဦး ဖမ်းဆီးခံထားရကြောင်း ဒေသခံများထံမှ သိရသည်။

“အခု စစ်ကြောင်းထိုးလာတဲ့ စစ်သားတွေ ထန်းတပင်က လူတွေကို ပေးမထွက်ဘူး။ မနက်ကတော့ ဆေးဖြန်းသွားတဲ့ ယောကျ်ားလေး ၃ ယောက် ဖမ်းခံရတယ်ကြားတယ်။ ပလောင်တွေလည်း ကျောက်မဲကနေ ထွက်ဖို့ပြင်နေတာကို နောင်ပိန်မှာ တိုက်ပွဲဖြစ်လိုက်သေးတယ်”ဟု နောင်ပိန်ဒေသခံ ၎င်းအမျိုးသားက ဆက်ပြောသည်။

အလားတူ TNLA ထိန်းချုပ်ထားသည့် ကျောက်မဲမြို့ပေါ်သို့ စစ်ကောင်စီတပ်က ယနေ့ နံနက် ၁၀ နာရီကျော်တွင် အသေခံဒရုန်း တစ်စင်းဖြင့် စတင်တိုက်ခိုက်ခဲ့ပြီး ၎င်းဒရုန်းမှာ မြို့တွင်း၌ ပျက်ကျခဲ့ကြောင်း ကျောက်မဲဒေသခံများထံမှ သိရသည်။

လက်ရှိတွင် ကျောက်မဲမြို့နယ်အတွင်း ပြည်ထောင်စုလမ်းမကြီးဘေးရှိ ကျေးရွာများနှင့် နောင်ပိန်တိုက်နယ် ဒေသခံများ၊ စစ်ဘေးရှောင်များမှာ ပုံဝိုး၊ ဟဲကွီဘက်သို့ ထပ်မံထွက်ပြေး တိမ်းရှောင်နေရကြောင်း သိရပြီး အရေးပေါ် ကူညီထောက်ပံ့မှုများ လိုအပ်နေကြောင်း စစ်ရှောင်ကူညီသူများထံမှ သိရသည်။

ယမန်နေ့ (ဩဂုတ်လ ၁၈ ရက်) မှ စတင်ပြီး နောင်ချိုစစ်ကောင်စီတပ်သည် ဂုတ်ထိပ်တဖက်ကမ်း ကျောက်မဲမြို့နယ် SSPP/SSA ထိန်းချုပ်ထားသည့် နောင်ပိန်အနီးတဝိုက် လုံကြိမ်၊ ကျောင်းကုန်းနှင့် ပင်တိန်ကျေးရွာတို့ကို လက်နက်ကြီးနှင့် ဒရုန်းဖြင့် ဗုံးကြဲတိုက်ခိုက်ခဲ့ရာ အရပ်သားတစ်ဦး ထိမှန်သေဆုံးခဲ့ပြီး နာမ်မိန်းဘုန်းကြီးကျောင်းမှ ကိုရင်တစ်ပါး ဒဏ်ရာရရှိခဲ့ကြောင်း နောင်ပိန်ဒေသခံများက ပြောသည်။

ပုံစာ – ကျောက်မဲမြို့ပေါ် ပျက်ကျခဲ့သည့် စစ်ကောင်စီတပ် အသေခံဒရုန်း (ဓာတ်ပုံ – ဒေသခံ)